SERVIZOS

MOREDA ASINOU COA DEPUTACIÓN O CONVENIO PARA FINANCIAR AS MELLORAS DO POLIDEPORTIVO MUNICIPAL

O alcalde de Cedeira, Pablo Diego Moreda Gil, asinou onte co presidente da Deputación, Valentín González Formoso, o convenio de colaboración a través do que a Deputación da Coruña financiará o 80% da obra de renovación do pavimento e o marcador do polideportivo municipal. É un investimento de 187.201€ do que a institución provincial asumirá o 80% e o Concello o 20% restante. “Temos que agradecer o apoio da Deputación para acometer este proxecto e o seu compromiso con Cedeira, que quedou tamén claro co investimento de máis de 350.000€ para suprimir a curva perigosa de Tide e mellorar a seguridade vial na estrada provincial DP-2206”, dixo o alcalde.

O Concello de Cedeira leva anos traballando para facer posible esta obra e poñer ao día unha instalación que ten un uso moi intensivo. O alcalde, Pablo Diego Moreda Gil, recordou que “por sorte somos unha vila na que se practica moito deporte e o pavillón deteriorouse pola antigüidade e o uso”. Aínda que a institución municipal fai a miudo obras de mantemento do pavillón, como por exemplo o recente cambio dos canalóns, esta era una intervención cun alto orzamento que requiría da colaboración provincial.

O proxecto prevé a substitución do solo de madeira da cancha deportiva, que ten unha superficie de 1.211 metros cadrados, así como das zonas anexas, tamén empregadas para o desenvolvemento de actividades, que teñen pavimento de linóleo e suman outros 165 metros cadrados. O actual chan está formado por parquet cruzado deportivo de 25mm, que está directamente colocado sobre o formigón, sen capa de impermeabilización. Están especialmente danadas, ou xa non existen, as madeiras das zonas de unión co linóleo.

As obras incluirán a colocación de tablas de madeira maciza de 22mm sobre rastreis de madeira laminada, cun conxunto de tiras de goma por debaixo que están especialmente deseñadas para este tipo de uso e que evitan a deformación do solo e melloran a absorción dos impactos. Fóra da cancha instalarase un pavimento sintético, cunha capa de impermeabilización. O proxecto contempla tamén unha mellor solución para as liñas de unión entre os dous tipos de chan. Na intervención está incluída tamén a dotación dun novo marcador que servirá mellor para todos os deportes que se practican na cancha e ás súas actuais normativas.

Ao tempo que agradeceu a colaboración da Deputación Provincial, o alcalde de Cedeira considerou que “se bota en falta máis implicación da Xunta de Galicia co deporte da nosa vila, onde temos deportistas moi destacados que son a proba da fortaleza que teñen as escolas de base e os clubes locais”. Moreda Gil reclamou á Xunta de Galicia unha aposta por Cedeira a través da construción dunha nova piscina municipal.

CEDEIRA DOTARASE DUN INVENTARIO ACTUALIZADO DOS CAMIÑOS DE TITULARIDADE MUNICIPAL

O Concello de Cedeira contará cun inventario de camiños municipais actualizado, unha ferramenta esencial para que os técnicos municipais poidan determinar con rigor a propiedade pública ou privada de cada vieiro e clarexar as consultas que a miudo presentan os veciños e veciñas. O alcalde, Pablo Diego Moreda Gil, explicou que é unha obriga das administracións locais contar con este documento, segundo establece a lexislación, e apuntou que será unha referencia esencial para actuar con precisión na xestión e conservación da rede viaria municipal. “Contar con este catálogo é moi importante e vai ser de grande utilidade tanto para a propia administración como para a cidadanía”, subliñou.

O traballo de elaboración do inventario, que ten un prazo de execución dun ano, foi encargado á empresa Procat Ingeniería y Medioambiente por un presuposto de 17.908€ (IVE incluído). Para realizar o catálogo analizaranse todos os datos que obran en mans do Concello, así como as referencias catastrais, escrituras, acordos de cesión e urbanísticos, información rexistral, concentracións parcelarias, etc. Recompilarase toda esa información en planos, que serán contrastados coas imaxes aéreas do territorio. Trazaranse as estradas non municipais, así como as da rede principal e secundaria, e de todos os camiños susceptibles de ser de titularidade pública.

Unha vez que Procat conte cunha primeira versión da planimetría do municipio, realizaranse reunións cos técnicos municipais para detectar incidencias e facer, no seu caso, visitas sobre o terreo para tratar de determinar a titularidade dos vieiros.

O catálogo abranguerá todos os camiños en formato vectorial SIG e a montaxe de planos para a súa revisión en papel ou a través do ordenador por parte do persoal técnico municipal. Unha vez rematado o traballo, o catálogo entregarase ao Concello nos diferentes formatos, con fichas individuais de cada ben e listados dos camiños e fincas catalogadas.

Esta é unha das 80 actuacións que aborda o Concello de Cedeira con cargo aos remanentes procedentes do exercicio de 2021 que se incorporaron ao presuposto deste ano. “A miudo xurden dúbidas, por parte da propia veciñanza, sobre de quen é un camiño e que dereitos pesan sobre o mesmo –explicou o alcalde-; este traballo vai permitir aos técnicos municipais respostar a estas consultas e vai redundar nunha mellor xestión municipal en xeral, porque é esencial coñecer qué carreiros son municipais para asumir o seu coidado e protección”, explicou o alcalde

O CONCELLO RENOVA O PECHE PERIMETRAL DO PARQUE INFANTIL DA PRAZA DO FLOREAL

O goberno municipal de Cedeira realizou recentemente a obra de substitución do peche perimetral do parque infantil de xogos da praza do Floreal. O anterior, de madeira, estaba bastante deteriorado, con listóns que faltaban e outros afectados pola humidade ou rotos. O Concello instalou unha nova balaustrada de baixa altura como a que existía, pero desta volta metálica e máis duradeira, cumprindo con todas as medidas de seguridade que esixe un espazo destinado ás crianzas.

A obra foi contratada á empresa OMIP por un presuposto de 10.230€ (IVE incluído), por presentar a oferta máis vantaxosa entre as ofertas solicitadas. Cómpre recordar que o Concello de Cedeira ten en proxecto a cubrición do parque infantil do Floreal cunha estrutura que permita ás familias aproveitar este espazo público tamén en días de choiva, unha actuación valorada en máis de 70.000€ e que se prevé financiar con cargo ao Plan Complementario da Deputación da Coruña.

Por outra banda, e tamén na liña de poder darlle máis uso, os orzamentos participativos deste ano irán destinados a dotar de máis iluminación e pintura antideslizante á cancha de xogo que está tamén na praza de Floreal. Foi a decisión adoptada polo alumnado de 3º da ESO do IES Punta Candieira, que debatiu e votou diferentes propostas para decidir o destino de 20.000€ do presuposto municipal.