NOVAS

O Concello de Cedeira acaba de resolver a adxudicación da obra de reforma e adecuación da EDAR de San Román, licitación á que concurriron tres empresas. O contrato establécese por 57.656,50€ (IVE incluído) e o prazo de execución é de tres meses. A estación depuradora construiuse no ano 2011 e comezou a funcionar de maneira precaria, de maneira que as obras que se van acometer agora son as precisas e esenciais para subsanar as súas deficiencias técnicas e alcanzar o rendemento de depuración para o que foi deseñada.

O Concello de Cedeira afronta a actuación con financiación do POS+2023 da Deputación da Coruña. Entre outras tarefas, o proxecto abrangue a substitución de pezas oxidadas por outras novas de aceiro inoxidable, a limpeza de pozos, o cambio de bombas, a adecuación da maquinaria para que no futuro se poidan realizar os ciclos de mantemento sen parar a instalación, a posta en marcha dun sistema de control e alarmas, un novo cadro eléctrico…

A EDAR de San Román foi deseñada para depurar un caudal diario de ata 150 metros cúbicos, dando servizo a unha poboación de 500 habitantes.

O alcalde de Cedeira, Diego Pablo Moreda Gil, recorda á Xunta de Galicia o problema de contaminación que está afectando ás augas do litoral de Cedeira, con graves consecuencias para os bancos marisqueiros de Pantín, Esteiro e Vilarrube. As analíticas de toda esta zona, na que tradicionalmente as augas tiveron unha excelente calidade, reflicten desde o ano 2020 ocasionais elevacións do índice de E.coli e a situación é cada vez máis frecuente. Fixárase un encontro coa delegada territorial da Xunta, Martina Aneiros, para o 23 de febreiro pero a cita foi adiada por cuestións de axenda. “De maneira que levamos esperando xa 128 días a que os responsables na materia nos reciban e poder tratar este problema, que é moi grave”, explicou o rexedor de Cedeira.

Moreda Gil e o alcalde de Valdoviño, Alberto González, mantiveron a mediados de novembro pasado unha reunión coas mariscadoras que traballan no litoral afectado. Coa detección da contaminación por E.coli, os bancos de ameixa e berberecho foron clasificados como zonas C, de maneira que o marisco alí recollido é reinstalado nunhas xaulas ata que acadan os niveis dunha zona A. Desde a Confraría de Pescadores e Mariscadores de Cedeira alertan de que as últimas analíticas ameazan tamén coa recalificación da praia da Madalena e chaman a atención sobre o feito de que ás veces as analíticas dan uns resultados excelentes e outras saen moi mal, o que fai pensar en que son verquidos puntuais e non constantes.

O alcalde de Cedeira xa mantivera en decembro un encontro co presidente de Portos de Galicia, José Antonio Álvarez, na que se reclamou a este organismo que ordene o saneamento da zona portuaria de Cedeira, que é da súa competencia e na que existen puntos de verquido. “É urxente que os organismos concernidos, entre os que está Portos de Galicia e tamén Augas de Galicia, o Intecmar e as consellerías de Sanidade e Medio Ambiente, adopten medidas urxentes”, reclamou o alcalde de Cedeira. “Non é exclusivamente un problema do marisqueo, que para nós é un sector importantísimo, tamén de saúde pública”, subliñou.

O Concello de Cedeira quere promover as excursións de grupos escolares á Serra da Capelada, nun intento de que a xente nova coñeza de primeira man unha zona de alto valor paisaxístico e xeolóxico, núcleo do Xeoparque Cabo Ortegal que vén de ser recoñecido pola Unesco. O goberno local impulsa o programa da man das empresas de turismo activo Orixen e Portal Norte, que artellaron un programa de actividades que combina xogo, deporte e cultura co fío condutor da “Búsqueda do sanandresiño”.

Nenos e nenas poderán pasar unha xornada de actividades, adaptadas a cada grupo e idades, que se desenvolverá no parque de cordas do Campo de Armada e arredores. A cativada poderá gabear ás árbores e desplazarse entre elas coa axuda das cordas, estruturas de madeira e pontes colgantes que están instalados. No programa da xornada tamén ten cabida o sendeirismo e a orientación, xa que aprenderán a utilizar unha brúxula e terán que buscar con ela as balizas agochadas pola zona, cada unha delas asociada, no xogo, a elementos destacados da paisaxe e o territorio, como son o mar, a propia serra da Capelada, o santuario de Santo André de Teixido…

No programa da xornada ten cabida tamén un achegamento aos valores xeolóxicos da zona, coñecendo algunhas das rochas máis características do Xeoparque e gozando das vistas dos acantilados máis altos de Europa. A procura do “sanandresiño” guiará todo o xogo, co que tamén os participantes aprenderán sobre a cultura da zona e traballarán valores como a importancia dos hábitos saudables e do coidado da natureza.

Os colexios de calquera municipio que desexen organizar unha destas saídas poden poñerse en contacto co Concello de Cedeira para organizala enviando un mail a noel.lopez@cedeira.gal. A actividade un prezo bonificado pola administración local.