NOVAS

O concello de Cedeira vén de poñer en marcha unha nova campaña de concienciación cidadá para evitar que os excrementos das mascotas queden nas vías e espazos públicos do municipio. Carteis e sinais servirán para recordar ás persoas propietarias de cans a importancia de manter, neste eido, un comportamento cívico, ao tempo que se reparten de xeito gratuíto uns dispensadores de bolsiñas biodegradables para a recollida das cacas.

O Concello repartirá un total de 350 dispensadores, que levan o logo de Cedeira e están fabricados con fibra de bambú, un material reciclable e ecolóxico. As persoas interesadas poden pasar xa a recollelas polas oficinas do rexistro, no consistorio, en horario de 09.00 a 14.00 horas.

Desde o Concello, recordan que a limpeza das deposicións das mascotas é unha conduta cívica que beneficia a toda a comunidade. Deixar os excrementos na rúa é un problema de primeiro orde para calquera administración local, porque son un foco de infeccións ao que están especialmente expostos os nenos e nenas ou as personas en cadeira de rodas. Tamén porque xera conflitos entre a veciñanza, supón un gasto para o servizo de limpeza e dá mala imaxe da vila.

A campaña tamén leva aparellado informar ás persoas que teñen de can que non recoller as deposicións na rúa conleva multas que poden estar entre os 60 e os 500€, segundo establece o regulamento municipal.

O Concello de Cedeira vén de realizar dous investimentos para mellorar o firme dunha rúa da zona urbana e para dotar de saneamento e cambiar o firma dun camiño da zona rural. As dúas intervencións suman máis de 45.000€.

No primeiro caso, trátase unhas obras de acondicionamento do firme da rúa Paimpont, un vial que presentaba un pavimento moi deteriorado e con fochancas. O goberno local investiu 10.387,85€ (IVE incluído) nestas obras, que afectaron ao total da superficie da vía. Así, o arranxo abrangueu uns 360 metros cadrados de rúa, na que primeiro se acondicionou o chan recheando as fochancas, para despois estender unha capa de mistura asfáltica en quente. A rúa Paimpont, que leva o nome da localidade francesa irmandada con Cedeira, é unha rúa cega que está situada preto do IES Punta Candieira e do campo de fútbol do Beco.

Por outra banda, o Concello vén de investir 34.948,79€ (IVE incluído) nunhas obras de mellora do camiño de acceso ao núcleo rural das Saíñas. Os traballos incluíron tanto a execución dun novo firme como a instalación dos sistemas de abastecemento e saneamento.

Catro comparsas, catro grupos e unha parella inscribíronse para participar hoxe no desfile de Entroido de Cedeira, que o Concello volve a organizar este ano como era tradicional, cun percorrido polas rúas e un baile posterior, que desta volta estará amenizado pola orquestra Los Player’s. O percorrido comezará na Praza Roxa ás 17.00 horas e a comitiva irá polas rúas do centro, ata o Polideportivo Municipal, onde o xurado dará a coñecer os premios aos mellores disfraces.

As catro comparsas inscritas superan con moito o número mínimo de dez integrantes que establecen as bases e de feito algunha conta con máis de trinta persoas. Participan tamén catro grupos, categoría que abrangue os conxuntos de entre 3 e 9 persoas e que tamén no caso dos inscritos teñen máis de seis integrantes.

Repartiranse 2.170€ en premios. Na categoría de comparsas hai tres premios dotados con 600, 400 e 300€; na de grupos serán de 300, 250 e 200€. Por último, para parellas e disfraces individuais establécense outros tres premios de 50, 40 e 30€. Despois da entrega de premios, a troula trasladarase de novo á Praza Roxa, onde a orquestra Los Player’s animará o baile ao que están invitados todos os veciños e as veciñas.

O Concello prevé a continuación tres xornadas –días 19, 20 e 21- con actividades de balde para nenos e nenas. Así, o domingo e o martes pola tarde, de cinco a oito no Polideportivo Municipal, a cativada poderá gozar con diferentes atraccións inchables, animación con música e baile, obradoiros de maqueado, un photocall e outros xogos. Para o luns está previsto un concerto dirixido ao público infantil a cargo de Paco Nogueira, ás 18.00 horas na Praza Roxa.