O Concello de Cedeira incrementa este ano sustancialmente a contía dos premios do concurso de Entroido, ata sumar 5.590€ que se repartirán nas categorías de comparsa, grupo, parella ou individual, ás que se engade este ano por primeira vez a de asociación ou centro educativo. A maiores, as modalidades que abranguen a participación de máis de tres persoas poden sumar tamén o de “carroza”, para aqueles que leven un carro, plataforma… algún elemento móbil en relación coa temática do disfraz. A inscrición está aberta ata o vindeiro 8 de febreiro e o desfile será o día 10.
Segundo establecen as bases, que están xa colgadas no taboleiro de anuncios da sede electrónica do Concello, as modalidades de participación no concurso de disfraces son as seguintes:
-Comparsa: para conxuntos cun mínimo de dez persoas, entre os que se repartirán tres premios dotados con 1.200, 1.000 e 800€.
-Grupos: entre 3 e 9 integrantes e tres premios de 600, 400 e 300€.
-Asociacións ou centros educativos: esta categoría existe por primeira vez este ano, para conxuntos con máis de dez compoñentes ligados a unha entidade do municipio. Neste caso haberá un único premio de 300€.
-Parella: nesta categoría fallaranse tres premios de 200, 150 e 100€.
-Individual: haberá tres premios de 100, 80 e 60€.
-Carrozas: esta é unha categoría nova, dotada cun premio de 300€, que pode complementar aos premios das categorías anteriores e que valorará o uso dun carro, ou plataforma ou elemento móbil en relación coa temática do disfrace.
A inscrición deberá facerse cubrindo a solicitude -anexa ás bases- e presentándoa no Rexistro Municipal antes das 14.00h do día 8 de febreiro, actuando unha persoa como representante no caso das participacións colectivas. Os menores que concurran nas categorías de parellas ou individuais tamén deberán contar co permiso do representante legal.
O desfile de disfraces celebrarase o 10 de febreiro. A estación de autobuses será o punto de reunión, ás 17.30h, e desde alí desenvolverase un percorrido polo casco urbano que rematará na praza Roxa, na que os grupos poderán ir facendo os seus bailes ou cantando para obter mellor puntuación. O xurado valorará, no caso das categorías de comparsa, grupos e asociacións, o vestiario, maquillaxe, traballo feito a man, emprego de materiais de refugallo, orixinalidade, uso de carroza ou similares, a coreografía (letras e música empregadas), a simpatía e o número de participantes. En parellas e individuais se terán en conta todas elas agás a carroza e a coreografía, e as carrozas terán unha puntuación aparte, para o fallo do seu premio, segundo o traballo feito a man, o uso de materiais de refugallo, a orixinalidade, o uso que se faga dela no desfile e a súa estrutura.
O fallo do xurado darase a coñecer na verbena que o Concello programará a continuación do desfile na praza Roxa. Desde o goberno local faise un chamamento á participación no desfile de disfraces, unha ocasión para gozar do bo humor e de impulsar unha tradición de sempre.
O desfile de disfraces abrirá o programa de Entroido en Cedeira, con diferentes actividades ata o día 14.
Pódese descargar as bases do concurso na seguinte ligazón:
Descarga PDF Bases concurso entroido 2024
