Unha media de 50 persoas visitan cada día o Castelo da Concepción de Cedeira

Unha media diaria de 50 persoas visitan o castelo da Concepción desde que o pasado día 22 abrira as súas portas nunha campaña que se prolongará ata o próximo mes de outubro. Ata entón esta fortificación defensiva do século XVIII permanecerá aberta ao público de martes a venres de 13.00 a 19.00 horas, os sábados de 11.00 a 19.00 e os domingos de 11.00 a 14.00 horas.

As visitas guiadas, que manteñen o seu carácter gratuíto, serán ás 13.00 e ás 18.00 horas. Victoria Fornos Saavedra é a técnico de Turismo que se encarga de explicar aos visitantes as caraterísticas dunha construción que garda certa similitude cos castelos de San Felipe, no Concello de Ferrol, e o da Palma, no de Mugardos, xa que as tres fortalezas xurden da necesidade de defender os respectivos territorios ante a ofensiva dos navegantes británicos.

Nun itinerario duns 30 minutos de duración, os turistas percorren as estancias do castelo da Concepción, nas que permanecen expostas maquetas da construción, copias de planos do século XVIII, informes militares, armas e municións e os canóns ameazadores que evitaron a presenza dos atacantes.

Este ano a pandemia da Covid-19 acoutou a visita exclusivamente ao interior do recinto defensivo pola necesidade de garantir a aplicación das medidas de seguridade: utilización da máscara e a distancia de dous metros entre persoas.

A concelleira de Turismo, Carmela Prieto Cal, recordou que o castelo pasará a acoller, despois das obras de reforma que darán comezo en setembro, os obxectos e imaxes das seis campanas de escavacións arqueolóxicas levadas a cabo ata de agora no xacemento do Sarridal. O investimento da actuación prevista está próximo aos 40.000 euros.