MEDIO AMBIENTE

O Concello vai desenvolver o proxecto “Cedeira Mar”, no marco de acción do GALP A Mariña-Ortegal, para poñer en valor o traballo de percebeiros e mariscadoras a través de actividades de sensibilización entre escolares e público en xeral. O programa está valorado en 81.000€ e levarase a cabo desde o presente ano ata o 2022. “Queremos reivindicar o traballo das xentes do mar como un patrimonio de Cedeira, conscientes de que ten atractivo para o turismo e de que é un ben cultural en si mesmo” explicou o alcalde, Pablo Diego Moreda Gil.

O proxecto segue na liña doutros xa rematados ou que están en marcha, no mesmo marco da estratexia europea para o desenvolvemento sostible das zonas de pesca, cos que o Concello de Cedeira quere impulsar unha maior calidade diferencial dos produtos de pesca de baixura e marisqueiros, a dignificación dos oficios de mar, o relevo xeracional e a desestacionalización do turismo. É o caso dos proxectos Pescaturacción; Cedeixura -liderado pola Confraría de Pescadores, ou Emprende Pesca -que o Concello de Cedeira coordina e no que participan tamén os concellos de Valdoviño e Cariño-, os últimos dunha lista máis longa de iniciativas.

O programa de “Cedeira Mar” desenvolverase coa colaboración da Confraría de Pescadores e as súas agrupacións sectoriais, así como do CEIP Nicolás do Río e o IES Punta Candieira. O proxecto abranguerá a realización de obradoiros de sensibilización dirixidos a escolares do municipio nos que se vai destacar o papel das xentes do mar no coidado do medio, utilizando métodos de extracción sustentables na pesca de baixura e no marisqueo artesanal.

O traballo dos percebeiros e percebeiras, e mariscadoras e mariscadores, porase tamén en valor a través da creación dunhas rutas polo litoral cedeirés, nas que a través de diferentes puntos clave para o sector se vai subliñar o seu peso na economía local. Tamén se van deseñar e realizar uns paneis didácticos, que serán móbiles para empregalos en diferentes ocasións, e se vai crear unha imaxe identificativa do proxecto.

O alumnado de 1º da ESO do IES Punta Candieira, igual que onte os de 4º de primaria do CEIP Nicolás del Río, colaboraron nunha acción de recollida de lixo na Praia da Madalena para sensibilizarnos fronte a importancia do coidado do medio mariño.
Sentímonos moi orgullosos de que a nosa mocidade, desde os centros educativos da nosa vila, participen en colaboración coas mariscadoras da Confraría de Cedeira na protección e recuperación da biodiversidade dos ecosistemas mariños a través destas actividades.

Continuando co seu programa de promoción de compostaxe doméstica, e en colaboración con SOGAMA, repartíronse 30 novos composteiros que foron entregados no día de onte aos veciños que así o solicitaron nesta convocatoria 2021.
Ademáis de recoller os dispositivos para compostaxe, os beneficiarios do programa, participaron dunha xornada explicativa sobre o uso dos mesmos. Dende a concellería de medio ambiente móstrase satisfacción pola boa acollida que ten entre a veciñanza esta iniciativa, que leva desenvolvéndose dende o ano 2016 e suma xa máis de 200 familias implicadas na xestión sostible dos residuos.
Do mesmo xeito, comunícaselles a todas aquelas persoas interesadas que realizaron a solicitude e non se lles entregou composteiro, que permanecen na lista de agarda para a vindeira convocatoria.