DEPORTES

MEDALLAS NACIONAIS EN REMOERGÓMETRO PARA MALENA BARRO E IVÁN SEDES

Os clubs da comarca cultivaron dous metais e un cuarto posto no Campionato de España de remoergómetro, que se celebrou este sábado en Ribadumia. Malena Barro (San Felipe) e Iván Sedes (Cedeira) foron bronce e prata, mentres Raúl López (Cedeira) rozou o podio.

Barro, un diamante en bruto, sobresaíu entre as 35 competidoras da categoría cadete. Superou por case dous segundos á seguinte clasificada e subiu ao terceiro caixón coa bandeira do seu club. Na mesma proba, Noa Trigo (Cedeira) acabou novena.

Na mesma franxa de idade, pero no apartado masculino, a López sobráronlle dúas escasas centésimas para meterse no podio, mentres Borja Souto (Ares) concluíu sétimo. Pola súa banda, Sedes quedou a só 4 centésimas do ouro en adaptado intelectual, na que participaron sete deportistas. Colgouse unha prezada prata.

Noutras categorías con representación local, Joaquín Montero (Cedeira) acabou noveno en absoluto; Pablo Vázquez e Álvaro Barros, ambos os do San Felipe, foron 11.º e 16.º en xuvenil; e Marcos Pena, 22.º en peso lixeiro.

Castrelo de Miño acolle este domingo o Nacional de longa distancia con 19 remeiros de clubs da comarca.

Fonte: La Voz de Galicia

Pode consultar a nova na seguinte ligazón:

IR Á LIGAZÓN Medallas nacionais en remoergómetro para Malena Varro e Iván Sedes

CAMPAÑA DE INVERNO 2018

Campaña de inverno para rapaces e rapazas nados nos anos 2003, 2004, 2005, 2006, e 2007. Os participantes gozarán de catro días na estación invernal de Cabeza de Manzaneda, ademais dos cursiños de esquí.

Datas: do 16/02/2018 ó 19/02/2018

Aberto prazo de preinscrición no rexistro do concello de Cedeira ata o 16 de xaneiro. As solicitudes están a disposición dos usuarios no rexistro do concello e na oficina do polideportivo. No caso de realizar a preinscrición a través da sede electrónica do concello, cubrirase unha instancia xeral solicitando a inscrición na “Campaña de inverno 2018” e incluíndo o nome do neno/a.

IMPORTANTE: Terán preferencia os/as rapaces/zas que non foran a ningunha campaña da neve da Deputación. No suposto de ter máis solicitudes que número de prazas concedidas pola Deputación, realizarase un sorteo público ante a Secretaria do concello para adxudicar as mesmas.

DATOS XERAIS

Número de prazas: 4

COTA DE INSCRICIÓN: No transcurso da inscrición será facilitado pola Deputación un número de conta onde se aboará a cota de 85,00 € (oitenta e cinco euros), facendo constar o nome do/a neno/a, concello e CAMPAÑA DE INVERNO 2018.

INCLÚE: Transporte, estadía e manutención na estación invernal de Cabeza de Manzaneda, monitores, clases de esquí, seguros, alugamento de material, remontes mecánicos.

LUGAR: Cabeza de Manzaneda (Ourense)

ALOXAMENTOS: Estación Invernal de Cabeza de Manzaneda.

DURACIÓN: de venres a luns, entrada o venres pola mañá, e saída o luns despois da comida.

Correo electrónico: gabinete.deportes@dacoruna.gal

Páxina web: www.dicoruna.es/deportes/actividades