Skip to content Skip to left sidebar Skip to footer

Author: MonicaFdz

A partir de mañá poden solicitarse as subvencións municipais para clubs e entidades deportivas correspondentes ao 2020

Desde mañá martes 4 de agosto e ata o próximo 24 do mesmos mes, os clubs e entidades deportivas inscritas no rexistro municipal de asociacións do Concello de Cedeira poderán presentar a súa solicitude de subvención tanto para investimentos como para actividades para o ano 2020.

As subvencións para actividades teñen como finalidade apoiar e mellorar a práctica deportiva dos clubs e entidades deportivas, subvencionando os programas de actividades deportivas a desenvolver, referidos a proxectos de iniciación deportiva, fomento da práctica e competición deportiva; podendo consistir en programas, eventos ou competicións deportivas concretas ou na actividade ordinaria anual do club ou entidade deportiva solicitante.

Pola súa banda, as axudas para investimentos teñen como finalidade apoiar e mellorar a práctica deportiva dos clubs e entidades deportivas subvencionando investimentos de natureza inventariable tales como inmobles, mobles ou outros susceptibles de inventario cun custo superior a 100,00 €. O obxecto do investimento deberase manter no inventario da entidade ou asociación beneficiaria durante un mínimo de dous anos, contando dende o momento da súa adquisición.

O procedemento asignado para a concesión das distintas solicitudes tanto para as subvencións de actividades como de investimentos será en réxime de concorrencia competitiva, mediante a aplicación dos criterios de concesión que se desenvolven nas bases e que son: o fomento do coñecemento do deporte base, fomento da participación feminina no deporte, organización de actividades, torneos, eventos, etc., antigüidade do club, número de deportistas que compoñen o club ou entidade deportiva, número de técnicos deportivos titulados e acreditados., menor importe da cota mensual, emprego da lingua galega , e compromiso de colaborar coa Concellería de Servizos Sociais para que ningún menor en risco de exclusión social quede fóra dos clubs ou entidades deportivas por razóns económicas.

Nas seguintes ligazóns poden descargarse as bases das axudas publicadas que inclúen os anexos coas solicitudes e demais documentación requerida:

IR Á LIGAZÓN Bases reguladoras para a concesión de subvencións para actividades a clubs e entidades deportivas de Cedeira para o exercicio 2020

IR Á LIGAZÓN Bases reguladoras para a concesión de subvencións para investimentos a clubs e entidades deportivas de Cedeira para o exercicio 2020

Xa está en marcha o curso do “Xeoparque do Cabo Ortegal, pisando o interior da terra”

Xa deu comezo o curso do “Xeoparque do Cabo Ortegal, pisando o interior da terra” que se desenvolve en Cedeira e a comarca do Ortegal estes días, organizado por AEPECT‐Galicia e o Concello de Cedeira.

Este curso da AEPECT‐Galicia ten por obxectivo principal coñecer un pouco mellor a xeoloxía dun dos lugares con maior interese xeolóxico do continente europeo. É que Cabo Ortegal posúe entre outros hitos xeolóxicos, o maior afloramento de ecloxitas do planeta, unha das máis completas unidades ofiolíticas do mundo, a única praia de area negra non volcánica presente na Terra.Todos estes lugares xunto con outros moitos poderán ser visitados nestas xornadas.

Hoxe martes 21, no Auditorio Municipal de Cedeira haberá unha serie de conferencias plenarias de distintos expertos como apoio e difusión da candidatura de Cabo Ortegal como xeoparque mundial da Unesco. Os relatores desta xornada co‐organizada pola AEPECTGALICIA e o Concello de Cedeira, e abertas ao público en xeral, serán:

‐ 10:30 ‐‐ Presentación das xornadas
‐ 11:00 ‐‐ “Patrimonio xeomorfolóxico de Ferrolterra e Ortegal”. A cargo de Augusto Pérez Alberti
‐ 12:00 ‐‐ Descanso
‐ 12:30 ‐‐ “Geoparque Terra de Cavaleiros, diferenzas e similitudes con Cabo Ortegal”. A cargo de João Alves
‐ 13:30 ‐‐ Pausa para o xantar
‐ 16:30 ‐‐ “Como se gestiona un geoparque, el ejemplo de Las Loras”. A cargo de José Ángel Sánchez
‐ 17:30 ‐‐ “Xeoparque do Cabo Ortegal, pisando o interior da Terra”. A cargo de Francisco Canosa
‐ 19:00 ‐‐ Descanso
‐ 19:30 ‐‐ Mesa redonda
‐ 20:30 ‐‐ Peche da xornada. Despois recepción e entrega das chaves no hotel Herbeira en Cedeira

Mañá mércores e o xoves pola mañá, realizaranse diferentes saídas de campo para coñecer varios dos lugares con maior patrimonio xeolóxico do Cabo Ortegal, dirixidas por Francisco Canosa, e as que participarán os relatores convidados.

O xoves 23 pola tarde haberá dúas actividades opcionais:
‐ Paseo xeolóxico guiado en barco polo litoral entre Cedeira e Cariño (sempre que as condicións marítimas e meteorolóxicas o permitan). No barco só haberá 24 prazas dispoñibles, en quendas de 12 persoas.
‐ Visitas guiadas ao xacemento arqueolóxico de punta Sarridal e ao museo “Mares de Cedeira”.
Ámbalas dúas terán unha duración de 2 horas e 15 min aproximadamente.

Os concellos non teñen competencias para a realización de test do COVID-19 fóra do sistema sanitario

A Federación de Municipios e Provincias Galegos vén de publicar unha circular na que advirte de que calquera proba diagnóstica do COVID-19 realizada fóra do sistema sanitario non ten validez a ningún efecto e pregando aos concellos a que contribúan á correcta información da cidadanía e calquera entidade, empresa ou institución.

Esta circular é a resposta da Fegmap á consulta realizada polos Concellos para coñecer o alcance das súas competencias ao respecto da posibilidade de realizar probas diagnósticas do COVID-19. A Fegamp, tras dar traslado de dita consulta á Xunta de Galicia, aclara que o uso de probas diagnósticas non só excede as competencias municipais senón que pode ter un efecto negativo nos esforzos por conter a pandemia ao dar unha radiografía errónea da situación epidemiolóxica, xerando falsas expectativas.

Desde a Fegamp e o Concello de Cediera faise un chamamento á prudencia e responsabilidade, insistindo en que os test deben pasar a supervisión das autoridades sanitarias para que garantan a súa efectividade e seguridade.