Skip to content Skip to left sidebar Skip to footer

NOVAS

ROBÓTICA, PARKOUR E CURSO DE PINTACARAS, NA OFERTA ESTIVAL DO CENTRO DE OCIO XUVENIL DE CEDEIRA

O Centro de Ocio Xuvenil de Cedeira ofrecerá este verán catro actividades dirixidas á mocidade co obxectivo de dinamizar e impulsar alternativas de lecer entre os rapaces e rapazas de 12 a 18 anos de idade.

A primeira das propostas terá lugar o vindeiro 23 de xullo, ás 11.00 horas, coa celebración dun obradoiro de robótica que será impartido pola empresa Espacio Vivo, que xa o pasado ano desenvolveu con grande éxito de participación un taller de drons. Desta volta, e aínda que centrada na robótica, a actividade incluirá de novo unha experiencia de voo con dron e outra de realidade virtual. Terá unha duración aproximada de dúas horas e ofértanse 10 prazas.

O 31 de xullo, a partir das 11.00 horas, será a quenda para o obradoiro de parkour, inicialmente previsto para o pasado día 10 pero que tivo que ser aprazado debido ao mal tempo. Un ano máis, volverase contar coa colaboración de Vella Escola, entidade especializada en talleres de cultura urbana, para achegar aos participantes as bases deste deporte. Neste caso, non se fixa límite de prazas. A cita desenvolverase nas inmediacións do Centro de Ocio, no aparcamento contiguo entre o campo de fútbol e o Pump Track. Nesa zona a organización habilitará un parque móbil no que os mozos e mozas poderán aprender algunas das nocións básicas da devandita disciplina.

A axenda estival do Centro de Ocio cedeirés continuará en agosto, con dúas actividades impartidas pola asociación de animación infantil e xuvenil Ilusionarte. A primeira delas será o día 7 e consistirá nun obradoiro de maquillaxe e autocoidado (para persoas de 12 a 18 anos), a desenvolver a partir das 12.00 horas. Ao día seguinte (8 de agosto) terá lugar un curso de pintacaras. Será en horario de 16.30 a 20.30 horas e poderán inscribirse as persoas interesadas a partir de 12 anos de idade.

Para poder participar nestas actividades será preciso inscribirse de forma previa no correo coxcedeira@gmail.com; a través da conta de Instagram do centro (centro_ocio_xuvenil_cedeira) ou presencialmente en horario de apertura do centro. Durante este verán, o servizo abre as súas portas á mocidade os xoves e venres, de 20.00 a 23 horas, co obxectivo de ofrecer así unha alternativa de lecer para a mocidade. As instalacións deste servizo municipal dispón de xogos como o billar, o futbolín ou mesmo videoxogos, así como un espazo para poder gozar de xogos de mesa. A oferta de actividades propostas desde o Centro de Ocio Xuvenil do Concello de Cedeira parten do interese detectado nas enquisas desenvolvidas no marco das mesas de participación, axustántose deste xeito ás preferencias dos máis novos da vila.

PRESENZA DE TARTARUGAS EXÓTICAS INVASORAS NO RÍO CONDOMIÑAS

Dunha tempada a esta parte tense constatado a presenza de galápagos ou tartarugas alóctonas no río Condomiñas.

Na actualidade tense constancia da presenza desta especie en varios tramos do río, así como a aparición dalgún exemplar na propia praia.

Estas especies exóticas invasoras foron durante anos moi demandadas como mascotas, pero en algúns casos ao ir medrando moitos exemplares foron liberados ao medio natural polos seus donos, ata chegar a convertirse nun serio problema medioambiental (trátase de especies con gran adaptabilidade ao noso clima, sen depredadores e con gran facilidade de reprodución).

Estas tartarugas depredan diferentes animais acuáticos como poden ser anfibios ou alevíns de peixes, e tamén plantas, polo que causan un importante impacto ecolóxico.

Lémbrase que a solta no medio natural destes animais non só é un atentado medioambiental , se non tamén un delito. Dada a súa condición de fauna exótica invasora, ademáis tampouco se poden vender nin dar en adopción a outras persoas.

O concello atópase en trámites coa Dirección Xeral de Patrimonio Natural da Consellería de Medio Ambiente para tomar medidas que axuden conter a súa proliferación.

Mentres tanto, faise un chamamento a aquelas persoas que localicen algún exemplar para que se poñan en contacto co concello, para a súa captura e o seu envío ao centro de recuperación de fauna silvestre.

MÁIS DA METADE DO ALUMNADO DO CURSO DE SERVIZO DE BAR E CAFETERÍA PROMOVIDO POLO CONCELLO DE CEDEIRA ACADOU UN CONTRATO DE TRABALLO

Máis da metade do alumnado que durante o mes de xuño participou no curso gratuíto de Servizo de bar e cafetería organizado polo Concello de Cedeira acadou un posto de traballo ao rematar a formación. Así, das dez persoas inscritas na acción, seis están xa a traballar no sector, mentres que outras dúas poderían incorporarse tamén proximamente ao mercado laboral.

Estas cifras dan conta do éxito da actividade promovida desde a Concellería de Promoción Económica e Emprego, cuxo obxectivo principal era precisamente capacitar a persoas desempregadas para o traballo no sector da hostalería, cunha alta demanda de persoal.

Durante un mes, o alumnado, que amosou un grande interés durante o desenvolvemento de toda a formación, tivo oportunidade de adquirir coñecementos e destrezas sobre as principais cuestión relacionadas co servizo á clientela nas mesas ou na barra, a preparación e presentación das diferentes bebidas, aspectos vencellados á xestión dos negocios de hostalería e normas de seguridade e hixiene. As clases foron impartidas na Confraría de Pescadores, de luns a venres en horario de 16.00 a 21.00 horas, sumando un total de 110 horas teórico-prácticas. Todo o alumnado inscrito no curso rematou a formación.

Este curso enmarcase na aposta do goberno local de Cedeira polo emprego, impulsando a capacitación de persoas desempregadas que terán, a través da formación, mellores condicións para acceder a postos de traballo en sectores demandantes, como neste caso a hostalería.