Os alumnos do CEIP Nicolás del Río de Cedeira coa campaña “O que se enchufa recíclase”

OS ALUMNOS DO CEIP NICOLÁS DEL RÍO DE CEDEIRA COA CAMPAÑA “O QUE SE ENCHUFA RECÍCLASE”

A campaña de información e sensiblización “O que se enchufa recíclase” está estes días na Praza Roxa de Cedeira, lugar ao que se achegaron os alumnos do CEIP Nicolás del Río. O obxectivo desta campaña é concienciar e informar á cidadanía sobre a importancia de reciclar os residuos de aparellos eléctricos e electrónicos (RAEE) así como sobre os lugares e establecementos que teñen ao seu dispor para desfacerse dos produtos inservibles.

Durante a visita dos alumnos do Nicolás del Río, os informadores de “O que se enchufa reciclase” ofrecéronlles unha pequena charla sobre que son os RAEE, onde depositalos e cales son os beneficios da súa reciclaxe.

Na provincia coruñesa hai 158 contedores repartidos noutros tantos establecementos adheridos á campaña para que os veciños poidan depositar os aparellos que xa non usan ou que deixaron de funcionar. A campaña percorre un total de 138 concellos galegos de máis de 4.000 habitantes. Deles, 67 están na provincia de A Coruña.