Skip to content Skip to left sidebar Skip to footer

MOCIDADE

Nace en Cedeira o Club Cedeira Basket Street

NACE EN CEDEIRA O CLUB CEDEIRA BASKET STREET

Xurde en Cedeira o club Cedeira Basket Street, unha iniciativa coa que Isaac Taracido Mariña, como presidente da entidade, quere facer do baloncesto, ao igual que xa ocorre co bádminton, o remo ou a natación, unha disciplina de referencia do deporte cedeirense.

A presentación oficial do club terá lugar o próximo mércores (día 12), ás 19.30 horas, con motivo da celebración dun partido amistoso entre o Baxi Ferrol (antigo Universitario) e o Club Polideportivo Bembibre. A asistencia é gratuíta.

Ademais a entidade traballa para darse a coñecer noutros ámbitos. E así o está a facer, cunha nota enviada a través da Anpa Picapeixe do colexio Nicolás del Río, na que se informa aos pais e nais de que o baloncesto se incorporará ao programa de actividades extraescolares. Trátase dunha iniciativa pensada para nenos e nenas con idades comprendidas entre os catro e seis anos. A intención do club é comezar a impartir a actividade a partir do próximo mes de outubro. Os interesados xa poden anotarse no CEIP.

Tamén por esas datas está prevista a posta en funcionamento da escola de baloncesto, aberta á participación de todas as persoas que desexen tomar contacto con esta disciplina deportiva, sexa cal sexa a súa idade. O polideportivo municipal acollerá esta iniciativa e tamén será a referencia para os veciños que desexen apuntarse.

Isaac Taracido Mariña considera probable que o equipo xuvenil agora en formación, no que están a participar rapaces con idades entre 14 e 18 anos, poida incorporarse á competición oficial a partir da tempada 2019-2020 cunhas camisetas nas que predominarán as cores azul e amarela.

Hai máis de oito anos que o baloncesto deixou de estar presente na vida deportiva de Cedeira, na que estivera desde o ano 1990 da man do CBC (Club Baloncesto Cedeira), polo que desde o goberno municipal se está a aplaudir a iniciativa e se está a brindar a súa total colaboración ás persoas que tratan de levala a cabo.

Cedeira pecha as festas de agosto hoxe coa procesión marítima e mañá coa xira de San Antón

CEDEIRA PECHA AS FESTAS DE AGOSTO HOXE COA PROCESIÓN MARÍTIMA E MAÑÁ COA XIRA DE SAN ANTÓN

As festas de Cedeira están a entrar na súa recta final coa celebración hoxe xoves da procesión marítima e na xornada de mañá dedicada á xira.

Así, para hoxe, a programación festiva inclúe a saída da Virxe do Mar pola ría acompañada pola Banda Vila de Cedeira. Este acto será xusto despois de se rematar a misa que ás 11.00 horas terá lugar na igrexa parroquial.

Xa pola tarde, a praza do Floreal acollerá a actuación da compañía Desincronacidas que porá en escena o espectáculo cómico “Oh Olimpiadas”. A verbena, que dará comezo ás 22.30, correrá a cargo da orquestra Pontevedra e será na praza Roxa.

Mañá venres 17 é a xornada que levará a moitos veciños e veciñas de Cedeira a pasar o día de romería ao pé da ermida de San Antón de Corveiro. A última actuación do programa festivo correrá a cargo do grupo Nueva Fuerza e será, a partir das 22.30 horas, na praza Roxa.

Hoxe actuarán as Orquestras Panorama e Claxon e queimaranse 151 quilos de pólvora nos fogos

HOXE ACTUARÁN AS ORQUESTRAS PANORAMA E CLAXON E QUEIMARANSE 151 QUILOS DE PÓLVORA NOS FOGOS

As festas de Cedeira chegan a unha das datas máis importantes deste calendario festivo de verán, o día da Patroa. Ata un total de cinco actividades distintas daranse cita nunha xornada que, a nivel de animación, dará comezo coa sesión vermú a cargo da Banda Pro Cedeira na praza Roxa.

O programa “Seráns na rúa en familia” traerá á vila de Cedeira o espectáculo “La Coquette” da man do grupo Kanbahiota. Será ás 20.00 na praza Floreal.

A partir das 23.00 horas comezará a actuación da orquestra Claxon na praza Roxa, que concluirá un pouco antes das doce da noite para dar paso a sesión de fogos artificiais. con algo máis de 150 quilos de pólvora representaranse emoticonas, palmeiras e ata champiñóns na ceo cedeirense. Serán máis de 14 minutos de luces e estrondo nunha sesión que correrá a cargo da empresa Rochas Arias e cuxa seguridade estará nas mans de axentes da Policía Local e de voluntarios de Protección Civil.

A noite da patroa pechará ata o ano que vén coas actuacións da orquestra Panorama na praza da Revolta e a Claxon na praza Roxa.