MEDIO AMBIENTE

AUGAS DE GALICIA OPTIMIZARÁ A EFICIENCIA ENERXÉTICA NAS EDAR DE ARES E CEDEIRA

Augas de Galicia mellorará a eficiencia enerxética en cinco estaciones depuradoras de augas residuais (EDAR), entre as que se atopan as de Ares e Cedeira. Estas experiencias piloto son o resultado do proxecto Aqualitráns, un estudo de investigación sobre o consumo enerxético en diferentes EDAR de Galicia e o norte de Portugal, cuxas conclusións foron presentadas onte na EDAR de Ares, en Punta Avarenta.

“Tras as conclusións deste traballo imos poñer na práctica, neste caso cun proxecto piloto en cinco depuradoras en Galicia e unha no país veciño, para aplicar as conclusións destes estudos e alcanzar unha maior eficiencia enerxética nos procesos de depuración”, apuntou o director de Augas de Galicia, Roberto Rodríguez, tras a visita guiada que os participantes, entre os que se atopaba o director do departamento de Enerxía e Planificación Enexértica do Inega, Emérito Freire, o director xeral da Fundación ITG, Carlos Calvo, ou o presidente do Consello de Administración de *Águas do Município do Porto, Frederico Vieira, realizaron á planta depuradora.

Caso por caso En Galicia, as instalacións que se someteron á devandita auditoría de consumos eléctricos foron as situadas nos municipios coruñeses da Pobra do Caramiñal, Ares, Cedeira e Ortigueira; Ribadeo, en Lugo, ademais dos pontevedresas de Nigrán, Gondomar, Arcade, Vilaboa e Tomiño. Agora, nunha segunda fase, decidiuse que a metade delas, concretamente as da Pobra do Caramiñal, Ares, Cedeira, Nigrán e Gondomar, ademais da lusa de Sobreiras, no Porto, comecen a aplicar as conclusións deste estudo para lograr “un aforro enerxético, nestas instalacións que son tradicionalmente grandes consumidoras de enerxía eléctrica”, segundo sinalou o director do organismo galego.

No caso de Ares, o estudo revelou que os sistemas de aireación supoñen un elevando porcentaxe no consumo enerxético polo que se procederá á instalación dun vertedoiro regulable que manterá o nivel da auga nun valor de sumergencia óptimo. A implantación desta medida terá un custo de 18.982 euros e supoñerá un aforro no consumo enerxético global da EDAR dun 4%.

Por outra banda, a planta depuradora de Cedeira require de equipos de funcionamento continuos cuxo consumo se optimizará coa instalación de 74 paneis fotovoltaicos para o seu autoconsumo. Este sistema, valorado en 41.804 euros, cubriría o 18,78% da demanda diúrna de enerxía da EDAR e o 7,2% da demanda total da planta depuradora, tal e como recolle o estudo.

Fonte: Diario de Ferrol
Pode consultar a nova na seguinte ligazón:
IR Á LIGAZÓN Augas de Galicia optimizará a eficiencia enerxética nas EDAR de Ares e Cedeira

O CONCELLO DE CEDEIRA COLABORA COA ASOCIACIÓN A CRINA NA XUNTANZA E RUTA CABALAR DESTE SÁBADO

O Concello de Cedeira colabora coa asociación ecuestre A Crina para a celebración da xuntanza e ruta cabalar que terá lugar o próximo sábado no polígono industrial A Trabe. En concreto, a administración local fixose cargo de limpar a zona na que terá lugar o encontro, así como da instalación do valado e a conexión cos servizos de auga e luz. O presidente da entidade, Ismael Durán, valora esta axuda e colaboración institucional, ademais de invitar a veciños e visitantes a secundar coa súa presenza unha cita con moita tradición no municipio.

O programa, que dará comezo ás 9.00 horas, inclúe saída polos montes da Capelada, un xantar e probas de andadura galega cronometrada, de calidade e aparellada ao longo de toda a tarde. Desde a organización, que corre a cargo da entidade ecuestre, apuntan que a hora límite para a medición e inscrición dos cabalos será ás dúas da tarde e que nas carreiras de aparelladas só poderán tomar parte os catro primeiros clasificados das probas de andadura cronometrada. Tamén se informa do uso obrigatorio de casco entre os participantes en calquera das 30 probas previstas.

As contías dos premios oscilarán entre os 40 e 100 euros, ademais de sacos de penso. O importe global ascende a 1.720 euros.

As persoas interesadas en participar no xantar, que estará amenizado polo dúo Deluxe, teñen de prazo ata o día 26 para apuntarse a través dos teléfonos 659 135 902/686 630 304/618 551 934/ 646 192 784. O menú consistirá en paella, churrasco, pan, bebida, sobremesa, café e licor. O prezo por persoa é de 20 euros. A organización quere chegar ata os 250 menús.

O CONCELLO DE CEDEIRA RECOMENDA PRECAUCIÓN Á VECIÑANZA POLOS FORTES REFACHOS DE VENTO

O goberno de Cedeira pide precaución á veciñanza en días de vento como os actuais cando saian camiñar ou pasen por unha zona na que exista moita presenza de árbores. Os refachos de vento que nas últimas horas superaron os 75 quilómetros hora obrigaron ao peche de varias estradas de titularidade provincial, á retirada de numerosas ramas do paseo marítimo e a ter que arranxar desperfectos causados no chan do parque infantil da praza Roxa.

Desde o executivo tamén se está a demandar a máxima colaboración por parte dos veciños no sentido de informar, chamando por teléfono á Policía Local ou Concello, sobre calquera incidencia a fin de que sexa reparada antes de que poida poñer en perigo a seguridade das persoas ou mesmo dos condutores.