Skip to content Skip to left sidebar Skip to footer

SERVIZOS

O GOBERNO LOCAL CELEBRA QUE COMECEN AS OBRAS DE MELLORA DA ESTRADA AC-566

A Consellería de Infraestruturas e Mobilidade informou onte do comezo das obras na AC-566, unha intervención que vai consistir na redefinición do seu trazado ao longo de 4km. O alcalde de Cedeira, Pablo Diego Moreda Gil, celebra que por fin estea en marcha esta actuación, longamente demandada pola administración local e a cidadanía de Cedeira.

As obras foron adxudicadas en setembro pasado á empresa López Cao por 3,6 millóns de euros e van servir para rectificar as curvas máis perigosas e dotar dun terceiro carril á estrada nalgúns tramos, de xeito que mellorará sensiblemente a seguridade vial e se recortará o tempo de viaxe nun 30%.

Moreda Gil recorda que durante máis dunha década os sucesivos gobernos municipais e a veciñanza de Cedeira reclamaron esta intervención, xunto co Concello de Valdoviño, e que foi en 2015 cando comezaron as reunións coa Xunta. O alcalde subliñou que unha mellor conexión de Cedeira por estrada contribuirá á dinamización económica da vila.

MOCIÓN PARA RECLAMAR A CUBRICIÓN E ADECUACIÓN DO PATIO DO AREAL, NO COLEXIO NICOLÁS DO RÍO

O alcalde de Cedeira, Pablo Diego Moreda Gil, informou de que o grupo de goberno vai presentar unha moción, para o seu debate na próxima sesión do pleno da corporación, na que se instará á Xunta de Galicia a construír unha cuberta e mellorar o pavimento do patio das aulas do Areal, no CEIP Nicolás do Río. “Levamos varios meses en conversas coa dirección do centro para coñecer as melloras que precisa o centro e esta é unha necesidade que se convertiu en prioridade coa pandemia”, explicou Moreda.

A moción que está a preparar o goberno local, para a que o alcalde confía en ter o apoio unánime do pleno, vai dirixida a solicitar da Xunta a instalación dunha cuberta no patio das aulas do Areal, nas que están as clases de 5º e 6º de Primaria, así como a renovación do pavimento. Segundo explicou o alcalde, a intervención debería ir ligada á creación dun espazo para fomentar os xogos inclusivos e en igualdade, alonxado daqueles ocupados exclusivamente por unha cancha de baloncesto ou de fútbol.

“Os nenos e nenas, e o profesorado, están a facer un grande esforzo durante este curso para manter as medidas de distanciamento, as burbullas… e o feito é que os días que chove non hai espazos cubertos abondo fóra das aulas e algúns grupos teñen que quedar dentro”, explicou o alcalde. “O Concello, a administración que está máis pegada á realidade da comunidade educativa, vaille trasladar esta necesidade á Consellería de Educación, que é a que ten as competencias da creación e mellora das infraestruturas”, dixo Moreda Gil.

UNANIMIDADE DO PLENO DE CEDEIRA A FAVOR DA PROPOSTA DO POS 2021, QUE SUMA PRETO DE 615.000€

Os grupos políticos no Concello aprobaron por unanimidade as propostas para a participación de Cedeira no Plan Único de Concellos da Deputación da Coruña (POS+2021 e POS+Adicional 2021). En total, o municipio contará con 614.877,16€ procedentes deste programa provincial, dos que 223.539,71€ son para gastos correntes, 53.223,74€ corresponden ao Plan de Aforro e Investimento, uns 202.635,09€ se destinarán a investimentos e unha partida de 135.478€, correspondente ao POS+Adicional, empregarase integramente no financiamento dos gastos sociais.

No capítulo de investimentos, o POS+2021 contempla a realización de tres proxectos cuxo importe suma 238.603€ -aos 202.635,71€ da achega provincial sumará o Concello de Cedeira outros 35.428,31€-. Trátase da “Rehabilitación estrutural do pavimento do anel vermello da Praza Roxa”, valorado en 112.249€; de “Actuacións urxentes de consolidación e reparación da cuberta nos escolares de Saa e Sisalde Maior”, orzamentadas con 74.163€ e da “Conservación do firme da Avenida España e o Camiño Pitilleira”, actuación valorada en 51.649,84€. E tamén dentro do POS+2021 está unha achega de 223.539€ que se destinará a gastos correntes do Concello de Cedeira.

O alcalde de Cedeira, Pablo Diego Moreda Gil, destacou a especial importancia de contar neste momento co POS+Adicional 2021 para financiar os gastos sociais extraordinarios que xerou a pandemia. O Concello contará con 135.478€ do plan provincial para afrontar o reforzo de persoal nesta área e darlle cobertura, cos servizos municipais, ao maior número de persoas que están en situación de vulnerabilidade como consecuencia da crise sanitaria, así como para axudar ás familias cos gastos que conleva o acceso a medios dixitais necesarios para a escolarización, con medidas de conciliación e coa adquisición de medios de prevención da covid.

Xunto cos investimentos referidos, tamén inclúe o goberno local neste marco do Plan Único de Concellos e concretamente no apartado do Plan Complementario, outros dous proxectos que suman 319.896€ e que se executarán con cargo ás baixas das licitacións. Un deles servirá para a mellora das beirarrúas na Avenida España, as rúas Ponte Nova, José Pascual López Cor e Salinas e o Camiño Pitilleira, cun orzamento de 219.932€. O outro é a ampliación do saneamento nas Pontigas, valorado en 99.963€.