Skip to content Skip to left sidebar Skip to footer

DEPORTES

Campaña de Inverno 2018 – Deputación Provincial da Coruña

CAMPAÑA DE INVERNO 2018

Campaña de inverno para rapaces e rapazas nados nos anos 2003, 2004, 2005, 2006, e 2007. Os participantes gozarán de catro días na estación invernal de Cabeza de Manzaneda, ademais dos cursiños de esquí.

Datas: do 16/02/2018 ó 19/02/2018

Aberto prazo de preinscrición no rexistro do concello de Cedeira ata o 16 de xaneiro. As solicitudes están a disposición dos usuarios no rexistro do concello e na oficina do polideportivo. No caso de realizar a preinscrición a través da sede electrónica do concello, cubrirase unha instancia xeral solicitando a inscrición na “Campaña de inverno 2018” e incluíndo o nome do neno/a.

IMPORTANTE: Terán preferencia os/as rapaces/zas que non foran a ningunha campaña da neve da Deputación. No suposto de ter máis solicitudes que número de prazas concedidas pola Deputación, realizarase un sorteo público ante a Secretaria do concello para adxudicar as mesmas.

DATOS XERAIS

Número de prazas: 4

COTA DE INSCRICIÓN: No transcurso da inscrición será facilitado pola Deputación un número de conta onde se aboará a cota de 85,00 € (oitenta e cinco euros), facendo constar o nome do/a neno/a, concello e CAMPAÑA DE INVERNO 2018.

INCLÚE: Transporte, estadía e manutención na estación invernal de Cabeza de Manzaneda, monitores, clases de esquí, seguros, alugamento de material, remontes mecánicos.

LUGAR: Cabeza de Manzaneda (Ourense)

ALOXAMENTOS: Estación Invernal de Cabeza de Manzaneda.

DURACIÓN: de venres a luns, entrada o venres pola mañá, e saída o luns despois da comida.

Correo electrónico: gabinete.deportes@dacoruna.gal

Páxina web: www.dicoruna.es/deportes/actividades

Comeza a construción da pista de pumptrack na zona da estación de autobuses da vila de Cedeira

COMEZA A CONSTRUCIÓN DA PISTA DE PUMPTRACK NA ZONA DA ESTACIÓN DE AUTOBUSES DA VILA DE CEDEIRA

Desde esta semana xa son visibles as obras de construción da pista de pumptrack que o Concello de Cedeira está a executar na zona da estación de autobuses. Trátase dunha intervención para que a rapazada local teña a posibilidade de practicar deportes alternativos como poden ser o skate, patíns en liña, longboard e mesmo bicicleta, segundo se pon de manifesto desde o equipo de goberno.

O proxecto, pensado para todas as idades e niveis de aprendizaxe, foi contratado á empresa Galitec Desarrollos Tecnológicos SL por importe de 65.712 euros. O prazo de execución é dun mes.

As dimensións da pista serán de 40 por 22 metros. É unha superficie suficiente para acoller tres rectas de diferentes perfís e catro curvas con peralte tanto á esquerda como á dereita. Haberá un único sentido de marcha para evitar posibles accidentes.

A iluminación será a existente na zona e tamén está prevista a instalación dun peche perimetral para determinar o espazo de xogo. A utilización dun asfaltado en quente para acondicionar a pista garante a máxima seguridade dun circuíto que tamén estará sinalizado.

O Concello pinta as paredes e o chan do pavillón do colexio Nicolás del Río

O CONCELLO PINTA AS PAREDES E O CHAN DO PAVILLÓN DO COLEXIO NICOLÁS DEL RÍO

O Concello de Cedeira volve colaborar coa dirección do colexio Nicolás del Río para manter en bo uso o centro. Só un mes despois da entrada en funcionamento do parque infantil e máis das medidas de seguridade para evitar a saída dos alumnos á estrada, o equipo de goberno dá agora por finalizados os traballos de pintura acometidos no pavillón do Nicolás del Río.

O proxecto consistiu no pintado das paredes e mesmo tamén da pista polideportiva, dadas as malas condicións que presentaban. A obra, que correu a cargo do persoal laboral do Concello, deu lugar ao pintado dunha superficie duns 600 metros cadrados, entre paredes e chan. O investimento ascendeu a uns 2.000 euros.

Con esta intervención, e á espera de que Educación poña data á reunión con Indalecio Cabana -xefe territorial da Consellería- para seguir falando do cambio das fiestras que necesita o centro executivo cedeirense dá por concluídas por este ano as melloras acometidas no colexio ao longo dos últimos meses. O goberno confía agora en que a Xunta continúe coa substitución das fiestras situadas na fachada que dá á praia.