MEDIO AMBIENTE

Cedeira ofrece aos visitantes Roteiros guiados e gratuítos para que coñezan mellor o municipio

“Descobre Cedeira” é o lema do programa de visitas guiadas que o Concello de Cedeira ofrece a quen queira coñecer mellor un municipio con lugares de interese etnográfico, cultural e paisaxístico.

Roteiro dos Tesouros, Roteiro de Santo André de Teixido e Roteiro da Vila son os nomes que serven para identificar tres percorridos con características moi diferentes. Así, mentres que o primeiro vai do paseo marítimo ao faro da Robaleira, o segundo achega os visitantes á Galicia máis tradicional e salvaxe. O terceiro, pola súa banda, toma como referencia o casco vello da vila para pasear ata a capela de San Antón, o xacemento arqueolóxico do Sarridal e mesmo o castelo da Concepción.

A programación, que deu comezo na primeira quincena de xullo, prolongarase ata o día 17 de setembro. As persoas interesadas deben dirixirse á oficina municipal de Turismo (981 482 187) ou ben mandar un correo electrónico á seguinte dirección: mar.lópez@cedeira.es.

A participación é gratuíta e a dificultade dos desprazamentos -todos a pé- entre baixa e media. As distancias a percorrer oscilan entre os 18 quilómetros (ida e volta a San Andrés) e os 6 ou 7 das outras dúas saídas. Os roteiros comezan ás 10.00 horas.

As saídas do Roteiro dos Tesouros están previstas para os días 28 de xullo, 11 e 25 de agosto e 8 de setembro. Pola súa banda, as que levarán aos viaxeiros ata o santuario de Santo André serán os días 30 de xullo, 6, 13, 20 e 27 de agosto e 3, 10 e 17 de setembro. O Roteiro Vila de Cedeira terá lugar os días 4 e 18 de agosto e 1 e 15 de setembro.

Xa está en marcha o curso do “Xeoparque do Cabo Ortegal, pisando o interior da terra”

Xa deu comezo o curso do “Xeoparque do Cabo Ortegal, pisando o interior da terra” que se desenvolve en Cedeira e a comarca do Ortegal estes días, organizado por AEPECT‐Galicia e o Concello de Cedeira.

Este curso da AEPECT‐Galicia ten por obxectivo principal coñecer un pouco mellor a xeoloxía dun dos lugares con maior interese xeolóxico do continente europeo. É que Cabo Ortegal posúe entre outros hitos xeolóxicos, o maior afloramento de ecloxitas do planeta, unha das máis completas unidades ofiolíticas do mundo, a única praia de area negra non volcánica presente na Terra.Todos estes lugares xunto con outros moitos poderán ser visitados nestas xornadas.

Hoxe martes 21, no Auditorio Municipal de Cedeira haberá unha serie de conferencias plenarias de distintos expertos como apoio e difusión da candidatura de Cabo Ortegal como xeoparque mundial da Unesco. Os relatores desta xornada co‐organizada pola AEPECTGALICIA e o Concello de Cedeira, e abertas ao público en xeral, serán:

‐ 10:30 ‐‐ Presentación das xornadas
‐ 11:00 ‐‐ “Patrimonio xeomorfolóxico de Ferrolterra e Ortegal”. A cargo de Augusto Pérez Alberti
‐ 12:00 ‐‐ Descanso
‐ 12:30 ‐‐ “Geoparque Terra de Cavaleiros, diferenzas e similitudes con Cabo Ortegal”. A cargo de João Alves
‐ 13:30 ‐‐ Pausa para o xantar
‐ 16:30 ‐‐ “Como se gestiona un geoparque, el ejemplo de Las Loras”. A cargo de José Ángel Sánchez
‐ 17:30 ‐‐ “Xeoparque do Cabo Ortegal, pisando o interior da Terra”. A cargo de Francisco Canosa
‐ 19:00 ‐‐ Descanso
‐ 19:30 ‐‐ Mesa redonda
‐ 20:30 ‐‐ Peche da xornada. Despois recepción e entrega das chaves no hotel Herbeira en Cedeira

Mañá mércores e o xoves pola mañá, realizaranse diferentes saídas de campo para coñecer varios dos lugares con maior patrimonio xeolóxico do Cabo Ortegal, dirixidas por Francisco Canosa, e as que participarán os relatores convidados.

O xoves 23 pola tarde haberá dúas actividades opcionais:
‐ Paseo xeolóxico guiado en barco polo litoral entre Cedeira e Cariño (sempre que as condicións marítimas e meteorolóxicas o permitan). No barco só haberá 24 prazas dispoñibles, en quendas de 12 persoas.
‐ Visitas guiadas ao xacemento arqueolóxico de punta Sarridal e ao museo “Mares de Cedeira”.
Ámbalas dúas terán unha duración de 2 horas e 15 min aproximadamente.

Proxecto RELEVO 2020

O proxecto de colaboración RELEVO 2020 é unha iniciativa de carácter formativo promovida polos cinco Grupos de Acción Local do Sector Pesqueiro (GALP) que van de seguido: GALP A Mariña – Ortegal, GALP Golfo Ártabro Norte, GALP Golfo Ártabro Sur, GALP Seo de Fisterra Ría de Muros Noia Costa Sostible e GALP Ría de Arousa. Trátase dun proxecto que busca o relevo xeracional no sector pesqueiro mediante a capacitación de mozos e mozas, a través da formación e mellor coñecemento dos recursos dos territorios.

Descarga Tríptico Proxecto RELEVO 2020

Relevo 2020_Tríptico