NOVAS

O Concello de Cedeira promove este verán un programa de visitas guiadas gratuítas polo núcleo de Santo André, por un lado, e pola vida e as tradicións mariñeiras da vila, por outro. Este próximo sábado 29 ponse en marcha un calendario de 23 visitas de aquí a setembro, 11 pola Cedeira mariñeira e 12 polo núcleo de Teixido, que correrá a cargo de Sergio Muíño, impulsor dos proxectos de desenvolvemento local e turístico Eu fun de vivo e Destino Cedeira.

O programa inaugúrase este sábado 29, ás 11.00h, coa visita guiada “Cedeira e o mar”. O punto de encontro será o Palacete Municipal, onde está a oficina de turismo, e o percorrido prolongarase durante preto de dúas horas, nas que os participantes coñecerán o patrimonio mariñeiro da localidade, tanto o actual como o que xa non se pode ver, como as antigas fábricas de salazón, o vello malecón ou o secadeiro de redes.

As visitas “Cedeira e o mar” serán, ademais deste sábado, os días 7, 12, 21 e 28 de xullo; 4, 11, 13, 15 e 16 de agosto e 15 de setembro, sempre ás 11.00 e con saída desde o Palacete.

O sábado 6 de xullo será a primeira visita a Santo André, na que o punto de encontro será a marquesiña do autobús, á entrada ao núcleo de Teixido, tamén ás 11.00 horas. O percorrido durará unha hora e durante o mesmo falarase da historia, as tradicións e lendas ligadas a este singular lugar, así como da vida da xente e a organización do territorio e sobre curiosidades da contorna.

Neste caso, as visitas a Santo André de Teixido serán os días 6, 13, 20 e 27 de xullo; 3, 10, 12, 14 e 18 de agosto, e 14, 22 e 29 de setembro.

As persoas interesadas deberán inscribirse en cada unha das visitas durante a semana anterior a cada unha, ben a través do formulario online habilitado –ao que se pode acceder desde o QR dos carteis- ou ben enviando unha mensaxe por Whatsapp ao número 660 05 83 48. O calendario pode estar suxeto a cambios, dos que se informará a través da web do Concello e a canle de difusión por Whatsapp Cedeira Informa, así como nas redes sociais de Eu fun de vivo e Destino Cedeira.
inscricións: https://forms.gle/8eFZzF9maVUAKxsK9

Cedeira acollerá nos vindeiros meses de xullo e agosto catro veladas científicas e culturais nas que persoas vencelladas de diferentes maneiras á localidade ofrecerán charlas divulgativas sobre as súas áreas de coñecemento e as súas experiencias. O ciclo de actividades leva por título “Cedeciencia” e é unha mostra máis do espíritu bulideiro e emprendedor da sociedade cedeiresa.

David Vilela, un doutor en Enxeñería Industrial adicado á enxeñería de software, máis específicamente á creación de sistemas multiaxente para intelixencia artificial distribuída; Sara Abuín, psicóloga integrativa e musicoterapeuta; Juan Antonio Rodríguez Pérez, doutor en Bioloxía Evolutiva e adicado á investigación en xenómica estrutural; e Sergio Muíño, investigador en turismo e impulsor da iniciativa Eu Fun de Vivo –www.eufundevivo.com-, son os artífices deste programa de charlas, que se vai desenvolver en escenarios pouco formais e acordes coa finalidade divulgativa que ten todas as actividades.

Tal como explica Sergio Muíño, a participación de todos os relatores é desinteresada e algúns deles traballan e residen en lugares afastados como Noruega, Dinamarca ou Reino Unido, porén comparten o seu vencello a Cedeira. A finalidade é achegar á veciñanza de Cedeira, e en xeral a calquera persoa interesada, temas científicos e culturais de actualidade co máximo rigor, pero tamén dunha maneira amena e sinxela.

O venres 5 de xullo será a primeira cita. O café bar Pinzón acollerá a reunión, a partir das 19.30h. En primeiro lugar falarán os mozos e mozas que están a participar no Hiperbaric Challenge, que se vai desenvolver esta próxima fin de semana en Burgos. Despois da exposición sobre este reto técnico chegará a quenda de David Vilela, que ofrecerá a charla titulada “Poñerlle o cascabel á IA”. Rubén Vilela, por último, falará sobre o impacto do Big Data no mundo e nos negocios.

A seguinte cita será o venres 19 de xullo, no café bar O Mástil. Desta volta, tamén a partir das 19.30, Sara Abuín ofrecerá a charla “Soo a vento: a figura sinestésica na expresión emocional”, que dará paso á intervención da Lucía Álvarez, titulada “Sexoloxía sen filtros, separando mitos e realidade”.

Xa en agosto, Cedeciencia fixou outras dúas citas para os días 3 e 9. A primeira será no Museo Mares, ás 12.00 horas, e nela falarán Sergio Muíño, que abordará a creación dun produto turístico cultural en Cedeira; o artista Adrián Taracido, que titulou a súa charla “Dando cor a Cedeira”, e Adrián Piñón, que falará sobre “A caza de bruxas”. O día 9, ás 19.30h no café Sonreiras, Jorge Salgado falará sobre “Edificios intelixentes: a enerxía do futuro xa está aquí” e Roberto Mourente pechará o programa cunha charla sobre “O que descoñecemos sobre o patrimonio biolóxico da Serra da Capelada”.

A intención dos organizadores é manter o impulso de Cedeciencia ao longo do ano, concertando outras charlas co mesmo corte divulgativo.

O Concello de Cedeira acaba de publicar na Plataforma de Contratación do Sector Público o expediente para a concesión da cafetería e anexos da área recreativa do paseo da praia da Madalena, o coñecido “chiringuito”, para un prazo mínimo de dous anos, ampliable ata un máximo de cinco. O establecemento, que o Concello arranxou en 2021 para poñelo de novo en servizo tras algúns anos parado, adoita estar moi animado durante o verán tanto pola súa situación, a pé do areal, como pola organización de concertos e outras actividades, unha cuestión que se valora no prego de condicións.

O chiringuito está situado á altura do número 59 do Camiño Real. Conta cun local de madeira, con 90 metros cadrados, no que están a cafetería (barra e zona de consumición), así como cociña, almacén e os baños masculino e feminino. A concesión abrangue tamén a terraza, de 150 metros cadrados de superficie.

Nos pregos de condicións establécese un canon anual mínimo de 767€, así como unha serie de criterios a valorar para a concesión. Entre eles está a presentación dun proxecto de decoración do local, o emprego de dispositivos de aforro enerxético, a organización de actividades culturais e de lecer, a disposición dunha zona wifi ou unha páxina web.

Como mínimo, o servizo de bar-cafetería deberá funcionar desde o 1 de xuño ao 30 de setembro, durnate a Semana Santa e tamén o 15 de maio, polas festas de San Isidro. O resto do ano a apertura non será obrigatoria, a non ser que se incluia na oferta. O establecemento poderá establecer un día de descanso á semana, nos períodos de apertura obrigatoria, agás venres, sábado e domingo.

O 5 de xullo é a data límite para a presentación das ofertas.

link da licitación do chiringuito:

https://contrataciondelestado.es/wps/portal/!ut/p/b0/DcqxCoAgEADQT7qgLXAIEqKlocB0iSNFri61kvr9HB88MLCACfiSx0wxIBdr61xiCkdjXUZmtzJtlHErARQYMGTly6BvReO8d9eE8tPzMFT100cvBKTzbH_sL7dN/