URBANISMO

O alcalde de Cedeira, Pablo Diego Moreda Gil, acaba de editar un bando no que se informa das medidas preventivas adoptadas polo Concello para tratar de evitar a expansión do coronavirus entre a poboación local. As disposicións estarán vixentes durante un período inicial de 15 días, desde hoxe venres (día 13) ata o 27 de marzo.

Así, suspéndese a atención ao público presencial no Concello, tanto na Casa Consistorial como na sede dos Servizos Sociais que, a partir de agora farase vía correo electrónico (correo@cedeira.gal) ou a través dos teléfonos da Policía Local, do Rexistro municipal, Servizos Sociais, Polideportivo, Biblioteca, Policía Local e Oficina de Turismo. Polo tanto, permanecerán pechados ao público a biblioteca, os Servizos Sociais, o Polideportivo Municipal, a Oficina de Turismo e o Centro de ocio xuvenil.

Así mesmo quedan suspendidos o feirón mensual e o mercado dos sábados , a feria de antigüedades e segunda mano prevista para o 10 de abril, as iniciativas deportivas e socioculturais organizadas polo Concello, as actividades que se veñen celebrando nos centros municipais como obradoiros e cursos, tanto na vila como nas parroquias, e recomendase ás asociacións e entidades anular os actos públicos e sociais durante os próximos 15 días.

O Concello tamén recomenda á veciñanza non acudir a lugares moi concorridos, especialmente se se trata de sitios pechados e poñendo especial atención a colectivos vulnerables, como poden ser as persoas maiores, poboación infantil ou persoas con doenzas crónicas.

Lavarse as mans de maneira frecuente, cubrirse a boca e o nariz en caso de toser ou esbirrar, evitar tocarse os ollos, nariz e boca e evitar contacto con outras persoas en caso de presentar síntomas respiratorios, son outras das recomendacións recollidas no bando institucional do Concello de Cedeira.

O Concello pide a veciñanza que colaboren, na medida das súas posibilidades, para mitigar a expansión do Covid-19, ao tempo que se lle quere mandar unha mensaxe tranquilizadora e de agradecemento polas posibles molestias que poidan derivarse das medidas adoptadas.

PABLO DIEGO MOREDA GIL, ALCALDE DO CONCELLO DE CEDEIRA FAGO SABER:

Ante a incidencia rexistrada polo COVID19 (coronavirus) , tras as medidas adoptadas por parte do Ministerio de Sanidade, o Concello de Cedeira adopta as seguintes medidas preventivas que afectan ao funcionamento dos servizos públicos, por un período inicial de 15 días, desde o 13 ata o 27 de marzo:

– Queda suspendida a atención ao público presencial no Concello de Cedeira, tanto na Casa Consistorial como na sede dos Servizos Sociais. Toda a atención realizarase polos empregados municipais a través do correo electrónico (correo@cedeira.gal) e dos seguintes teléfonos:

• Rexistro: 981 480 000
• Policía Local: 981 48 0725
• Servizos Sociais: 981 492 179
• Oficina de turismo: 981 48 2187
• Polideportivo: 981 482 633
• Biblioteca: 981 482 897

– Quedan cerrados o acceso ao público en xeral os seguintes centros municipais:

• BIBLIOTECA MUNICIPAL
• SERVIZOS SOCIAIS
• POLIDEPORTIVO MUNICIPAL
• OFICINA DE TURISMO
• CENTRO DE OCIO XUVENIL

– Queda suspendido o feirón mensual e o mercadillo dos sábados, así como a venda ambulante

– Suspensión das actividades deportivas organizadas polo Concello

– Suspensión das actividades socioculturais organizadas polo Concello

-Suspensión das actividades que se desenvolvan en centros municipais como talleres, cursos e similares, tanto en Cedeira como nas parroquias, desenvoltos ou non polo concello (tales como ensaios… ) Recomendación ás asociacións e entidades do municipio que suspenda os seus actos públicos e sociais durante os vindeiros 15 días

Ditas medidas iranse adaptando á situación epidemiolóxica de cada momento, e informarase de cada variación que se poida producir con respecto ás mesmas.

O Concello de Cedeira quere enviar unha mensaxe tranquilizadora á veciñanza e insiste en que sigan as instrucións das autoridades sanitarias. Así mesmo, recoméndase consultar fontes oficiais para informarse, como a páxina do Ministerio de sanidade (www.mscbs.gob.es) ou o teléfono de información para a cidadanía 900 400 116.

Para evitar posibles contaxios lémbrase o seguinte:

• Recoméndase non acudir a lugares que conleven aglomeración de persoas, especialmente se se trata de sitios pechados e poñendo especial atención a colectivos vulnerables (persoas maiores, poboación infantil ou persoas con enfermidades crónicas)
• Lavarse as mans frecuentemente, sendo recomendable o uso de xeles desinfectantes
• Ao toser ou esbirrar, cubrirse a boca e o nariz cun pano desbotable ou contra o brazo co cóbado flexionado
• Evitar tocarse os ollos, nariz e boca
• Se se presentan síntomas respiratorios, evitar o contacto próximo con outras persoas

Calquer novidade será difundida a través dos medios de comunicación municipais.