Skip to content Skip to left sidebar Skip to right sidebar Skip to footer

Teatro do Atlántico: Libre coma os paxaros

Este evento terminou

Sábado 19 de marzo ás 20.00 h. no Auditorio Municipal.
Teatro do Atlántico presenta: Libre coma os paxaros.
Coa interpretación de María Barcala, a música de Vadim Yukhnevich e baixo a dirección de Xúlio Lago percorremos un camiño que se asenta nos textos de Rosalía de Castro, –poesía, artigos, prosas, lieders-, engarzados con outros materiais acompañados polo pensamento da autora e polo seu compromiso diante dos acontecementos protagonistas na sociedade do seu tempo; un espello no que están presentes os acontecementos do día a día da sociedade contemporánea.
Sinopse:
Unha muller toma a palabra e proclámase posuidora da súa liberdade.
Declara, desafiante, non someterse ás regras da arte no exercicio da súa actividade creativa, nin acatar mandatos dos seus iguais.
Declara o seu amor pola literatura, a poesía e a lingua do seu país; o seu respecto e admiración polas escravizadas mulleres do seu pobo; e expresa a súa solidariedade e a súa dor polas miserábeis condicións de vida que aquelas teñen que soportar.
Denuncia o espolio do patrimonio forestal, a traxedia da emigración á que se ven obrigados centos de miles de compatriotas para poder sobrevivir, eles e as súas familias, á fame e á miseria. E clama contra o silencio que todo o envolve.
Muller.
Filla de nai solteira. E de pai cura. Escritora. E poeta.
Galega de pensamento libre. Libre coma os paxaros.
Chámase María Rosalía Rita de Castro.