NOVAS

CEDEIRA RECUPERA ESTA FIN DE SEMANA O MERCADO MEDIEVAL, QUE SE SITUARÁ NA PRAZA ROXA

Despois de catro anos sen mercado medieval, a vila de Cedeira recupera esta celebración cara á fin de semana (21 e 22 de xullo). A iniciativa parte do Grupo de Hostalería da Praza Roxa, do que participan os donos de 11 locais da zona, e reunirá, segundo a organización, a un total de 35 postos de venda, nos que haberá desde alimentación ata produtos de artesanía, pasando por algunhas novas incorporacións, como pode ser a dos kebabs.

Laura Suárez Colina é o nome da empresa que está á fronte dunha convocatoria coa que se pretende, segundo os hostaleiros, dinamizar a praza Roxa e encher de contidos dúas importantes xornadas do mes de xullo.

A feira, que ocupará o perímetro dunha das prazas máis céntricas e concorridas da vila cedeirense, abrirá ao público en horario de mañá e tarde, de 11.00 a 14.30 e de 18.00 a 22.30 horas, aínda que este pode variar en función da meteoroloxía, segundo a organización.

A convocatoria incluirá un programa de animación nas rúas, a cargo do grupo Turdión, e actividades especialmente dirixidas aos visitantes máis novos, entre as que se prevé a celebración de obradoiros nos que os nenos acabaran con as súas facianas pintadas.

O Concello colabora na celebración desta iniciativa, á que os seus máximos responsables invitan a sumarse á veciñanza e a todas as persoas que desexen desfrutar dunhas xornadas diferentes nunha vila chea de recursos de ocio e gastronómicos.

CARTA DO ALCALDE #SÚMATEDOASANGUE

Estimados veciños e veciñas:

Os hospitais precisan preto de 10.000 doazóns de sangue cada mes para atender a todos os enfermos e diríxome a todos vos para que participedes nesta campaña solidaria. Podes doar sangue se tes entre 18 e 65 anos e pesas máis de 50 quilos. Persoal sanitario revisará a túa saúde antes da doazón de sangue:

A unidado móbil instalarase na parado do bus da Praza de Galicia o xoves día 2 de agosto e o venres día 3 nos seguintes horarios:

• Xoves 2 de agosto: de 10.00 h a 14.00 h; e de 16.00 h a 21.00 h.
• Venres 3 de agosto: de 16.00 h a 21.00 h.

Non acudas sen almorzar e despois do xantar espera 2 horas. Non esquezas traer o DNI, e informa ao médico da unidade móbil se estas a tomar algún medicamento.

Máis información:
http://ados.sergas.es
Twitter: @doadoressangue
Facebook: https://www.facebook.com/doadoressangue

Cedeira, acadou unha taxa de 43 doazóns por cada 1.000 habitantes en 2017, o obxetivo é manter a participación dentro das cifras que recomenda a Organización Mundial da Saúde (40 a 60 doazóns por 1.000 habitantes).

Queremos facer un agradecemento especial as persoas que participan cada ano nas campañas de doazón de sangue. Grazas a este xesto solidario, os hospitais atenden aos enfermos de cancro e leucemia e levan a cabo cada día unha media de 2.700 urxencias, 500 intervencións cirúrxicas e 3 transplantes de órganos e tecidos.

Neste verán os enfermos non toman vacacións e moitas persoas dependen da nosa solidariedade para recuperar a saúde. Grazas pola vosa colaboración.

Descarga o dossier de doazón de sangue verán 2018

ABERTO O PRAZO DE SOLICITUDES DE MONTAXE ATRACCIÓNS DE FEIRA E POSTOS VENDA EN FESTAS PATRONAIS CEDEIRA 2018

Ata o 31 de xullo esta aberto o prazo para presentar solicitudes para montaxe de postos e atraccións de feira nas Festas Patronais de Cedeira 2018.

As solicitudes deberán recollerse nas oficinas da Policía Local e presentarse debidamente cumprimentadas para poder optar aos postos marcados e limitados no espazo asignado a tal fin. As solicitudes deberán presentarse antes do 31 de xullo para poder instalarse durante as Festas Patronais que este ano irán do 10 ao 17 de agosto.

A Policía Local efectuará un control estrito sobre as autorizacións dando cumprimento á nova Lei de Espectáculos Públicos e Actividades Recreativas que entrou en vigor o pasado 2 de xullo, e que entre outros obriga aos titulares de atraccións de feira a presentar unha declaración responsable, a dispoñer de seguro de responsabilidade civil subscrito cunhas cantidades mínimas, e a designar unha persoa que asuma a responsabilidade técnica da montaxe da instalación.

Doutra banda, como medidas de precaución que xa se empezaron a adoptar o ano pasado, esixirase a todos os postos, independentemente do seu tamaño, unhas medidas mínimas como cadro eléctrico homologado, ancho de vía mínimo libre de 3 mt., altura mínima de cables eléctricos, prohibición de tendido de cables que atravesen a vía a nivel do chan, etc.

DESCARGA PDF Solicitude Declaración Responsable Postos Feira