MOCIDADE

SUSPÉNDESE O FESTIVAL DE COPLAS DE ENTROIDO, ANTE A FALTA DE PARTICIPANTES. CONTINÚAN O RESTO DE ACTIVIDADES

Logo desta primeira convocatoria do Festival de coplas de entroido de Cedeira, e ante a falta de participantes (3 inscricións en data límite) este ano tomamos a decisión de suspender esta nova actividade sen perder a ilusión e a esperanza de que en vindeiros anos poidamos levala adiante.
Continúan o resto de actividades (desfile, baile e festa infantil) co engadido este ano do Enterro da Sardiña do que podemos decir que colaboran na súa organización a Asociación Amas de Casa de Cedeira, Asociación de Veciños de Piñeiro, Asociación Buxainas, Asociación Aturuxeiras, Asociación Maiores de Cedeira e Asociación Discalz@spolo Festival e ANPA Picapeixe e que terá o velorio na praza da Marieta o sábado 17 ás 17:00 para logo facer un percorrido polas rúas de Cedeira ata chegar a praia da Magdalena onde terá lugar o enterro e choricadas varias.

En canto ao concurso do día 10, segue aberto o prazo para a inscrición nas categorías de comparsas, grupos, parellas e individual. Só tedes que achegarvos ao concello e cubrir unha instancia xeral cos datos solicitados e presentar o dni da persoa que represente aos inscritos. Tamén pódese facer telemáticamente a través da sede electrónica do concello.
Lembrade que remata o día 9 ás 14:00 h.

O desfile de Entroido, dada a previsión meteorolóxica, tentaremos facelo igualmente pero xa tendo en conta que o remate terá lugar no polideportivo municipal. De permitilo o tempo sairemos da praza Roxa para dirixirnos pola Avenida de Castelao ata o polideportivo municipal onde o xurado poderá ver a todas as persoas participantes e onde se procederá á entrega de premios unha vez remate a suma dos votos. En caso de que o tempo non permita a saída polas rúas, irase directamente ao polideportivo onde poderemos ver igualmente todos os disfraces.

Este ano o xurado estará integramente formado por representantes de distintas asociacións do pobo, 11 en total, que entregarán os seus votos ao remate da presentación dos disfraces.

PAPÁ NOEL CHEGARÁ O SÁBADO EN KAYAK POLO RÍO CONDOMIÑAS

O Nadal está a piques de chegar ao municipio de Cedeira coa celebración das primeiras actividades específicas, aínda que as luces levan días acendidas.

Papá Noel chegará ao concello na tarde no próximo sábado (día 23) navegando en kayak polo río Condomiñas na compaña de algúns mergulladores. A chegada está prevista para as 18.30 horas e terá lugar na praza da Marieta. Ao remate da recepción, a comitiva sairá para percorrer as rúas da localidade. Trátase dunha inicativa dun grupo de entidades locais coas que colabora o Concello de Cedeira. A animación correrá a cargo de Sport Club Fitness.

A praza Roxa acollerá o día 31 a festa de Aninovo, que estará amenizada pola orquestra Fania Blanco Show. A celebracion arrincará pasada a unha da madrugada. Haberá carpa.

TEATRO “O CASTIÑEIRO DO APALPADOR”

Dentro da campaña “En familia, en Cedeira, en galego”, o Servizo de Normalización Lingüística do Concello, en colaboración coa Rede de Dinamización Lingüística da Xunta de Galicia, trae unha actividade para que grandes e pequenos/as desfrutemos neste tempo de Nadal. Trátase da peza de teatro con monicreques “O castiñeiro do Apalpador”, producida por Fantoches Baj. A actividade desenvolverase o domingo 24 ás 12:00 h. no Auditorio Municipal (Entrada libre)

Partindo da lenda popular galega, a obra presenta un carboeiro ao que a xente chama Apalpador. Este curioso personaxe contaranos a fabulosa historia do seu castiñeiro máxico e de como comezou a repartir as súas castañas no Nadal entre os nenos e as nenas que pasan famiña.

Para pasar un bo rato en familia e coñecer as nosas tradicións!