NOVAS

O goberno local quere poñer de manifesto os excelentes resultados que teñen acadado deportistas locais dos clubes de Remo e do Natación Cedeira en diferentes competicións e felicitalos, tanto a eles e elas como aos equipos polo seu traballo.

Oito embarcacións do Club de Remo de Cedeira participaron a pasada fin de semana no Campionato de España de Remo Olímpico que se disputou no Centro Especializado de Alto Rendemento da Cartuja, en Sevilla. Todas resultaron clasificadas nas eliminatorias que se desenvolveron o venres e sete pasaron os cuartos de finais e semifinais –todas excepto o 1xcadete feminino de Lucía Bellas, que remou o domingo na final B, do 7 ao 12º posto, quedando no décimo lugar da clasificación xeral-.

O 1xcadete masculino de Marcos Casal quedou ás portas do pódium, no cuarto posto, no comezo da decisiva xornada do domingo, a última da competición. Raquel Rodríguez e Candela Martínez acadaron a continuación o ouro e a prata na proba do 1x sub23 feminino. O equipo 4- formado por Iván González Fraguela, Bruno López Torres, Agustín González Fraguela e Iago Ortiz Apac quedou de quinto mentres que Raúl López Iglesias e Joaquín Montero Gómez obtiveron o bronce nunha final moi disputada na que estiveron preto de levar a prata. Para rematar a xornada volveron a remar Raquel Rodríguez e Candela Martínez, no 1x absoluto feminino, proclamándose respectivamente gañadoras do ouro e o bronce.

Así, o Remo Cedeira acadou o segundo posto do trofeo Iberdrola polo seu medalleiro, con dous ouros, unha prata e un bronce. Os bos resultados obtidos fixeron que Raquel Rodríguez e Candela Martínez foran seleccionadas para representar a España no Campionato do Mundo sub23 que se vai celebrar en agosto en Canadá, aínda que a primeira renunciou á convocatoria.

O Natación Cedeira está tamén de noraboa. O seu deportista Lucas Riola proclamouse campión de España xuvenil de triatlón, nunha proba na que o seu compañeiro Damián Suárez quedou quinto despois dunha carreira moi boa na que foi case todo o tempo en segundo lugar. O equipo cedeirés masculino conseguiu o quinto posto entre os 50 que concurriron ao campionato, así como o séptimo lugar por equipos en categoría feminina, na que destacou a actuación de Lara Solsona, no décimo cuarto lugar.

A pasada fin de semana o Natación Cedeira tamén destacou no campionato galego de Triatlón, no que o ouro foi para Damián Suárez, con Lucas Riola desta volta en terceira posición e Samuel Sánchez na sexta. Desde o club tamén subliñan que Irene García Nebril e Noa Villadóniga Sanesteban foron convocadas para participar esta fin de semana no Campionato de España por Autonomías, que se vai disputar en Mérida.

Por outra banda, Cedeira volveu do Campionato Galego de Natación cos ouros das probas de de 800 e 400 libres, que gañou Roque Caneiro, así como o terceiro posto nos 100 metros libres. O próximo domingo, o club cedeirés participará no Campionato de Europa Biatle que se vai disputar en Madeira.

O Concello de Cedeira promove este verán un programa de visitas guiadas gratuítas polo núcleo de Santo André, por un lado, e pola vida e as tradicións mariñeiras da vila, por outro. Este próximo sábado 29 ponse en marcha un calendario de 23 visitas de aquí a setembro, 11 pola Cedeira mariñeira e 12 polo núcleo de Teixido, que correrá a cargo de Sergio Muíño, impulsor dos proxectos de desenvolvemento local e turístico Eu fun de vivo e Destino Cedeira.

O programa inaugúrase este sábado 29, ás 11.00h, coa visita guiada “Cedeira e o mar”. O punto de encontro será o Palacete Municipal, onde está a oficina de turismo, e o percorrido prolongarase durante preto de dúas horas, nas que os participantes coñecerán o patrimonio mariñeiro da localidade, tanto o actual como o que xa non se pode ver, como as antigas fábricas de salazón, o vello malecón ou o secadeiro de redes.

As visitas “Cedeira e o mar” serán, ademais deste sábado, os días 7, 12, 21 e 28 de xullo; 4, 11, 13, 15 e 16 de agosto e 15 de setembro, sempre ás 11.00 e con saída desde o Palacete.

O sábado 6 de xullo será a primeira visita a Santo André, na que o punto de encontro será a marquesiña do autobús, á entrada ao núcleo de Teixido, tamén ás 11.00 horas. O percorrido durará unha hora e durante o mesmo falarase da historia, as tradicións e lendas ligadas a este singular lugar, así como da vida da xente e a organización do territorio e sobre curiosidades da contorna.

Neste caso, as visitas a Santo André de Teixido serán os días 6, 13, 20 e 27 de xullo; 3, 10, 12, 14 e 18 de agosto, e 14, 22 e 29 de setembro.

As persoas interesadas deberán inscribirse en cada unha das visitas durante a semana anterior a cada unha, ben a través do formulario online habilitado –ao que se pode acceder desde o QR dos carteis- ou ben enviando unha mensaxe por Whatsapp ao número 660 05 83 48. O calendario pode estar suxeto a cambios, dos que se informará a través da web do Concello e a canle de difusión por Whatsapp Cedeira Informa, así como nas redes sociais de Eu fun de vivo e Destino Cedeira.
inscricións: https://forms.gle/8eFZzF9maVUAKxsK9

Cedeira acollerá nos vindeiros meses de xullo e agosto catro veladas científicas e culturais nas que persoas vencelladas de diferentes maneiras á localidade ofrecerán charlas divulgativas sobre as súas áreas de coñecemento e as súas experiencias. O ciclo de actividades leva por título “Cedeciencia” e é unha mostra máis do espíritu bulideiro e emprendedor da sociedade cedeiresa.

David Vilela, un doutor en Enxeñería Industrial adicado á enxeñería de software, máis específicamente á creación de sistemas multiaxente para intelixencia artificial distribuída; Sara Abuín, psicóloga integrativa e musicoterapeuta; Juan Antonio Rodríguez Pérez, doutor en Bioloxía Evolutiva e adicado á investigación en xenómica estrutural; e Sergio Muíño, investigador en turismo e impulsor da iniciativa Eu Fun de Vivo –www.eufundevivo.com-, son os artífices deste programa de charlas, que se vai desenvolver en escenarios pouco formais e acordes coa finalidade divulgativa que ten todas as actividades.

Tal como explica Sergio Muíño, a participación de todos os relatores é desinteresada e algúns deles traballan e residen en lugares afastados como Noruega, Dinamarca ou Reino Unido, porén comparten o seu vencello a Cedeira. A finalidade é achegar á veciñanza de Cedeira, e en xeral a calquera persoa interesada, temas científicos e culturais de actualidade co máximo rigor, pero tamén dunha maneira amena e sinxela.

O venres 5 de xullo será a primeira cita. O café bar Pinzón acollerá a reunión, a partir das 19.30h. En primeiro lugar falarán os mozos e mozas que están a participar no Hiperbaric Challenge, que se vai desenvolver esta próxima fin de semana en Burgos. Despois da exposición sobre este reto técnico chegará a quenda de David Vilela, que ofrecerá a charla titulada “Poñerlle o cascabel á IA”. Rubén Vilela, por último, falará sobre o impacto do Big Data no mundo e nos negocios.

A seguinte cita será o venres 19 de xullo, no café bar O Mástil. Desta volta, tamén a partir das 19.30, Sara Abuín ofrecerá a charla “Soo a vento: a figura sinestésica na expresión emocional”, que dará paso á intervención da Lucía Álvarez, titulada “Sexoloxía sen filtros, separando mitos e realidade”.

Xa en agosto, Cedeciencia fixou outras dúas citas para os días 3 e 9. A primeira será no Museo Mares, ás 12.00 horas, e nela falarán Sergio Muíño, que abordará a creación dun produto turístico cultural en Cedeira; o artista Adrián Taracido, que titulou a súa charla “Dando cor a Cedeira”, e Adrián Piñón, que falará sobre “A caza de bruxas”. O día 9, ás 19.30h no café Sonreiras, Jorge Salgado falará sobre “Edificios intelixentes: a enerxía do futuro xa está aquí” e Roberto Mourente pechará o programa cunha charla sobre “O que descoñecemos sobre o patrimonio biolóxico da Serra da Capelada”.

A intención dos organizadores é manter o impulso de Cedeciencia ao longo do ano, concertando outras charlas co mesmo corte divulgativo.