CULTURA

Cedeira é un dos 18 concellos galegos que forman a Asociación de Entidades Locais pola Lingua Galega “Alingua”, entidade que foi presentada publicamente hai poucos días en Santiago. A organización bota a andar cunha campaña de promoción nos medios de comunicación e redes sociais na que participan personalidades de todos os eidos, como a actriz Mela Casal, o xornalista Gonzo, a artesá Elena Ferro ou o actor Touriñán.

Alingua nace para impulsar o uso do galego a través da intercooperación e o traballo en rede dos concelos participantes. Do nome da entidade, tal e como explicou o seu presidente, Adolfo Muíños, alcalde de Rianxo, “xorde o verbo alinguar, que significa usar a lingua propia para expresar pensamentos e accións ao tempo que se manifesta unha vontade expresa de autodefinición e afirmación nela e na cultura que vehicula”. A asociación quere que se converta “no neoloxismo de moda” coa axuda da campaña publicitaria devandita, na que se introducen mensaxes como “E ti que alinguas?”, “O teu alforitmo fala galego?” ou “A lingua sitúanos no mundo”.

A concelleira de Cultura, Ermitas García, destacou que “as administracións locais deben fomentar o uso da lingua galega en todos os eidos” e que o goberno local de Cedeira está comprometido con dito obxectivo. “Participar nesta plataforma e colaborar con outros concellos que están tan sensibilizados como nós neste tema abre a porta a ter maior capacidade para organizar actividades en rede, a compartir ideas, propoñer iniciativas e acoller outras que partan doutras entidades”, subliñou a edil.

O Auditorio de Cedeira acolle este domingo a representación da obra A lúa vai encuberta, un texto de Manuel María que por primeira vez é posto en escea polas compañías Incendiaria e A Quinta do Cuadrante. A peza xira arredor da historia de Galicia e a súa loita por conformar unha identidade propia, partindo do Estatuto de Autonomía do 36, truncado polo golpe de estado, e chegando ata a transición democrática. A función comezará ás 20.00 horas.

“A lúa vai encuberta” é un texto que o autor chairego escribiu nos anos setenta e que non chegou a representarse. Incendiaria, unha compañía que se define como plataforma artística para a investigación arredor da creación escénica contemporánea, e A Quinta do Cuadrante, un grupo que sitúa como prioridade a procura de espectáculos nos que dialoguen diferentes disciplinas, uniron sus forzas para representala. A obra estreouse en Ourense en setembro de 2021, despois de gañar o II Certame Manuel María de Proxectos Teatrais.

A montaxe ten a Tito Asorey na dirección e a Vanesa Sotelo encargada da dramaturxia. Ambos os dous actúan xunto con Davide González e Melania Cruz.

Os concelleiros Carmela Prieto e Manuel Martínez, xunto co técnico de Cultura do Concello de Cedeira, Quique Vázquez, asistiron onte no Festival de Cine de Málaga á presentación oficial da serie televisiva “Rapa”, rodada hai poucos meses na serra da Capelada e noutras localizacións do municipio de Cedeira, no marco da sección no competitiva “Pantalla TV”. Alí proxectouse ás seis desta tarde o primeiro dos seis capítulos de 50 minutos que compoñen o thriller protagonizado por Javier Cámara e Mónica López, como adianto da estrea prevista para este ano na plataforma Movistar+.

Os representantes do Concello de Cedeira foron invitados a participar no evento pola produtora Portocabo e quixeron apoiar coa súa presencia o lanzamento da serie. A súa presentación no Festival de Málaga marca un fito importante para “Rapa”, un audiovisual que sen dúbida vai servir para a promoción turística da localidade, xa que amosa os seus impresionantes paisaxes e tamén elementos característicos e singulares da cultura e a etnografía da zona.

No acto de onte a serie “Rapa” tivo unha excelente acollida e Cedeira estivo moi presente, tanto nas imaxes e persoaxes do primeiro capítulo, como na presentación que fixeron os responsables da produción, na que se destacou en repetidas ocasións o protagonismo das paisaxes da Serra da Capelada e as diferentes localizacións da vila, así como a importancia que ten na serie a cultura e a etnografía propia do lugar.

Cómpre recordar que “Rapa” é unha serie creada por Pepe Coira e Fran Araújo, co mesmo equipo que fixo “Hierro”, unha produción de enorme éxito e cun demostrado impacto na dinamización turística e económica da illa canaria. Alí teñen cuantificado o incremento do número de turistas nacionais e tamén internacionais, unha vez que aquela serie se proxectou noutros países. De feito, creouse unha ruta da serie para as persoas que queren coñecer as localizacións que aparecen na película.

O Concello de Cedeira confía en que “Rapa” vai ter un efecto similar. As pantallas televisivas, primeiro a través de Movistar+ e despois sen dúbida noutras plataformas, é un escaparate de enorme potencial que vai promocionar a zona como un destino turístico de natureza, con paisaxes e praias espectaculares, no que tamén paga a pena conectar coas lendas e tradicións milenarias dunha cultura singular.