MOCIDADE

Nenos e nenas de Infantil do CEIP Nicolás do Río participaron esta semana na prantación dunha laranxeira no novo espazo verde de acceso público situado na traseira do Pazo de Moscoso, cuxas obras de rehabilitación están na súa recta final. Desde o Concello de Cedeira, o alcalde Pablo Diego Moreda Gil recordou que na zona había antigamente máis destas árbores e que, de feito, diante do Concello pervive unha con máis de cen anos que dá nome á Praza da Laranxeira. “Quixemos manter a tradición das laranxeiras e que os máis pequenos teñan a experiencia da prantación e poidan gardar o recordo, xa que verán medrar a árbore e crecerán con ela”.

A rehabilitación do Pazo de Moscoso é o investimento máis ambicioso do actual mandato. Foi adxudicada a finais de 2020 por un importe de máis de 450.000€ para albergar diferentes servizos municipais, entre os que están os Servizos Sociais e Intervención, así como as oficinas da Policía Local. As obras están practicamente listas e o Concello está xa comprando o mobiliario e equipamento necesario, para poder abrir as novas dependencias en canto sexa posible.

O proxecto incluía tamén facer do terreo anexo ao inmoble un parque de uso público e a laranxeira prantada polo alumnado do colexio ocupa xa un lugar central no mesmo. Segundo informou o alcalde, o goberno local está a tratar cos propietarios dos edificios colindantes ao xardín para ver de poder facer un gran mural na parede medianera que pecha este espazo. A intención do Concello tamén é recuperar unha parte da antiga muralla cuxos restos están noutro lateral deste novo espazo público.

A intervención, ademais de ampliar os espazos de atención á cidadanía de Cedeira, significa a recuperación dun edificio noble da localidade. É un edificio do século XV que estaba no abandono e que agora volve ser unha mostra da importancia e a grandeza que ten o conxunto das rúas do casco vello.