SERVICIOS SOCIAIS

O Concello financia a compra da plataforma elevadora para a furgoneta da Asociación Sobre Rodas

O CONCELLO FINANCIA A COMPRA DA PLATAFORMA ELEVADORA PARA A FURGONETA DA ASOCIACIÓN SOBRE RODAS

O Concello de Cedeira recoñece o labor que a Asociación Sobre Rodas está a facer, dándolles visibilidade e prestándolles axuda ás persoas con discapacidade, colaborando economicamente na adaptación do vehículo adquirido pola entidade este mesmo ano.

O equipo de goberno asegura estar moi contento co traballo que fai a asociación no ámbito local e destacou de maneira moi especial o que realizan os voluntarios, entre os que se atopan os condutores do transporte adaptado. A pesar de todo, os recursos da entidade son bastante limitados, segundo apuntan os responsables municipais.

A corporación municipal aprobaba na última sesión plenaria por unanimidade unha subvención, por importe de 5.131 euros, para a compra da estrutura elevadora que habilitará a furgoneta para o transporte de persoas en cadeira de rodas.

O importe da axuda concedida garante o financiamento da plataforma que, segundo a presidenta da entidade, Malena Pérez Villar, podería entrar en funcionamento nun prazo de quince días. Este servizo aumentará considerablemente os usuarios do vehículo adaptado, cuxo número de viaxes pode ser de máis de cen ao cabo dun mes. Pérez Villar agradeceu ao Concello a sensibilidade que está a mostrar coa xente con mobilidade reducida e recordou así mesmo que o traballo que desde o Concello se está a facer no campo da accesibilidade nas beirarrúas tamén é moi importante para mellorar o día a día das persoas con problemas de mobilidade. A entidade Sobre Rodas ten arredor de 490 socios.

Cedeira firma un convenio coa ANPA do IES Punta Candieira para estimular a dinamizacion cultural e laboral da xuventude

CEDEIRA FIRMA UN CONVENIO COA ANPA DO IES PUNTA CANDIEIRA PARA ESTIMULAR A DINAMIZACION CULTURAL E LABORAL DA XUVENTUDE

O Concello de Cedeira vén de firmar un convenio de colaboración coa ANPA O Beco do IES Punta Candieira que se levará á práctica ao longo do próximo ano e cuxo importe ronda os 10.000 euros.

A firma do acordo reunía o pasado xoves nas dependencias municipais á presidente da entidade escolar, Beatriz Piñón García e máis ao alcalde, Pablo Moreda Gil, e a concelleira de Cultura, María Xosé Rodríguez Pérez.

Despois de varias reunións nas que tamén estiveron presentes a concelleira de Servizos Sociais, Manuela López Rodríguez, e o concelleiro de Educación, Robustiano Labrana Barrero, -ademais do equipo directivo da ANPA O Beco- este presentoulle aos representantes municipais unha memoria detallada e orzamentada para o desenvolvemento dun Plan de Acción para o 2018.

Os obxectivos deste proxecto son estimular a dinamización cultural e laboral da xuventude, así como promover a súa integración na sociedade a través de accións lúdicas e formativas a desenvolver por medio dos seguintes programas: préstamo de libros, Voz Natura, Falamos con.., Aventúrate na creatividade, TAX (traballo Agrícola Xuvenil), Información, Promoción Sociolaboral, Promoción da Igualdade, Cinema Xuvenil e Mellora do equipamento local.

O Plan de Acción proposto pola ANPA O Beco é unha iniciativa moi ambiciosa e para o seu desenvolvemento é fundamental a colaboración económica do Concello de Cedeira. Os representantes do goberno local consideran “moi importante o labor de todas as asociacións do municipio, auténticas dinamizadoras socioculturais e agradecen neste caso á ANPA do IES Punta Candieira o seu esforzo e compromiso para levar adiante este Plan de Acción Social”.

O programa no que máis revertirá a aportación municipal será no de Promoción Sociolaboral, no que se inclúen unha serie de cursos de distinta temática entre os que destacan: Atención sociosanitaria a persoas dependentes en institucións ou Carretillas elevadoras, taspaletas e apiladores eléctricos. O prazo de matrícula abrirase o próximo mes.

Todas as persoas interesadas en participar en calquera das distintas accións formativas que ofrece a ANPA O Beco poden achegarse á oficina da mesma no IES Punta Candieira en horario de catro a seis da tarde.

Aberto o prazo para solicitudes do programa de termalismo social IMSERSO

ABERTO O PRAZO PARA SOLICITUDES DO PROGRAMA DE TERMALISMO SOCIAL IMSERSO

O Concello de Cedeira informa de que xa está aberto o prazo para solicitar praza no programa de termalismo do IMSERSO para 2018.

Os prazos son os seguintes:

Para as quendas dos meses de febreiro a agosto, ambos inclusive: ata o día 4 de xaneiro de 2018.
Para as quendas dos meses de setembro a decembro: ata o día 11 de maio de 2018.

Inclusión na lista de espera, para cubrir as prazas que vaian quedando vacantes por renuncias ou outras circunstancias:

Para as quendas dos meses de febreiro a agosto, ambos inclusive: ata o día 10 de maio de 2018.
Para as quendas dos meses de setembro a decembro: ata o día 31 de outubro de 2018.

Para máis información, pode achegarse ata as oficinas dos Servizos Sociais municipais ou consultar a páxina web do IMSERSO na seguinte ligazón:

IR Á LIGAZÓN Web do IMSERSO