NOVAS

O CONCELLO DE CEDEIRA TOMA MEDIDAS PARA EVITAR NOVOS DERRUBAMENTOS
SOBRE A ESTRADA DO PORTO

O presidente de Portos de Galicia, José Juan Durán, acudiu esta mañá a Cedeira, a instancias do seu goberno local, para visitar a zona que resultou afectada a pasada semana polo derrubamento dun ribazo sobre a estrada que vai ao peirao. No percorrido estivo acompañado polo alcalde, Pablo Moreda; a primeira tenente de alcalde, María Xosé
Rodríguez López; o concelleiro de Deportes, Nicolás Vergara; e a patroa maior da Confraría de Pescadores de Cedeira, Lucía Villar.

Na visita acordouse que Portos de Galicia vai acometer unha corta das árbores que aínda poden significar perigo ou contribuír a novos derrubamentos, e tamén que retirará uns depósitos de auga que están na zona e poden afectar á súa estabilidade. A actuación abranguerá unha franxa duns 50 metros arredor do punto no que se produxo o deslizamento da pasada semana.
Nesta mesma liña, o alcalde de Cedeira, Pablo Moreda, informou de que xa se ten localizados aos propietarios das 45 parcelas de monte que están próximas ao lugar e que de maneira inmediata se lles vai requirir que corten os eucaliptos que crecen na zona e que, pola súa envergadura,poñen en perigo a estabilidade do terreo. Moreda explicou que no mesmo requirimento se lles informará de que a Lei de Montes en vigor prohíbe a prantación destas árbores a menos de 50metros das vivendas.

O interese do goberno municipal é garantir a seguridade da zona e que non se repitan incidentes como o acontecido, que afortunadamente non supuxo ningún dano persoal.

“O MESÓN” ÁLZASE CO PRIMEIRO PREMIO DA SEGUNDA EDICIÓN CO CERTAME
DE TAPAS DE MERLUZA DE CEDEIRA

A segunda edición da Festa da Merluza, que durante os últimos sete días encheu de actividades e citas gastronómicas á vila de Cedeira, pechou hoxe co reparto das últimas racións e coa entrega dos premios do II Concurso de Tapas de Merluza.

Este último acto tivo lugar pasadas as dúas da tarde e contou coa presenza de representantes do Concello e máis da Confraría de Pescadores da localidade, colaborador e organizador, respectivamente, do programa.

Segundo o xurado popular as mellores propostas gastronómicas para degustar a merluza da volanta foron as presentadas polos locais O Mesón, que quedou primeiro cao tapa “Merluza en tempura de primaveira”. O segundo premio correspondeulle a Mesón Jojó pola “Hamburguesa de merluza” e o terceiro foi para o mesón O Amanexo pola súa proposta de “Merluza confitada con pil-pil de berberechos y espuma de codium”.

O resultado foi moi axustado, segundo os convocantes, que tamén destacaron o traballo dos locais participantes e a alta calidade das propostas presentadas ao certame. O concurso reuniu un total de 16 establecementos de hostalaría da vila de Cedeira, catro máis que na pasada edición.

XEORUTAS

O programa das xeorutas que o Concello de Cedeira organiza para dar a coñecer a riqueza xeológica do municipio dará comezo hoxe coa celebración da primeira das saídas, a denominada do Cromo. É unha ruta de baixa dificultade e cun percorrido duns seis quilómetros. Ao día seguinte, será a ruta das Praias Negras a que levará aos participantes, as quince prazas levan días xa esgotadas, a descubrir a única praia de area negra non volcánica do planeta.