MEDIO AMBIENTE

O Concello de Cedeira vén de sacar a licitación un contrato para a subministración do equipo e materiais para a implantación do novo sistema de recollida selectiva de biorresiduos. É o contedor marrón, tamén chamado “de quinta fracción”, que os municipios de máis de 5.000 habitantes están obrigados a instalar para cumprir coa lexislación e os obxectivos de reciclaxe de residuos marcados pola Unión Europea. Na vila empregaranse colectores con fechadura, que segundo se ten demostrado, garanten maior compromiso da cidadanía e menos número de impropios nos residuos depositados.

O alcalde, Pablo Diego Moreda Gil, explicou que o contedor marrón permitirá acadar os obxectivos propostos pola UE, aportando beneficios medioambientais, xa que a recuperación por separado de materia orgánica biodegradable redundará nunha mellor recollida selectiva do resto de residuos reciclables, reducindo a cantidade destes que chegan a vertedoiro. Ademais, o biorresiduo terá aproveitamento como fertilizante ou xerador de enerxía.

O concurso publicado polo Concello, a través da Plataforma de Contratación do Sector Público, establece un prezo de 26.509,41€ (IVE incluído) para a subministración de 25 colectores de 800 litros de capacidade e outros 100 de 360 litros. Estes colectores situaranse na vía pública e distribuiranse chaves entre a veciñanza para que poida facer uso deles. Neles poderán depositarse restos de alimentos crus ou cociñados, pelicas de froitas, cascas de ovos e froitos secos, pousos de café e papel de cociña usado, entre outros. Xunto cos citados 125 contedores, na licitación inclúese tamén a subministración de 93 caldeiros domésticos e 744 rollos de bolsas compostables –de 30 bolsas cada un-, que o Concello distribuirá entre a cidadanía para fomentar a participación activa na recollida selectiva dos biorresiduos.

Moreda Gil informou que o Concello conta con axudas, procedentes dos fondos europeos no marco do Plan de Recuperación, Transformación e Resiliencia a través da convocatoria feita pola Consellería de Medioa Ambiente, Territorio e Vivenda, para a implantación desta mellora no sistema de recollida de residuos, tanto para a compra dos equipamentos como para a realización de dúas campañas de información e sensibilización da poboación en xeral, por un lado, e dos grandes xeradores de biorresiduos, por outro.

O alcalde destacou o compromiso do goberno local co medio ambiente e o traballo feito nos últimos anos para avanzar na xestión de residuos, entre outras cousas coa compra de novos colectores, o reparto de composteiros domésticos e campañas de sensibilización como a que advirte, ao pé dos sumidoiros na rúa, dos prexuizos de tirar cabichas e outras cousas ao chan.

O PROXECTO PESCATURACCION, actuación do CONCELLO DE CEDEIRA, para o impulso do emprendemento nos sectores turístico e pesqueiro da vila, finaliza coa celebración dun Foro de Turismo e Pesca o día 6 de outubro as 18:30 horas na Confraría de Pescadores de Cedeira.

Dentro do proxecto de PESCATURACCION e a través dun proceso participativo realizouse unha consulta a cidadanía, para o deseño dun Plan de Mellora e unha Imaxe de Marca Territorial. Este proceso de consulta facilitou a definición dos elementos estratéxicos e diferencias de Cedeira, e foron básicos para a creación da Marca Territorial ligada ao mar e ao turismo. Esta marca ademais serve para a promoción do emprendemento innovador e sustentable no sector turismo e pesqueiro.

A promoción e impulso do emprendemento nos sectores turístico e pesqueiro da vila de Cedeira, é o obxectivo final de PESCATURACCION. E coa celebración deste foro quérese dar a coñecer experiencias emprendedoras de éxito noutros territorios costeiros de Galicia e con elo estimular o xurdir de novos negocios.

Para o Foro contarase coa presencia de empresas, de pobos galegos con poboación e características similares a Cedeira, que son consideradas boa práctica no ámbito do turismo e da pesca, ben no ámbito da transformación de produtos pesqueiros ou ben por apostar pola diversificación do sector pesqueiro-marisqueiro.

O Foro dará comezo as 18:30 horas coa presentación da marca territorial de Cedeira e o Plan de Mellora, para pasar coas intervencións das empresas que son casos de éxito e rematará cunha degustación de produtos do territorio.

Este Foro está dirixido ás empresas e traballadores e traballadoras dos sectores do turismo (empresas de actividades, informadores turísticos, restaurantes, aloxamentos e outros) e da pesca (pescaderías, armadores, comercializadores e outros), así como a calquera persoa de Cedeira que teña en mente emprender e iniciar un novo negocio relacionado con algún destes sectores.

Abrirase a convocatoria para inscribirse ao foro este xoves día 29 de setembro, e poderase facer chamando ou enviando un whatsapp ao teléfono 664 53 82 15. PESCATURACCION é un proxecto subvencionado cunha axuda do GALP A MariñaOrtegal, Consellería do Mar e o Fondo Europeo Marítimo e de Pesca.

A praia da Madalena acolle mañá xoves un obradoiro da campaña “Do mar vívese”, que desenvolve a Consellería do Mar. Desde as 11.00 ata as 19.00 horas, haberá un posto da campaña atendido por monitores no que se informará aos bañistas, especialmente á xente de fóra, da importancia de respectar a actividade marisqueira e dos perxuizos que causa o furtivismo.

A campaña desenvólvese dun xeito lúdico, con xogos nos que as persoas participantes reciben diferentes agasallos.