NOVAS

PASOS CARA Á CREACIÓN DA SECCIÓN DA ASOCIACIÓN CULTURAL MEMORIA HISTÓRICA DEMOCRÁTICA

A veciñanza de Cedeira da un paso máis cara ao coñecemento da súa historia máis recente coa iniciativa de crear dunha sección local da Asociación Cultural Memoria Histórica Democrática. O primeiro encontro tivo lugar o pasado sábado e a intención dos seus promotores é a celebración dun segundo, que se prevé para próximas datas e do que xa sairán as primeiras mesas de traballo.

A idea é afondar na recuperación da memoria da veciñanza represaliada e investigar así mesmo sobre outros acontecementos e protagonistas da historia social da vila, “para consolidar a súa lembranza e transmitila, sobre todo, ás novas xeneracións”. Por estes motivos, demándase a colaboración dos veciños e veciñas, tanto á hora de asistir á próxima reunión como á de achegar fotografías, testemuños e documentos cos que se poida recuperar a memoria colectiva de Cedeira.

CEDEIRA CELEBRA A FESTIVIDADE DE SAN ANTONIO CON CHURRASCO, MÚSICA E MOITA FESTA

A vila de Cedeira celebra os días 12 e 13 de xuño a festividade de San Antonio de Corveiro cun programa cheo de citas musicais e tradicións.

O calendario arrancará ás 19.30 horas do mércores 12 coa celebración dunha churrascada á que os gaiteiros da Asociación Cultural Buxainas porán a nota musical. Esta primeira xornada festiva rematará coa verbena na que, a partir das 20.30 horas, actuarán os compoñentes da orquestra New York.

Ao día seguinte -xornada festiva a todos os efectos no municipio de Cedeira- haberá misa solemne ás 13.00 horas, e procesión a continuación. A música correrá a cargo da agrupación Buxainas e non faltará a tradicional poxa dos roscóns e o sorteo do perico cos que a organización prevé reunir a maior parte do diñeiro investido nos actos festivos.

A orquestra Galilea amenizará a sesión vermú e tamén actuará, a partir das 20.30 horas, na verbena coa que veciños e visitantes despediranse da primeira romaría do ano. A seguinte será o día 17 de agosto no marco das festas da Virxe.