“AS NOSAS TERRAS. O NOSO FUTURO”

Baixo este lema, hoxe, 5 de xuño celébrase o Día Mundial do Medio Ambiente, efeméride establecida pola ONU no 1972 coa pretensión de sensibilizar á poboación mundial en relación aos temas medio ambientais.

Nesta edición do 2024 céntrase na restauración das terras, detención da desertificación e fortalecemento da resiliencia fronte á seca.

Tendo en conta que un 40% das zonas terrestres do planeta están degradadas, o que afecta de xeito directo á metade da poboación mundial, se non se toman medidas urxentes, as secas poderían afectar a máis das tres cuartas partes da poboación mundial no 2050.

Os ecosistemas de todo o mundo, dos que depende a existencia da humanidade (bosques, terras agrarias, espazos naturais…) están en perigo. Polo que debemos traballar en protexelos e restauralos co obxectivo de garantir un futuro sostible.

Lembrade que coidar do planeta é coidar de nós mesmos e, cada xesto, por pequeno que sexa, conta.