Skip to content Skip to left sidebar Skip to footer

SERVIZOS

CEDEIRA XA TEN A SÚA MARCA EN TAMAÑO XIGANTE NOS XARDÍNS DO PASEO DA MARIÑA

O Concello instalou hai poucos días a súa marca corporativa, coas letras de Cedeira en tamaño xigante e a imaxe do peixe de Teixido, nos xardíns do Paseo da Mariña, diante dunha das súas vistas máis emblemáticas. Tal e como comentou o alcalde, Pablo Diego Moreda Gil, “é un elemento que vai contribuír a espallar o nome de Cedeira co mellor marco, o da nosa ría e a praia da Madalena, e a identificar a icona do peixe como a marca deste municipio”.

A marca de Cedeira creouse no marco do desenvolvemento do proxecto Pescaturacción, con financiamento europeo xestionado polo GALP A Mariña. Este e outros programas de acción postos en marcha ao abeiro destas liñas de axuda van dirixidos a potenciar a tradición pesqueira da vila xunto cos seus valores turísticos.

A instalación das letras de Cedeira chega en pleno mes de agosto e a poucos días do comezo das festas, coa vila especialmente animada e chea de visitantes. Nestes últimos días centos de persoas aproveitaron xa o lugar como “photocall” para facer fotos e presumir das vistas.

Desde o Concello recordan que este mércores hai unha nova ruta do programa “Descobre Cedeira”. Tócalle a quenda ao percorrido pola vila, moi doado e con saída desde a Oficina de Turismo. De 10.00 a 14.00 h, as persoas inscritas irán coa guia turística polo casco vello ata a capela de San Antón e despois achegaranse ao xacemento arqueolóxico do Sarridal.

As persoas interesadas poden informarse ou inscribirse de xeito gratuíto a través da Oficina de Turismo, en persoa ou a través de mail -mar.lopez@cedeira.es- ou teléfono -981 482 187-.

O CONCELLO INVISTE NA ADECUACIÓN E MELLORA DE DOUS APARCADOIROS CON 61 PRAZAS CERCA DA RÚA DEPORTES

O Concello de Cedeira executou recentemente dúas obras de acondicionamento e mellora de dous espazos de aparcadoiro na zona da rúa Deportes cun investimento de preto de 30.000€. Por un lado realizáronse uns traballos de mantemento e mellora do espazo de estacionamento situado en fronte do IES Punta Candieira, que conta con 30 prazas, e por outra adecuáronse outras 31 nunha parcela municipal próxima, contigua ao pumtrack, que de feito era xa empregada en precario para deixar os vehículos. O alcalde, Pablo Diego Moreda Gil, destacou que “nesta zona está o campo de fútbol do Beco, a estación de autobuses e o Centro de Ocio Xuvenil, ademais do instituto, polo que ten moito” e subliñou que estes investimentos melloran e ordenan o aparcamento.

Por unha banda, o Concello executou obras de mantemento e mellora do aparcadoiro municipal que está situado diante do IES Punta Candieira e que adoita ser empregado pola comunidade educativa e pola veciñanza da zona. Os traballos, valorados en preto de 20.000€, abrangueron tanto a aplicación dunha nova capa de aglomerado na superficie do estacionamento como a substitución do bordo da beirarrúa que está diante do instituto, que tamén se atopaba deteriorada.

O goberno local adxudicou estes traballos, por valor de 19.904,50€ (IVE incluído). Realizouse unha limpeza por medios mecánicos de toda a superficie do aparcadoiro, duns mil metros cadrados, e posteriormente aplicouse unha mistura asfáltica en quente. O cambio do bordo da beirarrúa abrangueu uns 62 metros lineais. En total, este aparcadoiro conta con 30 prazas.

Por outra banda, o Concello de Cedeira contratou por 9.873,60€ (IVE incluído) o acondionamento doutra parcela municipal, de 550 metros cadrados, que está situada xunto á pista de pumtrack e por detrás do campo de fútbol do Beco. Trátase dun terreo que xa era utilizado en precario polos condutores para deixar os seus vehículos, pero que con esta actuación quedou asfaltado e pintado, con 31 novas prazas de estacionamento marcadas.

O CONCELLO DE CEDEIRA LICITA OBRAS DE MELLORA EN MÁIS DE 1,2 KM DE BEIRARRÚAS DO CASCO URBANO

O Concello de Cedeira vai sacar a licitación o proxecto de “Mellora nas beirarrúas na Avenida de España, as rúas Ponte Nova, José Pascual López Cortón, Salinas e Camiño de Pitilleira”, unha actuación que conta cun orzamento de 219.932,78€ e que vai traducirse na renovación de máis de 1,2 quilómetros lineais de beirarrúas en cinco viais do casco urbano da vila. O alcalde, Pablo Diego Moreda Gil, recordou que a actuación se vai executar con cargo aos fondos do POS+Adicional por maior achega da Deputación da Coruña.

O proxecto contempla a substición das beirarrúas en ambas marxes, salvo no caso da rúa López Cortón, na que as obras só afectarán a unha. Levantarase o pavimento e o bordo actual, que se atopa bastante deteriorado, e colocarase un novo. Nas rúas Avenida de España, López Cortón, Camiño de Pitilleira e Salinas as novas pezas serán de formigón granallado, mentres que na Ponte Nova irán outras de pedra granítica.

Ademais, as obras aproveitaranse para dotar dun maior ancho ás beirarrúas na Avenida de España, no tramo que vai da rúa México á de As Pontes. Alí, o espazo destinado aos peóns ampliarase ata ter 1,80 metros de ancho.

As obras licitadas entran dentro do Plan de Mellora da Mobilidade Urbana de Cedeira e permitirán corrixir, precisamente, algunhas das carencias que constata o documento en canto, en palabras do alcalde, Pablo Diego Moreda Gil, ao “importante deterioro do firme nalgunhas rúas da localidade e ao déficit de espazos amplos doutras, como acontece, por exemplo, na Avenida de España onde non poden pasar dúas cadeiras de rodas ao mesmo tempo”.