PARTICIPACION

PROXECTO PESCATURACCIÓN

O proxecto Pescaturacción segue a traballar no impulso do desenvolvemento dos sectores da pesca e do turismo de Cedeira.

A participación dos integrantes destes sectores é un dos piares fundamentais do proxecto, e por iso o seguinte paso a dar é a celebración das reunións dos grupos de traballo.

O primeiro que vai ter lugar é o Grupo de Traballo do Sector da Pesca, na tarde do próximo luns día 12 de abril. Están convocadas a participar algunhas das entidades máis relevantes do sector no territorio, co obxectivo de validar aspectos detectados na primeira fase do proxecto, e de identificar os retos máis prioritarios a solucionar.

Pertences ao sector da pesca e estás interesado en asistir? Se non recibiches a información, ponte en contacto co teléfono 621.256.391.

Seguimos a construír Cedeira entre todos e todas!

O CONCELLO DE CEDEIRA COMPROMÉTESE COA CONTINUIDADE DOS ORZAMENTOS PARTICIPATIVOS EN COLABORACIÓN CO IES PUNTA CANDIEIRA

Apoio unánime do pleno municipal de Cedeira á proposta de orzamentos participativos que esta mañá presentaron os representantes de 4º da ESO do IES Punta Candieira, como culminación ao proceso no que traballaron desde novembro pasado. Un parque de calistenia e un ciclo de autocine serán os proxectos que se executarán co presuposto de 20.000€ reservado nas contas deste ano. O alcalde, Pablo Diego Moreda Gil, destacou que a experiencia tivo una excelente acollida e que se desenvolveu cun enriquecedor diálogo e colaboración entre o alumnado e o Concello, ao tempo que comprometeu a continuidade, para que cada ano os mozos e mozas do Punta Candieira pechen a etapa de Secundaria participando nesta “escola de cidadanía”.

Nunha sesión plenaria que parte da corporación seguiu telematicamente, o grupo do BNG trasladou a través do alcalde, por non poder asistir, o seu voto a favor e felicitacións ao alumnado polo traballo realizado. Na mesma liña, o PP deu os seus parabéns á comunidade educativa e ao goberno local, desde o que a concelleira Carmela Prieto, que coordinou o proxecto, tamén quixo recoñecer a dedicación dos estudantes, mesmo en tempo de exames e coas dificultades que impuxo a pandemia, así como a dinámica construtiva que seguiron, tendo en conta as fortalezas do territorio e os equipamentos xa existentes para deseñar as propostas máis acaídas.

Tal como se informou recentemente, o parque de calistenia e un programa de autocine foron os proxectos máis votados na asemblea que os 66 alumnos de 4º de ESO do IES Punta Candieira celebraron o pasado día 9, en diferentes grupos para manter as medidas de prevención da covid. Elixiron entre as 11 propostas que agromaron e foron seleccionadas ao longo do proceso iniciado en novembro pasado, no que cada unha delas foi previamente informada favorablemente polos técnicos municipais para garantir que á votación chegaran proxectos realizables tanto por custes como pola normativa vixente.

Representantes dos tres grupos de 4º de ESO -Gabriela F. Paixâo Carvalhal Antunes, Hector Garrote Ramos, Bruno López Torres, Julián Breijo Aneiros, Helena Casás Crego e Cosme García Pérez – interviron no pleno desta mañá para explicar como foi o proceso e destacar que aprenderon o funcionamento do Concello, a súa estrutura, os servizos municipais, as posibilidades reais de acometer certos proxectos… e destacaron que tiveron unha interlocución directa e áxil co goberno e o persoal municipal á hora de solicitar información ou consultar determinadas cousas. Así, por exemplo, ese diálogo permitiu desbotar iniciativas cun custe alto de mantemento, en favor doutras máis sustentables, ou evitar outras que o Concello xa ten previsto acometer. Defenderon, a continuación, a oportunidade de facer un parque de calistenia, unha instalación que fomentará unha vida saudable, e de organizar as sesións de autocine, unha alternativa de ocio óptima en tempo de pandemia e que pode realizarse en diferentes lugares da vila.

Tras superar o último trámite coa aprobación do pleno, o alumnado seguirá vencellado aos proxectos que impulsou, colaborando co persoal municipal para estudar os modelos de barras para o parque de calistenia e os lugares de ubicación, así como na elección das películas, calendario e lugar das sesións do autocine.

UN PARQUE DE CALISTENIA E UN CICLO DE AUTOCINE, PROXECTOS ELIXIDOS NOS ORZAMENTOS PARTICIPATIVOS

O parque de calistenia e un programa de autocine serán os dous proxectos que se fagan realidade en Cedeira con cargo aos primeiro presupostos participativos do Concello, segundo a decisión que tomou o pasado martes en asemblea o alumnado de 4º de ESO do IES Punta Candieira, protagonista do proceso que se abriu o pasado mes de novembro. O alcalde de Cedeira, Pablo Diego Moreda Gil, recordou que están reservados 20.000€ no orzamento municipal deste ano 2021 para executar os proxectos elixidos finalmente e felicitou aos mozos e mozas que participaron nesta experiencia “polo entusiasmo, interese e madurez demostrada ao longo do proceso, no que coñeceron o traballo da administración municipal, a organización das áreas de xestión, os órganos de goberno, e asumiron un papel activo e directo sobre a decisión do destino de recursos públicos”.

O sistema de votación foi por puntos, tendo un total de 3 puntos a repartir entre as 11 propostas viables que se presentaban na asemblea. Participou un total de 66 alumnos e alumnas de forma presencial, dende as súas aulas, sen ter que recorrer ao voto por e-correo, por non darse faltas de asistencia no día de hoxe. Os puntos a repartir en total eran 198 e o montante global sobre o que se decidía chegaba a 152.500 €.

Durante a exposición das iniciativas que entraron na votación, destacáronse aspectos ligados ao fomento da vida saudable (calistenia, bike park, rutas), valorización das artes escénicas (festival de arte galega, local de ensaio), da memoria colectiva e o patrimonio (miradoiro, sendas polo río) ou cuestións solidarias, como a vivenda para as persoas sen fogar ou o programa de acompañamento social de maiores. Tamén estivo presente carácter de aforro á hora de realizar deporte en espazos públicos, ou a situación da pandemia, para poder programar un auto-cine ao aire libre, compatible con vehículos particulares e con cadeiras para aquelas persoas que se despracen a pé ou non dispoñan de coche particular.

Logo de realizar unha defensa dende cada unha das aulas, e de cada unha das propostas, o resultado da votación foi o seguinte:

As iniciativas que tiveron un maior apoio foron as de Calistenia (43 puntos), Autocine (31 puntos), Karts (26 puntos), Local de Ensaio Musical (20 puntos) e Bike Park (con 19 puntos). As que se poderán executar son as dúas primeiras (Calistenia e Auto-cine), que suman un montante de 12.500 €, pois coa terceira proposta xa excedería dos 20.000 €.

Para completar o orzamento, dos 12.500 € ate os 20.000 € comprometidos, deuse un debate e posterior votación, ante dúas alternativas posibles, a opción A de facer varias sesións de Autocine ate completar a contía dispoñible ou ben, na opción B, incluír a seguinte proposta que, por orzamento de gasto, puidese ser executada, que podería ser a instalación dun parque canino, orzamentada en 7.000 €. Esta iniciativa non prosperou, dado que non contaba xa, na propia asemblea, con moitos apoios. O alumnado decantouse, finalmente, por incrementar o número de sesións de cine, quedando aprobadas as dúas primeiras propostas.

O persoal técnico municipal, que foi quen informou dos custes e normativas aplicables das propostas antes da asemblea, comezará agora a perfilar as propostas aprobadas en colaboración co alumnado do centro educativo. Así, determinarase o emprazamento exacto para a adquisición do parque de barras, o tipo de instalación, ou a programación de cine, lugares apropiados, tipo de películas e temáticas, accións complementarias, etc.

O alumnado, ao finalizar a asemblea, amosou unha gran motivación sobre esta nova fase de deseño das programacións e manifestou que o proceso lle serviu para tomar conciencia das dificultades de decidir sobre aspectos de interese xeral para a cidadanía.

O seguinte paso será o de preparar a intervención na sesión do Pleno Municipal, na que o alumnado presentará o proceso que iniciaba no mes de novembro, con debates nas aulas e un traballo de investigación social sobre as necesidades do territorio, buscando información sobre as iniciativas formuladas. Esta sesión extraordinaria terá lugar durante este mes de marzo.