O programa “Música na rúa” dará lugar a cinco actuacións durante a segunda quincena deste mes
O PROGRAMA “MÚSICA NA RÚA” DARÁ LUGAR A CINCO ACTUACIÓNS DURANTE A SEGUNDA QUINCENA DESTE MES
O Concello de Cedeira activa para a segunda quincena deste mes unha nova edición do programa Música na Rúa, que este ano chega ao seu quinto ano consecutivo e que arrincará o próximo domingo coa primeira das citas. Esta será na praza Floreal e terá como protagonista a banda de música Vila de Cedeira, cuxas interpretacións darás comezo ás 13.00 horas.
Posteriormente, a actividade trasladarase á xornada do día 21 coa actuación do grupo As Aturuxeiras, a partir das 13.00 horas, na praza do Concello.
A fin de semana máis intensa en canto a convocatorias musicais será durante a ponte do Apóstolo, na que haberá un total de tres. A primeira delas terá lugar o mesmo día da festividade de Santiago, data na que Buxainas actuará ás 13.00 horas na praza da Marieta, mentres que as dúas últimas serán o sábado 27 de xullo. Así, o paseo da Mariña acollerá, ás 13.00 horas, a intervención do grupo Acordeóns de Cedeira e pola tarde, a partir das sete, será o Festival Folclórico que, organizado pola asociación Buxainas, celebrarase na praza Roxa.
