O Concello organiza obradoiros de manualidades e tapices

O CONCELLO ORGANIZA OBRADOIROS DE MANUALIDADES E TAPICES

O Concello pon en marcha dous obradoiros, de tapices e manualidades, abertos a todos os veciños e veciñas.

No obradoiro de tapices, os participantes recibirán algunhas leccións básicas de técnicas e deseño para a elaboración de debuxos sinxelos en tapiz. As clases de manualidades serán impartidas por Fernando Villoslada, gratuitas e abertas a todo o mundo, e terán lugar nos baixos da Praza da Rectoral, e nelas desenvolveranse actividades de modelado en barro, escaiola, xeso, elaboración de moldes e restauración.

Para máis información e inscricións, os interesados deberán achegarse á Oficina de Turismo ou contactar telefónicamente no 981 482 187.

O goberno de Cedeira mostra o seu pesar pola morte repentina de Vicente Álvarez Areces

O GOBERNO DE CEDEIRA MOSTRA O SEU PESAR POLA MORTE REPENTINA DE VICENTE ÁLVAREZ ARECES

O equipo de goberno de Cedeira quere sumarse ás mostras de condolencia e pesar que, desde todos os ámbitos da vida pública e social de España, estanse a dar pola repentina morte de Vicente Álvarez Areces, exalcalde de Xixón, expresidente do Principado de Asturias e senador na actualidade.

O executivo local recorda especialmente o compromiso de Álvarez Areces coa recuperación da memoria histórica, que se materializou no ano 2010, ao contar coa súa presenza no acto inauguración do monumento ás vítimas do campo de concentración que houbo na vila tras a guerra civil e no que estiveron presos moitos asturianos.

O goberno cedeirense destaca así mesmo a súa valía como persoa comprometida coa democracia e a liberdade e a súa capacidade para transformar a sociedade desde a política, polo que se asegura que “o seu recordo sempre estará no noso corazón”.

O goberno municipal destaca a boa sintonía co Sergas cara a ampliación do Centro de Saúde

O GOBERNO LOCAL DESTACA A BOA SINTONÍA CO SERGAS CARA Á AMPLIACIÓN DO CENTRO DE SAÚDE

O goberno de Cedeira segue a dar pasos firmes cara á ampliación do Centro de Saúde. Onte mesmo o alcalde, Pablo Moreda Gil, reuníase co xerente de Xestión Integrada de Ferrol, Ángel Facio Villanueva, para darlle a coñecer o acordo plenario que deu lugar á adquisición de propiedades anexas ao actual edificio e para analizar, de forma conxunta, os trámites e as accións precisas para dotar de máis recursos sanitarios á vila de Cedeira.

Así, o Concello xa remitiu hai uns días a Patrimonio da Xunta de Galicia a documentación relativa á compra de tres plantas do edificio das vivendas sindicais que, xunto ás que xa eran propiedade do Concello, serán cedidas á Consellería de Sanidade e que incrementarán ata nun 40% o espazo construtivo do actual Centro de Saúde, un servizo asistencial falto de recursos para facer fronte ás necesidades reais da veciñanza e mesmo dos visitantes e turistas ocasionais.

Desde o equipo de goberno destácanse, entre outros problemas, as deficiencias estruturais no servizo de urxencias (PAC), a falla dunha sala acondicionada para cirurxía menor, a necesidade de reubicar a área de pediatría e mesmo a de mellorar a accesibilidade á zona de consultas. No encontro de onte tamén se acordou celebrar unha reunión conxunta entre técnicos da Xunta e do Concello, unha vez que estean resoltos todos os trámites, así como unha posible visita á vila de Cedeira do conselleiro de Sanidade, Jesús Vázquez Almuíña, para analizar sobre o terreo a necesaria ampliación do actual Centro de Saúde.

O goberno municipal destacou a “boa sintonía” que hai entre o Sergas e o executivo local para acometer o proxecto de ampliación e expresou a satisfaccion que a día de hoxe existe entre os responsables municipais polos avances conqueridos cara á consecución dun obxectivo “bo para o pobo e necesario para garantir unha sanidade de calidade”.

O acordo plenario que deu lugar á compra das tres plantas do edificio das sindicais foi adoptado por unanimidade na sesión celebrada o día 26 de decembro e a compra pechouse pola cantidade de 60.913,93 euros. A planta baixa, a terceira e o baixo cuberta que foron adquiridas polo Concello eran propiedade da Consellería de Medio Rural.

Cedeira inviste máis de 12.400 euros en substituír as 32 luminarias do pavillón por outras de maior potencia

CEDEIRA INVISTE MÁIS DE 12.400 EUROS EN SUBSTITUÍR AS 32 LUMINARIAS DO PAVILLÓN POR OUTRAS DE MAIOR POTENCIA

O Concello de Cedeira vén de mellorar a iluminación do pavillón polideportivo substituíndo as luminarias actuais por outras de maior potencia. É a resposta do goberno municipal á demanda que viñan realizando tanto os usuarios como os clubs que utilizan as devanditas instalacións para os seus adestramentos e competicións. Esta reclamación ten o seu orixen no ano 2013 cando as luminarias de 400 w foron reemplazadas polas que agora acaban de se retirar.

O proxecto, polo tanto, consistiu na substitución das 32 luminarias actuais de 108 w de potencia por outras de 200, unha mellora que se fixo en base ao estudo lumínico realizado en 2018 pola empresa Grupo Energal para garantir unha visibilidade óptima para o desenvolvemento das actividades deportivas.

A obra, xa executada, foi realizada pola empresa Hallamann Energy e o seu importe ascendeu a 12.465,13 euros. Trátase de luminarias tipo campana, Factory 200 w 5500k.

O alcalde, Pablo Moreda Gil, destacou a satisfacción que a día de hoxe existe entre os usuarios do pavillón e o goberno local pola cobertura e a garantía que representa a obra executada cara á celebración de competicións e mesmo adestramentos nunhas instalacións fundamentais para o deporte local. Moreda recordou que a esta situación se chega pola decisión do anterior goberno de rebaixar a potencia, “deixando en precario a luminosidade da pista polideportiva”.

O número 12 do boletín “As7parroquias” xa está na rúa con temas de actualidade e interese social

O NÚMERO 12 DO BOLETÍN “AS7PARROQUIAS” XA ESTÁ NA RÚA CON TEMAS DE ACTUALIDADE E DE INTERESE SOCIAL

O Concello de Cedeira xa está a repartir entre a veciñanza o número 12 do boletín “As7parroquias”, unha publicación editada polo goberno municipal para acercar a actividade municipal aos veciños e veciñas da localidade.

Neste último exemplar do boletín, que está na rúa desde o ano 2016, os lectores poden atopar temas de moita actualidade como a campaña de recollida de firmas en demanda da construción dun centro de día ou a datación do monumento con forno que sitúa ao xacemento de Campo do Castro no século III a.C. Noutras páxinas, a publicación aborda novidades de interese social, entre os que cabe destacar a compra de camas xeriátricas para cedelas gratuitamente ás persoas que as poidan necesitar e o plan que o goberno local está a levar a cabo coa intención de recuperar elementos da arquitectura popular como poden ser os lavadoiros e as fontes públicas.

A través do boletín a veciñanza tamén pode estar ao día dos proxectos que aínda están por vir dentro do presente mandato. A realización do estudio de impacto ambiental para evitar a deterioración que está a sufrir a praia da Madalena e o proxecto de rehabilitación da antiga cetaria do Sarridal están entre os máis importantes. Aínda que o lugar máis destacado deste número está reservado á concesión do título de fillo predilecto a Álvaro Porto Dapena, un recoñecemento que ocupa o principal oco da portada e mesmo da páxina 5.

Pode descargar o boletín na seguinte ligazón:

IR Á LIGAZÓN Boletín “As7parroquias” nº 12

A compañía Boabab Teatro abrirá este sábado o ciclo de teatro familiar coa obra “Luppo”

A COMPAÑÍA BOABAB TEATRO ABRIRÁ ESTE SÁBADO O CICLO DE TEATRO FAMILIAR COA OBRA “LUPPO”

O auditorio municipal de Cedeira abrirá este sábado, día 12, as súas portas a unha nova edición do ciclo de Teatro Familiar. A programación arrinca coa posta en escena da obra “Luppo” a cargo da compañía Baobab Teatro. A función dará comezo ás 18.00 horas.

Trátase dun espectáculo no que se fala do ciclo da vida, do apego ás persoas máis próximas e da importancia das historias que cada un constrúe ao longo da súa vida. A obra está pensada para nenos e nenas maiores de catro anos e adultos e a súa duración é de 50 minutos.

A programación terá continuidade o día 9 de febreiro, coa obra “Retrete Cabarete”, e o día 16 de marzo coa “Güela Güela”.

This image requires alt text, but the alt text is currently blank. Either add alt text or mark the image as decorative.

A Consellería do Mar comprométese a iniciar os trámites cara á construcción da fábrica de xeo para o porto

A CONSELLERÍA DO MAR COMPROMÉTESE A INICIAR OS TRÁMITES CARA Á CONSTRUCIÓN DA FÁBRICA DE XEO PARA O PORTO

O goberno local e a Confraría de Cedeira arrincaron da Consellería do Mar un primeiro compromiso para comezar a tramitar a construción da fábrica de xeo, unha demanda que se vén reclamando desde hai tempo pola escasa eficiencia da actual para abastecer a frota local de baixura -formada por un 15 barcos- e máis a lonxa, e aos barcos que teñen como punto de amarre o porto cedeirense.

Da realización deste proxecto depende o futuro do porto de Cedeira. Así o entenden tanto o sector pesqueiro local como os responsables municipais, que onte mantiveron unha reunión coa titular da Consellería, Rosa Quintana. No encontro tamén se atopaban presentes a directora de Desenvolvemento Pesqueiro, Susana Rodríguez; o alcalde, Pablo Moreda Gil; o patrón maior, Eduardo González, e a secretaria da Confraría, María Rodríguez.

Os froitos desta reunión comezarán a materializarse nos próximos días co envío por parte da Confraría do orzamento desglosado do proxecto de construción da planta para a fabricación de xeo, valorado en algo máis de 850.000 euros (IVE non incluído). Inicialmente, a Xunta ten a intención de asumir integramente o investimento, para o que ten previsto recorrer ás axudas europeas.

Pablo Moreda Gil valorou este primeiro punto de partida para a realización dun proxecto moi demandado polos profesionais do sector e puxo de manifesto o total apoio da administración local para facer que sexa unha realidade o máis axiña posible. Moreda recordou a importancia que a pesca ten para a economía local e mostrou a súa total disposición a participar en todos os encontros que sexan necesarios para conquerir o devantido obxectivo. Non hai moito o alcalde tamén estivo presente na reunión co presidente de Portos, José Juan Durán Hermida, no que se falou do saneamento do porto e das melloras na recollida de lixo e da iluminación pública.

A Confraría de Pescadores de Cedeira estima nuns 100.000 euros os gastos anuais que está a xerar a actual fábrica polas moitas avarías que ten ao longo do ano -a factura correspondente ao último exercicio superou os 38.000 euros- e polo elevado consumo eléctrico pola utilización duns equipos pouco eficientes desde o punto de vista enerxético, cuxo importe anual está en 55.500 euros. Desde o pósito cedeirense considérase que o futuro da pesca pasa polo funcionamento dunha fábrica que poida dar resposta ás necesidades que demanda a frota, ao tempo que se valora este primeiro compromiso por parte da Xunta para seguir avanzando nese obxectivo.

Cedeira comeza a transformar os espazos públicos en escaparates do “street art”

CEDEIRA COMEZA A TRANSFORMAR OS ESPAZOS PÚBLICOS EN ESCAPARATES DO “STREET ART”

O Concello de Cedeira quere transformar os espazos públicos en arte urbano, unha idea que xa é unha realidade no caso da estación de bombeo situada nas inmediacións do parque do Romeiro. Desde hai uns días a devandita construción xa loce un aspecto totalmente renovado grazas a Adrián Taracido Fernández, o artista que recreou nas seis fachadas da estación as paisaxes e as construcións máis representativas do termo cedeirense.

A garita de Herbeira, o castelo da Concepción, a praza de acceso ao Concello, o monumento dedicado á peixeira, a capela de San Antón e o porto son algúns dos lugares que os veciños e visitantes xa poden recoñecer nas paredes exteriores do edificio.

O importe desta primeira intervención ascendeu a 5.687 euros (IVE incluído) e a intención do equipo de goberno é “loitar contra o feísmo nos espazos públicos e crear distintos museos de balde sen paredes nin teitos”.

O alcalde, Pablo Moreda Gil, destacou a grande aceptación da veciñanza con respecto a esta primeira intervención no parque do Romeiro e apuntou que “queremos facer do pobo un escaparate do street art, ademais de que sexa un recurso turístico atractivo que permita coñecer a nosa vila dende outro punto de vista, dende outro lugar máis amable para o ollo do que mira e ve arte onde antes vía feísmo e ve un espazo de relación social mais habitable”.

Adrián Taracido Fernández está vinculado á empresa que creou para a Asociación “Rampla” uns libriños infantís para colorear, baseado no patrimonio de Cedeira, unha idea que contou tanto coa aprobación da entidade como do público ao que ía dirixida.

A Policía Local de Cedeira realiza unha serie de recomendacións de seguridade para a Cabalgata de Reis

A POLICÍA LOCAL DE CEDEIRA REALIZA UNHA SERIE DE RECOMENDACIÓNS DE SEGURIDADE PARA A CABALGATA DE REIS

Desde a área de seguridade do Concello de Cedeira, e de cara á cabalgata de Reis desta tarde, emítense unha serie de recomendacións para nenos, nenas e maiores co obxectivo de mellorar a seguridade e o desfrute de todos os asistentes:

1.- Seguir as indicacións da Policía Local e a AV Protección Civil.

2.- Antes de saír de casa escriba o seu teléfono de contacto na man ou brazo do menor.

3.- Ensinar aos máis pequenos que facer no caso de que se perdan: buscar a un axente de Policía Local ou voluntario/a de Protección Civil e pedir axuda.

4.- Escoller un lugar seguro onde esperar o paso da cabalgata e non invadir a calzada ao paso da mesma.

5.- Manter aos menores baixo vixilancia intensiva, non permitir que se afasten do seu lado, e manter unha distancia prudente das carrozas.

6.- Non cruce entre carrozas nin permita que o seu fillo/a o faga. Non permita que os/as nenos/ás se introduzan debaixo das carrozas aínda que estean paradas.

7.- Non se suba nin suba aos/ás nenos/as a sitios elevados para ver mellor as carrozas. É un risco innecesario.

8.- Non use paraugas do revés para recoller caramelos. O seu mal uso é perigoso. Non sexa acaparador nin ensine aos/ás nenos/as a selo.

9.- Manteña unha especial atención ás persoas que acudan ás cabalgatas con carros de bebé e con aqueles que teñan mobilidade reducida, persoas maiores ou enfermos para facilitar o seu tránsito e evitar incidencias no paso.

10.- Na recepción real posterior ao desfile, garde a cola pacientemente e ensine aos/ás nenos/as para selo. A ansiedade non lles beneficia.

11.- Unha vez finalizado o acto ou en caso de ordenarse unha evacuación, o máis recomendable para evitar situacións de emerxencia é abandonar o lugar de forma tranquila, rápido pero sen carreiras, e elixindo zonas pouco concorridas.

12.- Se se perde un menor ou observa calquera incidencia, comuníqueo á Policía Local 092 ou aos/ás voluntarios/as de Protección Civil 112.

Fonte: Policía Local de Cedeira

Pode ver o artigo completo na seguinte ligazón:

IR Á LIGAZÓN Recomendacións de seguridade da Policía Local de Cedeira

Campaña de inverno 2019 da Deputación da Coruña

CAMPAÑA DE INVERNO 2019 DA DEPUTACIÓN DA CORUÑA

O concello de Cedeira conta con catro prazas para a campaña de inverno 2019 da Deputación da Coruña, con aloxamentos ubicados na estación invernal de Cabeza de Manzaneda na 3ª quenda do 08/02/2019 ó 11/02/2019.

As idades dos rapaces/zas participantes serán de 11 a 15 anos inclusive (cumpridos a 31 de decembro de 2019).

Cota de participación: 85 €.

O transporte desde a comarca, tanto de ida como de volta está incluído na oferta. Os puntos da comarca onde terá lugar a recollida notificarase con abonda anticipación.

Terán preferencia os/as rapaces/zas que non foran a ningunha campaña da neve da deputación. No suposto de ter máis solicitudes que número de prazas concedidas pola Deputación, realizarase un sorteo público ante a Secretaria do concello para adxudicar as mesmas o día 11 de xaneiro ás 11:00 h. no salón de plenos do concello.

A preinscrición pode facerse de maneira presencial no rexistro (oficinas xerais), a través da sede electrónica do concello cubrindo unha instancia xeral e indicando os seguintes datos:

– Nome da persoa responsable do/a menor (nai, pai, titor/a)

– Enderezo

– DNI

– Teléfono

– Enderezo para efectos de notificación

– Correo electrónico (non imprescindible)

– Nome do/a menor representado/a