MEDIO AMBIENTE

O Concello de Cedeira dotouse do seu Plan Municipal de Prevención e Defensa Contra Incendios Forestais, en cumprimento do establecido na lexislación autonómica. O documento, que onte saiu publicado no BOP e está xa colgado na sede electrónica do Concello, localiza as faixas nas que é obrigado cortar e rozar para xestionar adecuadamente a biomasa e minimizar o risco de lumes. Desde o goberno local destacan que é unha ferramenta útil para os propietarios, que teñen así a seguridade de identificar as zonas que teñen que limpar, e que contribuirá a evitar lumes e coidar mellor do monte, que é patrimonio de todos e todas.

O plan concreta as ditas faixas lineais do territorio que pola súa localización preto de núcleos poboacionais, infraestruturas, equipamentos, zonas edificadas ou parques industriais requiren especial protección ante os incendios. En xeral, nestas parcelas non poden ter presencia o piñeiro, a mimosa, a acacia, o eucalipto, a xesta, o fento, as silvas ou o toxo, entre outras especies.

No mesmo documento, que pasa a integrar o Plan de Emerxencias do Concello de Cedeira, faise unha análise da situación, indicando que o municipio ten un risco potencial de incendios alto. Entre 2008 e o 2020 rexistráronse na localidade unha media anual de 5,33 incendios que queimaron, tamén de media, a 10,6 hectáreas. O ano 2012 foi o de maior número de lumes e máis superficie arrasada e a parroquia de Cervo a que máis incendios sufriu nese periodo.

Ao fío da publicación do Plan de Prevención de Incendios Forestais cómpre recordar que o Concello conta tamén co seu inventario de camiños municipais, que está colgado na web e no que é posible e doada a procura por referencia catastral dos terreos.

Para consultar o plan:
https://sede.cedeira.gal/sxc/export/sites/cedeira/recursos/downloads/Tablon/2023/ANUNCIO_PROG_20230915113027058_ANEXO_1694770227-1.pdf

A compostaxe doméstica é unha iniciativa destinada a aquelas persoas residentes en vivendas que dispoñan dunha pequena zona verde (campo, horta ou xardín). É unha forma limpa e sinxela de xestionar os residuos orgánicos (restos de comida, xardinería e horta) xerados nos fogares.

Compostar no só reduce a cantidade de residuos que poderían acabar en vertedoiros, tamén xera compost, un abono natural de alta calidade que mellora a fertilidade dos solos sen ter que recurrir a fertilizantes sintéticos.

O concello , coa intención de dar continuidade ao seu programa de compostaxe doméstica, ten en previsión unha nova entrega de composteiros nos vindeiros meses. O que permitirá a incorporación de novos participantes a un proxecto no que xa están implicadas máis de 200 familias de Cedeira.

Quen desexe informarse e/ou solicitar a participación neste programa, pode acudir á xornada de sensibilización que terá lugar o vindeiro venres 15 de setembro, no local da AVV de Régoa, de 17h a 20h. Trátase dunha actividade aberta a toda a veciñanza de Cedeira, polo que poden acudir persoas de tódalas parroquias, non só de Régoa.

Tamén é posible solicitar a adquisición dun composteiro de xeito presencial no rexistro municipal; ou ben a través da sede electrónica, empregando o modelo de solicitude dispoñiible na páxina web do concello.

DESCARGA PDF MODELO SOLICITUDE DE COMPOSTEIRO

Dende o concello quérese lembrar que, Cedeira conta con canalizacións para a recollida diferenciada da auga de escorregamento pluvial. Deste xeito , a auga procedente da choiva, circula pola rede de pluviais sen recibir ningún tratamento, para acabar desembocando directamente no río e na ría.

Por este motivo, débense evitar xestos nocivos co medio ambiente como verter aos sumidoiros as augas de fregar, ou tirar cabichas e lixo no chan, que acabarán sendo arrastradas aos sumidoiros, producindo taponamentos na rede e efectos negativos sobre a vida mariña.

Todos e todas podemos contribuír á mellora da calidade das augas, facendo un uso responsable dos sumidoiros.