As actividades do programa de envellecemento activo de Cedeira darán comezo o próximo luns

AS ACTIVIDADES DO PROGRAMA DE ENVELLECEMENTO ACTIVO DE CEDEIRA DARÁN COMEZO O PRÓXIMO LUNS

As actividades do proxecto Envellecemento Activo promovido polo Concello de Cedeira entre as persoas maiores arrincarán o vindeiro luns con dúas das tres convocatorias pensadas para a presente tempada. A programación amplía o seu tempo de duración- en total serán seis meses- e chegará a máis parroquias.

As clases de zumba -que foron moi demandadas polo colectivo- e o obradoiro de memoria son as primeiras en dar comezo. Os luns, martes e xoves a sala Áncora acollerá as sesións de zumba -a partir das once da mañá-, mentres que a relativa á memoria terá carácter intinerante. Así, os martes -ás 17,15 horas- e os xoves -as 16.00 horas- o obradoiro impartirase no centro social de Esteiro, e os martes e mércores, a partir das catro da tarde, trasladarase a Sisalde. Na parroquia de Montoxo a actividade terá lugar os martes e xoves, ás 17.15 horas, e na de Santalla tamén será os martes e xoves, pero despois das 18.30 horas. No caso da vila, o programa impartirase os luns e venres en dúas quendas, ás 16.00 e 17.30 horas.

A terceira actividade, segundo adiantou a concelleira de Servizos Sociais, Manuela López, será a ximnasia terapéutica e as sesións darán comezo nos próximos días. López estimou que a participación total desde ano superará as cen persoas.