Skip to content Skip to left sidebar Skip to footer

FORO PARA A PROMOCIÓN DO EMPRENDEMENTO NOS SECTORES PESQUEIRO E TURÍSTICO DE CEDEIRA

Este mércores 19 de outubro as 18:30 horas, o Concello de Cedeira organiza, na sede da Confraría de Pescadores de Cedeira, un foro para o fomento do emprendemento na vila.

Co proxecto PESCATURACCION promoveuse o nacemento de novas ideas emprendedoras nos sectores do mar, natureza e do turismo, que son clave para o desenvolvemento económico e social da vila.

Con esta xornada quérese incentivar o emprendemento neses sectores clave para Cedeira amosando experiencias exitosas de emprendemento que naceron e se desenvolveron en outros territorios costeiros, e que inspiran o xurdir de novas ideas.

O foro diríxese ás empresas e traballadores e traballadoras dos sectores do turismo (empresas de actividades, informadores turísticos, restaurantes, aloxamentos e outros) e da pesca (pescaderías, armadores, comercializadores e outros), así como a calquera persoa de Cedeira que teña en mente emprender ou diversificar o seu negocio.

Contarase nesta xornada coa presencia de empresas galegas que operan en pobos e vilas con características similares a Cedeira e que son consideradas boa práctica por apostar pola transformación de produtos pesqueiros ou por diversificar coa súa actividade o sector pesqueiro-marisqueiro. Así participarán e contarán o seu caso de emprendemento empresas como Algas La Patrona, de Cambados; o restaurante Amaragotas, de Mugardos, e o parque de aventura Naturmaz, de Mazaricos.

As empresas convidadas expoñerán o seu caso de éxito emprendedor e boa práctica empresarial, contarán aos asistentes como foron os seus inicios, que lles animou a poñer en marcha a empresa, a innovación da súa idea e o punto onde se atopan nestes intres.

No foro tamén se presentará a marca territorial da vila da man do Alcalde de Cedeira Pablo Moreda e o plan de acción e mellora para o sector pesqueiro e turístico de Cedeira.

A xornada rematará cunha degustación de produtos locais procedentes do mar.

Para asistir ao foro é necesario inscribirse chamando ou enviando un WhatsApp ao teléfono 664 53 82 15.

PESCATURACCION é un proxecto subvencionado cunha axuda do GALP A MariñaOrtegal, Consellería do Mar e o Fondo Europeo Marítimo e de Pesca.