CÁNDIDO PAZÓ BOTARÁ A LINGUA A PASTAR ESTE SÁBADO NO LOCAL SOCIAL DE SAN ROMÁN

O local social da Asociación de Veciños de San Román vai acoller este sábado o último espectáculo do ciclo Cantos e Contos ao Solpor. Correrá a cargo do vigués Cándido Pazó, un prolífico autor, actor e narrador oral que traerá a Cedeira a función titulada Botando a lingua a pastar. A cita será ás 19.00 horas.

Neste espectáculo, Cándido Pazó mestura contos da tradición oral con historias de creación propia, salpicando o seu monólogo con comentarios sobre a lingua galega, sempre desde o humor e a empatía, mecanismos de conexión co público.

É o terceiro e último dos espectáculos do ciclo Cantos e Contos ao Solpor, un programa xa tradicional no final do verán cedeirés.