Skip to content Skip to left sidebar Skip to footer

MEDIO AMBIENTE

O Concello da por finalizada a consolidación do monumento con forno de Punta Sarridal

O CONCELLO DA POR FINALIZADA A CONSOLIDACIÓN DO MONUMENTO CON FORNO DE PUNTA SARRIDAL

O Concello de Cedeira deu hoxe por concluída a terceira escavación levada a cabo no castro de Punta Sarridal, a primeira financiada pola administración local.

Desde hoxe mesmo, o xacemento arqueolóxico, no que no mes decembro de 2017 era localizada a quinta pedra formosa de Galicia, pode xa ser visitado polas persoas que queiran ver un pouco máis de cerca a construción dun asentamento galaico-romano cuxas orixes os expertos sitúan entre os séculos II ou III d.C.

Os responsables municipais, ademais de pedir o máximo respecto á hora de visitar o lugar, entenden que a súa misión é precisamente dar a coñecer un patrimonio que está na esencia do pobo cedeirense e que fala da súa singularidade e identidade propia. A idea do goberno de Cedeira tamén pasa pola colocación dun peche para delimitar a zona escavada e pola instalación de paneis informativos para que os visitantes poidan ter datos sobre o traballo realizado e os resultados acadados. Estas obras se levarán a cabo de seguido.

Esta terceira intervención, que daba comezo nos primeiros días do presente mes e na que estiveron traballando ata oito persoas, tiña como obxectivo a consolidación e posta en valor dos elementos ata o de agora localizados.

Con cargo a un orzamento de 12.000 euros (IVE incluído), a tarefa realizada deu lugar á recuperación do lousado e empedrado do acceso á antecámara así como dun banco situado en dita estancia. Tamén se actuou no arco de entrada á cámara, se consolidou a boca do forno e se deixou á vista tanto o paramento exterior do monumento con forno como o do exterior da muralla. Nun deles, ademais, foi localizado e recuperado un canal de auga.

Os primeiros traballos arqueolóxicos en Punta Sarridal deron comezo o día 1 de decembro do 2017. Con anterioridade, o Concello tiña levado a cabo unhas catas e localizados restos de cerámica e de muros de orixe castrexa. Tan só terían que pasar trece xornadas máis desde aquel día de decembro para que Cedeira entrase pola porta grande no mundo da arqueoloxía castreña co descubrimento dunha “pedra formosa”, a quinta da que se ten constancia en Galicia.

As escavacións no Sarridal son protagonistas no Congreso Internacional de Arqueoloxía

AS ESCAVACIÓNS NO SARRIDAL SON PROTAGONISTAS NO CONGRESO INTERNACIONAL DE ARQUEOLOXÍA

O castro do Sarridal e as escavacións levadas a cabo nesta zona de Cedeira está moi presente no Congreso Internacional de Arqueoloxía que estes días se está a celebrar en Vilalba (Lugo).

Onte mesmo un grupo de participantes se desprazou á vila, a primeira hora da tarde, para ter contacto directo coa escavación, na que en decembro pasado foi localizada a quinta pedra formosa atopada en Galicia.

A presenza dos congresistas deu lugar á recepción dos congresistas no popio xacemento por parte do alcalde, Pablo Moreda Gil e dos concelleiros de Cultura, Educación e Servizos Sociais, María Xosé Rodríguez Pérez, Rubustiano Labraña e Manuela López Rodríguez, respectivamente.

E os traballos que se están a realizar na zona do Sarridal volverán mañá a centrar a actividade do congreso coa participación no mesmo de Emilio Ramil, arqueólogo e director das tres escavacións executadas ata agora en Cedeira.

Ramil explicará aos asistentes as características do que é o segundo monumento con forno localizado na zona de Ortegal -Castro dos Prados (Ortigueira), o primeiro, atopouse 28 anos antes así como detalles destes traballos. A continuación, será o arqueólogo Xosé Ramón Martínez Casal, profesional que tamén está a participar nas escavacións, a persoa que leve o descubrimento ao terreo cultural, explicando a riqueza inmaterial que se deriva deste tipo de intervencións e que contribúe a contextualizar a historia dos pobos, neste caso da cedeirense.

O congreso, que arrincou onte, finalizará o venres cunha alta participación de profesionais de Galicia, Asturias, Cantabria, País Vasco, Castilla-León, e norte de Portugal. A Asociación de Amigos do Museo de Vilaba e do Museo de Prehistoria e Arqueoloxía de Vilalba está ao fronte desta cuarta edición do congreso, que ten periodicidade trianual.

Cedeira recorda que os residuos orgánicos deben ir ao colector de cor verde

CEDEIRA RECORDA QUE OS RESIDUOS ORGÁNICOS DEBEN IR AO COLECTOR DE COR VERDE

O Concello de Cedeira, a través da Concellería de Medio Ambiente, considera necesario recordar as pautas que debe seguir calquera usuario do servizo de recollida de lixo para facer un bo uso do mesmo, unha mensaxe dirixida tanto á veciñanza como ás persoas que só están de paso.

Así, infórmase de que o colector de cor verde só está destinado a recibir os residuos orgánicos e a chamada “fracción resto”, que son todos aqueles que non se poden depositar nos contedores de papel/cartón (azul), envases lixeiros (amarelo) e vidro, sempre que non se trate de voluminosos, perigosos ou farmacéuticos.

Os responsables municipais lembran que o servizo de recollida de lixo está a funcionar todos os días, agás os domingos e festivos, e reiteran que existe a obriga de pechar hermeticamente as bolsas antes de botalas nos contedores, un xesto que nunca se poderá levar a cabo nas vésperas de domingos e festivos pero si no serán do resto dos días. Quérese así evitar que os colectores se enchan prematuramente ou despidan cheiro que poida molestar aos veciños/as que viven nas proximidades dos mesmos. O Concello tamén aconsella procurar que nas bolsas non vaian líquidos para tratar de reducir a posibilidade de que acaben espallándose e manchando os interiores dos colectores.

O equipo de goberno reitera a necesidade de que Concello e veciñanza colaboren para tratar de mellorar o funcionamento dos servizos públicos, así como o seu compromiso de limpar con máis frecuencia os contedores, especialmente durante os meses de verán.