Skip to content Skip to left sidebar Skip to footer

SERVICIOS SOCIAIS

CONCELLO DE CEDEIRA E CONSELLERÍA DE SANIDADE AVANZAN CARA A AMPLIACIÓN DO CENTRO DE SAÚDE

O alcalde de Cedeira, Pablo Diego Moreda Gil, mantivo esta semana unha reunión de traballo co conselleiro de Sanidade, Julio García Comesaña, coa finalidade de seguir avanzando cara a ampliación do Centro de Saúde. Segundo explicou o rexedor local, os terreos que o Concello pon a disposición da Xunta están afectados pola Lei de Costas, unha circunstancia que é preciso ter en conta para facer unha modificación do planeamento que se axuste á legalidade e que dea resposta, ao mesmo tempo, ás necesidades do proxecto. Moreda Gil agradeceu a boa disposición e o ambiente construtivo da reunión e considerou que coa boa vontade de todas as partes será posible realizar a tramitación e licitar o proxecto a finais deste ano.

Na reunión participaron, xunto co alcalde e os técnicos municipais, o arquitecto Ángel Monteoliva, quen recibiu o encargo do Concello de redactar a modificación do Plan Xeral de Ordenación Municipal e que é redactor tamén do proxecto de ampliación do CHUAC da Coruña. Xunto co conselleiro, estiveron tamén no encontro o xerente da Área Sanitaria de Ferrol, Ángel Facio; a directora de Recursos Económicos da Consellería, María Jesús Piñeiro Bello, e persoal técnico.

Unha vez que desde a parte do Concello se explicou a afectación de Costas e os trámites xa realizados, a reunión orientouse a describir diferentes alternativas coas que modificar o PXOM dotando ao Centro de Saúde de 1.000 metros cadrados máis para que pase dos 1.100 actuais aos 2.100 que Sanidade estima necesarios. Agora, explicou Moreda Gil, o Concello vai solicitar unha reunión coa Demarcación de Costas para analizar as posibilidades e chegar á máis acaída.

Desde a Consellería subliñouse no encontro que a ampliación do Centro de Saúde de Cedeira é unha necesidade real e que xa ten consignación presupuestaria nos orzamentos deste ano. O proxecto de Sanidade, comentou o alcalde, vai ir dirixido non so a cubrir as carencias actuais, senón a respostar ás demandas dunha poboación creciente. O proxecto, clasificado como de prioridade 1 no Plan de Infraestruturas do Sergas, contempla unhas instalacións que darán cobertura a un cupo de 6.500 persoas. Serán ata 10.000 no caso do Punto de Atención Continuada, que non so atenderá á xente de Cedeira senón tamén doutros municipios como Valdoviño e Cerdido; e chegarán ata 15.500 os potenciais usuarios no caso do servizo de fisioterapia, que abranguerá a poboación de Cedeira, Valdoviño, Cerdido, Moeche e As Somozas.

A ampliación permitirá crear un despacho para o traballador social, unha sala de técnicas, outra polivalente, outra máis de toma de mostras, unha consulta de docencia e un espazo para a educación sanitaria. O PAC terá sala de reanimación e vestiarios e zona de fisioterapia dotada con xumnasio, cabinas e consulta. En total haberá cinco consultas de medicina, cinco de enfermería, unha de farmacia e dous polivalentes.

MOREDA TACHA DE IMPRUDENTES AS AFIRMACIÓNS DE GARCÍA COMESAÑA SOBRE A DEMORA DO CENTRO DE SAÚDE

O alcalde de Cedeira, Pablo Diego Moreda Gil, califica de inxustas e imprudentes as afirmacións que fixo hai poucos días no Parlamento Galego o conselleiro de Sanidade, Julio García Comesaña, quen ao fío dunha intervención sobre o Plan de Infraestruturas do Sergas e ao tempo que vertía críticas a outros concellos, dixo que “non hai noticias” do alcalde de Cedeira para iniciar o proxecto de reforma do Centro de Saúde. “Despois de tantos anos que levamos traballando e con todo o que superamos para chegar ata aquí, podería informarse antes de poñer a escusa de que somos nós os culpables”, considerou.

Moreda Gil recorda que o goberno socialista de Cedeira traballara xa no mandato 2007/2011 pola necesaria ampliación do Centro de Saúde e que froito daquel esforzo houbo un convenio entre o Ministerio de Agricultura, Alimentación e Medio Ambiente e a Xunta de Galicia para destinar 2,4 millóns de euros ao proxecto –así se publicou no BOE do 11 de xuño de 2012-. Porén, sinalou o alcalde, daquela a administración autonómica incumpriu o seu compromiso de achegar o 50% do orzamento e a oportunidade desapareceu.

“Desde que chegamos ao goberno en 2015 retomamos o tema, para que a Xunta asuma a súa responsabilidade e dea resposta a unha necesidade real e manifesta”. Recorda o alcalde que o Concello solicitou unha entrevista co conselleiro de Sanidade o 17 de xuño de 2019 e que a reunión non chegou ata un ano, nove meses e un día despois, en total 640 días, o 18 de marzo de 2021. “Parece un pouco atrevido que afirme que está a esperar por nós”, explicou Moreda Gil, remarcando que “o feito de que aínda non puxésemos os terreos a disposición da Xunta non significa que non esteamos traballando”.

Ao fío disto, recordou que xa a finais de 2019 o Concello comprou os locais sindicais do número 7 da rúa Ortigueira, para ter a propiedade da totalidade do edificio e poñelo a disposición da Xunta. A finais de 2021 escriturouse tamén a compra da parcela da Confraría de Pescadores coa mesma finalidade. E desde hai máis dun ano estase a traballar na modificación puntual do PXOM cuxo borrador foi enviado o 26 de abril de 2021 á Consellería de Medio Ambiente para o inicio do proceso de avaliación ambiental. Desde entón o goberno local mantivo diferentes reunións cos organismos e administracións concernidas nesta tramitación. Entre ditas instancias está a Demarcación de Costas. Mantivéronse xa varias reunións co xefe territorial, Rafael Eimil, e formuláronse consultas ao Ministerio ao respecto destes terreos.

“Porque non temos unicamente que poñer os terreos a disposición da Xunta, temos que entregalos coa cualificación urbanística correspondente”, puntualizou o alcalde, que citou tamén entre as últimas reunións de traballo para sacar adiante a modificación puntual do planeamento unha coa directora xeral de Urbanismo da Xunta, Encarnación Rivas. A tramitación da modificación puntual do planeamento conleva todos estes trámites e non é tan sinxelo como no caso do Centro de Día, no que o Concello so ten que entregar o solo.

Moreda subliñou por último que a “preocupación pola Sanidade” á que aludiu no seu discurso ten que ver, tamén, coa reivindicación de condicións laborais para o persoal sanitario, por exemplo. Lembrou que o goberno local de Cedeira estivo xunto aos traballadores e traballadoras do Centro de Saúde cando reclamaban os seus dereitos, así como manifestándose xunto á cidadanía para demandar un pediatra e tamén reclamando que se cubriran as baixas dos facultativos, ao igual que facilitando pantallas, máscaras, luvas e xel hidroalcohólico na pandemia, ou instalando unha carpa para abrigar ás persoas usuarias que tiñan que facer cola ás portas do servizo. “Mentres – dixo-, o PP de Cedeira nunca fixo unha pregunta específica sobre o Centro de Saúde”.

O CONCELLO APROBA CINCO NOVOS CONVENIOS DE COLABORACIÓN CO TECIDO ASOCIATIVO DE CEDEIRA

A Xunta de Goberno Local vén de aprobar novos convenios de colaboración con varias asociacións de Cedeira para sufragarlles gastos de funcionamento e investimentos que garanten o seu funcionamento. O alcalde, Pablo Diego Moreda Gil, destacou o traballo conxunto que o Concello desenvolve con estas entidades e o importante papel que cumpren, cada unha no seu eido, na localidade. Agradeceu expresamente o traballo desinteresado das persoas que forman parte destas asociacións, veciños e veciñas que co seu voluntariado fan posibles moitos eventos e actividades que dinamizan a vida social, cultural ou deportiva na vila.

Concretamente, o goberno deu luz verde aos convenios con Protección Civil, Cruz Vermella e Sobre Rodas, e aprobou tamén o anticipo das subvencións concedidas á asociación Mares e ARCE, que incrementan o seu importe respecto a anos anteriores.

No caso de Protección Civil, o Concello aproba un convenio de colaboración cunha aportación de 18.000€. A axuda contempla 12.000€ para gastos correntes e 6.000€ para investimentos da entidade, adicada á prevención e á autoprotección cidadá. Tamén no ámbito da seguridade, a asemblea local da Cruz Vermella asinará outro convenio por un importe de 3.800€ para o sostemento das súas tarefas de salvemento marítimo, a cobertura de eventos e a formación do Equipo de Resposta Básica de Emerxencias (ERBE).

Xunto con estes convenios, a Xunta de Goberno Local aprobou a nova colaboración coa asociación Sobre Rodas. A administración local aportará 6.000€ para soster as actividades de apoio a persoas con problemas de mobilidade que realiza esta entidade, como son os traslados en vehículos adaptados, o préstamo de material ortopédico e o servizo de fisioterapia.

Tamén ten xa aprobado o goberno de Cedeira os novos convenios de colaboración coa asociación Mares e coa asociación Amigos dos Ríos de Cedeira (ARCE). No primeiro caso, a cuantía é de 20.000 euros, o que significa duplicar a do ano anterior, e no segundo é de 5.500€ fronte aos 4.000€ do pasado 2021. Moreda Gil explicou que en ambos casos xustifícase o incremento pola actividade que realizan as dúas entidades, na atención do Museo Mares e na concienciación e mesmo o coidado da contorna natural. A Xunta de Goberno deu luz verde ao anticipo do 100% destas axudas, coa reserva do 30% en concepto de garantía, para facilitar o desenvolvemento das súas actividades.