Cedeira se estrea este venres como lugar de encontro co teatro de afeccionados

CEDEIRA SE ESTREA ESTE VENRES COMO LUGAR DE ENCONTRO CO TEATRO DE AFECCIONADOS

O mundo da escena chegará mañá venres a vila de Cedeira da man da Asociación de Teatro Aficionado Parteluz que, baixo a dirección de Víctor Díaz Barús, representará a obra “A noite vai como un río” de Álvaro Cunqueiro. E así, deste xeito, o arte das táboas incorporarase ano tras ano á vida dos cedeires coa celebración do Certame de Teatro Afeccionado, unha convocatoria que comeza este outono e que ven sendo unha das grandes apostas do equipo de goberno no campo da cultura.

“A noite vai como un río” é unha pequena obra mestra, segundo algúns críticos, na que o autor galego abandona os seus mitos para escribir unha peza na que predomina o elemento lírico. A asociación Parteluz representou a obra por primeira vez no mes de xuño no centro Ágora da Coruña.

Esta primeira cita coa arte escénica dará comezo ás oito da tarde, terá lugar no auditorio municipal e para vela non haberá que pagar entrada.

O certame terá continuidade os días 18 e 25 do presente coa participación da Asociación Pico do Castro, que representará a obra “O consultorio”, e a entidade O aturuxo de Melpómene, que porá en escena “Misterios” de Paula Carballeira.