Skip to content Skip to left sidebar Skip to footer

URBANISMO

A Deputación investirá máis de 100.000 euros en obras de mellora na estrada que comunica Punta Candieira coa ermida de Santo Antonio

A DEPUTACIÓN INVESTIRÁ MÁIS DE 100.000 EUROS EN OBRAS DE MELLORA NA ESTRADA QUE COMUNICA PUNTA CANDIEIRA COA ERMIDA DE SANTO ANTONIO

O pleno da Deputación da Coruña aprobou esta semana un investimento de 101.406,90 euros para financiar as obras de pavimentación e mellora da estrada provincial DP 2204, de Punta Candieira á ermida de Santo Antonio, un asunto que o equipo de goberno valora como un novo compromiso da institución provincial coa veciñanza cedeirense.

Este novo compromiso, sumado á inversión xa realizada de case 514.000 euros na estrada DP 2205 (Santo André- A Pedra) e a prevista de case 750.000 euros para acometer a variante das Pontigas, é “unha boa mostra de que a Deputación sempre está a atender aos pedimentos que se fan desde o Concello Cedeira”, apuntou o alcalde, Pablo Moreda Gil. O primeiro edil tamén confía en que a Xunta contribúa agora á mellora das infraestruturas locais coa execución do proxecto para eliminar as curvas de Landeira, “o que viría representar a engalaxe definitiva de Cedeira en materia de comunicación viaria”.

O acordo aprobado agora polo pleno representa a execución dun proxecto que se desenvolverá ao longo dun tramo de 3,34 quilómetros, no que se acometerán traballos de apertura de cunetas en ambas marxes da estrada, así como o desbroce de ribadas e a realización de beiravías. Tamén se prevé a reparación de fochancas e desniveis e a pavimentación de toda a vía cunha mestura en quente de cinco centímetros de grosor. O proxecto, cun prazo de execución de tres meses a partir do inicio das obras, inclúe así mesmo unha nova sinalización vertical e horizontal.

A intervención está incluída na terceira fase do Plan de Conservación de Vías Provinciais 2017, unha iniciativa da Deputación da Coruña para mellorar o estado e a seguridade viaria en todas as estradas que son da súa competencia.

O Concello de Cedeira recorre á arbitraxe da deputación para desatascar o peri de xunqueira

O CONCELLO DE CEDEIRA RECORRE Á ARBITRAXE DA DEPUTACIÓN PARA DESATASCAR O PERI DE XUNQUEIRA

Os 1.500 folios que conforman o expediente do Plan Especial de Reforma Interior (PERI) – Unidade de Execución Integral 1 da Xunqueira xa se atopan no servizo provincial de Asistencia a Municipios. O goberno local de Cedeira decidiu recorrer á arbitraxe da Deputación nun intento de desatascar a tramitación do plan, promovida por un particular, tras máis dunha década desde que se aprobase inicialmente, o 11 de xaneiro de 2007. «Estase dando un paso moi importante, este asunto está enquistado, naceu en 2006 e xa pasaron diferentes técnicos e gobernos locais. Entendemos a preocupación e malestar existente por parte da propiedade por un proxecto tan complexo, o máis complexo dos que levan pasado polo Concello en 15 anos, e pretendemos desbloquear a situación. É unha actuación moi importante para a propiedade e tamén para o Concello, porque unha parcela pasará a disposición da Administración local», sostén o alcalde, o socialista Pablo Moreda.

A concelleira de Urbanismo, a nacionalista María Xosé Rodríguez, comparte a necesidade de sacar adiante este proxecto. Da Deputación sairán senllos informes xurídico e técnico «e esa conclusión determinará por onde se debe proceder», subliña o mandatario local, aínda que non se trate dun ditame vinculante.

A familia que promove o PERI criticou tanto ao actual executivo local como ao anterior polo atraso na tramitación e as trabas.

Fonte: La Voz de Galicia
Pode consultar a nova na seguinte ligazón:
IR Á LIGAZÓN O Concello de Cedeira recorre á arbitraxe da Deputación para desatascar o PERI de Xunqueira

 

O Concello pide a colaboración de todas as formacións políticas para reivindicar a mellora da estrada 566

O CONCELLO PIDE A COLABORACIÓN DE TODAS AS FORMACIÓNS POLÍTICAS PARA REIVINDICAR A MELLORA DA ESTRADA 566

Crear emprego, favorecer o asentamento poboacional, mellorar a seguridade viaria e tamén a saúde. Estas son as razóns nas que se apoia o Concello de Cedeira para pedir á Xunta de Galicia que realice unha importante inversión na AC-566, única vía de comunicación da vila coa comarca de Ferrol. Son as mesmas que hai uns días explicaron persoalmente o alcalde, Pablo Moreda Gil, e mais a concelleira de Urbanismo, María Xosé Rodríguez, á titular da Consellería de Infraestruturas e Vivenda, Ethel Vázquez Mourelle.

O encontro tivo lugar o pasado martes e nel volveuse a falar, por parte da representante da Xunta, de acometer a mellora integral da estrada en sucesivas fases, dado o elevado custo que precisa a obra. A Consellería de Infraestruturas dispón dun proxecto cuxo orzamento de execución é de 14 millóns de euros para o conxunto da estrada. A proposta da Xunta, da que xa se ten falado co Concello, pasa por comezar a obra cunha primeira intervención no tramo coñecido como o das curvas de Landeira, un traxecto de algo máis de dous quilómetros de moi difícil trazado. O orzamento estimado para a súa execución ascende a 4,3 millóns de euros.

O equipo de goberno non ten problema en empezar por un ou outro tramo sempre que o resultado final sexa a mellora tanto da seguridade das persoas que circulan pola vía como da calidade de vida dos veciños de Cedeira. A estrada, segundo apuntou o alcalde, é fundamental para xerar emprego, para evitar a perda de poboación e, en xeral, para garantir o futuro económico e social da vila, así como para que resulte moito máis curta unha viaxe en ambulancia ata o complexo hospitalario de Ferrol.

Por esta cuestión, o equipo de goberno invita a todas as formacións políticas con presenza no concello, teñan ou non representación municipal, a que participen dunha reivindicación que ten como obxectivo alcanzar un ben común tan importante como é, no caso de Cedeira, ter unha vía de comunicación adaptada ás necesidades da xente. O executivo local advirte de que non ten intención de abandonar a loita para conseguir que dentro do actual mandato comece, aínda que só sexa co inicio dos trámites, o proxecto de mellora da citada estrada.

A titular da Consellería de Infraestrutura e Vivenda comprometeuse a seguir falando do tema nunha nova entrevista, que non se prevé que sexa antes dos primeiros meses do 2017.