MEDIO AMBIENTE

CEDEIRA COMPLETA A SÚA OFERTA TURÍSTICA CON RUTAS DE SENDEIRISMO GUIADAS

O programa arrincará o martes 17 e estará vixente ata finais de agosto.

O Concello de Cedeira completa a súa oferta turística coa organización de dúas rutas de sendeirismo guiadas. Son os denominados roteiros dos Tesouros e de Santo André de Teixido. As saídas, que darán comezo o próximo martes, día 17 de xullo, serán todos os martes e xoves ata finalizar o mes de agosto.

Con respecto á ruta dos Tesouros dará lugar a unha andaina de aproximadamente 10 quilómetros cuxo obxectivo será o faro de Robaleira e súa contorna. A duración estimada é de tres horas e saída será os martes ás 9.00 horas desde a oficina de Turismo, situada no número 18 da avenida de Castelao.

En canto a segunda das propostas, tamén dará comezo ás 9.00 horas pero, neste caso, os primeiros quilómetros faranse en vehículos particulares, ata a igrexa de Régoa, punto de partida unha andaina que cubrirá unha distancia dun 16 quilómetros. A duración será de cinco horas e terá lugar os xoves.

As persoas interesadas xa poden facer a reserva de praza na oficina de Turismo (teléfono 981482 187). O número de participantes é limitado, só serán admitidos os vinte primeiros solicitantes, e a participación é gratuíta. A organización establece como material necesario calzado de monte, bastón, auga, froita e chuvasqueiro. A dificultade é baixa, polo que se trata de actividades nas que tamén poden tomar parte nenos e nenas.

Cara ao presente mes, as saídas serán os días 17, 19, 24, 26 e 31, mentres que en agosto se levarán a cabo os días 2,7,9,21,23, 28 e 30.

CEDEIRA VERIFICA O BO ESTADO DE CONSERVACIÓN DA SAUNA CASTREXA

A escavación da sauna castrexa do Campo do Castro, na Punta do Sarridal, permitiu constatar o bo estado de conservación do monumento, un dos cinco achados en Galicia. O Concello de Cedeira financia esta cuarta intervención, en marcha ata o día 20. Os traballos de restauración e consolidación finalizou, cun equipo de tres persoas, e a escavación dirixida por Emilio Ramil, na que participan outro arqueólogo e catro auxiliares, continúa.

«En conxunto, o resultado é espectacular, porque se conserva a sauna enteira, con todos os elementos, e en moi bo estado», recalca Ramil. «Esta vez tratábase de consolidar os muros da antecámara, a porta de acceso e o banco onde se relaxaban despois do baño de vapor. E tamén a porta do forno, coas bocas de alimentación, unha por onde metían a madeira para queimar, e outra orientada á piscina, onde botaban a auga fría para producir o vapor», detalla. A sorpresa chegou ao descubrir que entre a cámara e a antecámara, onde se sitúa o monólito de pedra, «xusto antes, hai un sistema de muros que forman unha falsa bóveda, polo que habería un dobre arco, o da parte baixa do monólito e o construtivo, por aproximación de fiadas de mampostería. Non o esperabamos, sería un reforzo para evitar a saída do vapor», explica. Mentres, seguen escavando «entre o paramento interno da muralla e o exterior do monumento con forno, para deixar á vista a porta de acceso á zona de alimentación». E xa albiscan outras estruturas, como un edificio cuxa funcionalidade aínda ignoran, e un muro máis pequeno con pavimento, da primeira fase de ocupación do castro.

Fonte: La Voz de Galicia

Pode consultar a nova na seguinte ligazón:

IR Á LIGAZÓN Cedeira verifica o bo estado de conservación da sauna castrexa