O Consorcio licita a ampliación da escola infantil por 141.337 euros

O CONSORCIO LICITA A AMPLIACIÓN DA ESCOLA INFANTIL POR 141.337 EUROS

O Consorcio Galego de Servizos de Igualdade e Benestar vén de sacar a licitación a obra de ampliación da escola infantil de Cedeira, por un importe de 141.337 euros (IVE incluído).

“Trátase dunha magnífica noticia para a veciñanza e mesmo para o equipo de goberno, que vén traballando desde o primeiro día pola consecución deste obxectivo”, di o executivo local, que engade que “agora o que convén e que a contratación se resolva axiña para tratar de axilizar ao máximo a execución dun proxecto que virá solucionar as carencias que presenta o servizo actual”.

O goberno lembra así mesmo que o Concello colaborará economicamente no financiamento da obra, achegando tanto unha terceira parte do custo da ampliación como da redacción do proxecto executivo, ademais de dar por ben empregadas as moitas xestións realizadas para ofrecer un servizo que se axuste ás necesidades reais da veciñanza local.

No apartado de agradecementos, o executivo local menciona de maneira especial aos traballadores da escola infantil, pola súa colaboración e axuda, aos pais e nais que cunha recollida de firmas impulsaron a realización dun proxecto do que se beneficirán todos os nenos de Cedeira, así como ao conxunto da veciñanza por secundar a iniciativa municipal.

A ampliación da escola infantil suporá engadir un total de 105 metros cadrados máis ás actuais instalacións, coa ocupación dun segundo edificio de propiedade municipal e a adecuación das instalacións agora en uso ás condicións impostas no seu día polo Consorcio. Así, no edificio en uso construiranse un aseo de uso público, un despacho, unha sala de mestres e un segundo baño con cambiador incorporado. Na segunda edificación, a reforma dos 105 m2 pasa pola creación dunha aula para nenos de 2-3 anos, un aseo para cativos de tres, unha cociña con despensa de máis de quince metros cadrados, un distribuidor e un acceso á primeira planta.

Estas obras suporán cambios tamén no exterior da escola infantil. O acceso actual do segundo edificio reconverterase en saída de emerxencia, polo que se prevé a construción dun novo para chegar á primeira planta do mesmo, así como modificar a ventá existente baixo a escaleira e substituíla por unha porta de características similares ás que xa existen. O feito de pasar de un a dous edificios anexos obrigará a modificar o punto de acceso á parcela, xerando a construción dunha nova rampla de acceso e unha plataforma horizontal na fronte da edificación. Estes cambios traduciranse en máis espazos de recreo e na adaptación do peche perimetral.

A matrícula actual do centro é de 60 alumnos e o seu plantel laboral está integrado por dez traballadores. A existencia dunha lista de garda con máis de vinte nomes foi o que motivou ao goberno a facerse eco da demanda e preocupación de pais e nais con fillos menores de tres anos e sen praza no centro escolar infantil. Como primeira medida, o goberno municipal modificou o uso da propiedade obxecto da ampliación para evitar calquera atranco e asumiu o financiamento da súa parte da obra con cargo ao orzamento municipal, mentres que a Xunta ten previsto facelo a través do Fondo Europeo de Desenvolmento Rexional (Feder).

O goberno apoia as reivindicacións das plataformas sanitarias galegas asistindo ás concentracións locais

O GOBERNO APOIA AS REVINDICACIÓNS DAS PLATAFORMAS SANITARIAS GALEGAS ASISTINDO ÁS CONCENTRACIÓNS LOCAIS

O goberno de Cedeira apoia coa súa presenza as concentración que todos os luns se están a levar a cabo diante do centro de saúde para denunciar o desmantelamento do sistema público de saúde.

As protestas, que se celebran ás 12.00 e 18.00 horas, teñen como obxectivo secundar as medidas e reivindicacións que se veñen plantexando desde SOS Sanidade pública, plataformas sanitarias galegas e mesmo formacións políticas e sindicatos, que acusan ao goberno da Xunta de “desmantelar o sistema público en beneficio de empresas privadas”.

Desde o executivo, que tamén pon o acento nos problemas locais -falta de médicos e lista de espera- invítase á veciñanza a secundar coa súa presenza unhas accións coas que se trata de esixir unha sanidade pública de calidade.

Inicio das clases de zumba

INICIO DAS CLASES DE ZUMBA

O Concello de Cedeira informa do inicio das clases de zumba que, xunto ás de manualidades, pintura, confección de tapices, memoria e ximnasia terapéutica, forman parte do programa de actividades organizado polas concellerías de Cultura e Servizos Sociais para a presente temporada.

As clases, que deron comezo o pasado luns día 4, impartiranse regularmente os luns, mércores e venres na Sala Áncora, a partir das once da mañá.

Cedeira enche o inverno de obradoiros de pintura, memoria, ximnasia e tapices

CEDEIRA ENCHE O INVERNO DE OBRADOIROS DE PINTURA, MEMORIA, XIMNASIA E TAPICES

O Concello de Cedeira enche o inverno de actividades gratuítas promovidas polas concellerías de Cultura e Servizos Sociais que, ademais de impartirse na vila, se trasladarán ás parroquias de Esteiro, Montoxo, Santalla e este ano, por primeira vez, tamén á de San Román. O programa inclúe pintura, manualidades, obradoiro de tapices, memoria e ximnasia terapéutica. O taller de tapices, polo de agora, só se fará na vila, e será os luns, en horario de catro a sete da tarde, no Palacete Municipal.

Desde o equipo de goberno se destaca a ampliación do programa coa incorporación da parroquia de San Román así como o incremento das propostas de ocio coa primeira edición do obradoiro de tapices. Esta última iniciativa vén de ter unha gran acollida por parte da veciñanza, e xa ten lista de espera. Tamén é intención do goberno completar estas convocatorias con clases de baile activo-zumba, que darán comezo un pouco máis adiante.

Os horarios son os seguintes:

Pintura, en Cedeira (nas Sindicais) os luns e martes de 10.00 a 13.00 horas, os mércores de 18.30 a 21.00 horas e os xoves de 19.00 a 21.30 horas . No Colexio Nicolás del Río serán os venres, entre as 16.00 e as 18.00 horas.
En Santalla, as clases de pintura serán os mércores de 16.00 a 18.00 horas; en Montoxo, os venres de 18.30 a 21.30 horas, e en San Román os venres pola mañá, de 10.30 a 12.30 horas.
Manualidades, en Cedeira (praza da Reitoral) os martes e venres en horario de 19.00 a 21.00 horas.
Memoria, en Cedeira (na biblioteca da cafetería do auditorio) os luns e venres ás 16.00 horas e ás 17.30 horas; en Esteiro-Saa, os mércores e xoves ás 16.00 horas; en Esteiro-Sisalde, martes ás 16.00 horas e mércores ás 17.15 horas; en Montoxo os martes e xoves ás 17.15 horas; en Santalla os martes e xoves ás 18.30 horas, e en San Román os luns e venres ás 17.30 horas.
Ximnasia terapéutica, en Cedeira (biblioteca da cafetería do auditorio) os martes ás 11.00 horas e tamén os martes, ás 9.45 horas, en Esteiro, mentres que os xoves serán en Montoxo, San Román e Santalla, ás 9.30, 10.45 e 12.00 horas, respectivamente.

 

O goberno municipal destaca a boa sintonía co Sergas cara a ampliación do Centro de Saúde

O GOBERNO LOCAL DESTACA A BOA SINTONÍA CO SERGAS CARA Á AMPLIACIÓN DO CENTRO DE SAÚDE

O goberno de Cedeira segue a dar pasos firmes cara á ampliación do Centro de Saúde. Onte mesmo o alcalde, Pablo Moreda Gil, reuníase co xerente de Xestión Integrada de Ferrol, Ángel Facio Villanueva, para darlle a coñecer o acordo plenario que deu lugar á adquisición de propiedades anexas ao actual edificio e para analizar, de forma conxunta, os trámites e as accións precisas para dotar de máis recursos sanitarios á vila de Cedeira.

Así, o Concello xa remitiu hai uns días a Patrimonio da Xunta de Galicia a documentación relativa á compra de tres plantas do edificio das vivendas sindicais que, xunto ás que xa eran propiedade do Concello, serán cedidas á Consellería de Sanidade e que incrementarán ata nun 40% o espazo construtivo do actual Centro de Saúde, un servizo asistencial falto de recursos para facer fronte ás necesidades reais da veciñanza e mesmo dos visitantes e turistas ocasionais.

Desde o equipo de goberno destácanse, entre outros problemas, as deficiencias estruturais no servizo de urxencias (PAC), a falla dunha sala acondicionada para cirurxía menor, a necesidade de reubicar a área de pediatría e mesmo a de mellorar a accesibilidade á zona de consultas. No encontro de onte tamén se acordou celebrar unha reunión conxunta entre técnicos da Xunta e do Concello, unha vez que estean resoltos todos os trámites, así como unha posible visita á vila de Cedeira do conselleiro de Sanidade, Jesús Vázquez Almuíña, para analizar sobre o terreo a necesaria ampliación do actual Centro de Saúde.

O goberno municipal destacou a “boa sintonía” que hai entre o Sergas e o executivo local para acometer o proxecto de ampliación e expresou a satisfaccion que a día de hoxe existe entre os responsables municipais polos avances conqueridos cara á consecución dun obxectivo “bo para o pobo e necesario para garantir unha sanidade de calidade”.

O acordo plenario que deu lugar á compra das tres plantas do edificio das sindicais foi adoptado por unanimidade na sesión celebrada o día 26 de decembro e a compra pechouse pola cantidade de 60.913,93 euros. A planta baixa, a terceira e o baixo cuberta que foron adquiridas polo Concello eran propiedade da Consellería de Medio Rural.

O Pleno aprobou os plans provinciais e a compra do edificio das sindicais para ofrecerllo á Xunta a fin de aumentar o centro de saúde

O PLENO APROBOU OS PLANS PROVINCIAIS E A COMPRA DO EDIFICIO DAS SINDICAIS PARA OFRECERLLO Á XUNTA A FIN DE AUMENTAR O CENTRO DE SAÚDE

O pleno de Cedeira aprobou os proxectos incluídos no POS+2019 e no Plan Complementario da Deputación da Coruña, que suman un total de 369.840,64 euros. Entre as actuacións previstas está a instalación dunha nova rede de saneamento nas rúas Estrada, Valdoviño, San Sadurniño e Travesía da Praia, a mellora da eficiencia enerxética da iluminación pública na avenida Castelao e a extensión da rede de saneamento a Vilacacín.

O proxecto da rede de saneamento, orzamentado en máis de 191.000 euros e cunha aportación municipal de 94.700 euros, dará lugar a la demolición da rede existente -a base de tubaxes de fibrocemento- e á colocación dunha separativa para evitar os continuos atascos que agora se producen polo mal estado e a escasa pendente das canalizacións. A intervención rematará co asfaltado da rúa.

A obra de mellora enerxética que se pretende levar a cabo na avenida Castelao require dun investimento de 55.421,99 euros e basicamente consistirá na substitución das luminarias existentes por outras de tecnoloxía led. A antigüidade e o consumo das actuais, así como a contaminación lumínica que produce están entre as razóns que xustifican o investimento, segundo o goberno municipal.

A extensión da rede de saneamento en Villacacín chega aos 77.000 euros de investimento e dará lugar á instalación de tubaxe ao longo de 640 metros e a construción de 21 pozos de rexistro para poñer en funcionamento un servizo do que actualmente carece este núcleo rural da parroquia de Cedeira.

Na sesión plenaria tamén se adoptou a decisión de adquirir á Consellería de Medio Rural a planta baixa, a terceira e o baixo cuberta do edificio das sindicais, por importe de 60.913,93 euros, para garantir a ampliación do actual centro de saúde.

Trátase dun proxecto que no seu día deu lugar ao pronunciamento do Parlamento Galego, no sentido de instar á Xunta a dialogar con Concello para chegar ao acordo, así como a reiteradas xestións, a todos os niveis, por parte do goberno co fin de incrementar ata un 40% o espazo construtivo do actual centro de saúde, unha necesidade que mesmo foi recoñecida polo propio Sergas.

Foi no seu momento a propia Dirección Xeral de Recursos Económicos a que falou da necesidade de ampliar as actuais instalacións “mediante a cesión dun terreo o ben mediante a cesión de espazos anexos xa construídos que puideran utilizarse para asistencia sanitaria”, unha petición que tivo como resposta por parte da corporación, o inicio do expediente para a adquisición das tres plantas que son propiedade da Xunta para, coas que xa son do Concello, ceder todo o inmoble á Consellería de Sanidade para aumentar unhas instalacións moi deficientes en moitos aspectos.

Desde o equipo de goberno destácanse as deficiencias estruturais no servizo de urxencias, así como a falla de espazos para dispoñer de salas de reunións, almacén, sala acondicionada para cirurxía menor, reubicación da área de pediatría e mesmo mellorar a accesibilidade á zona de consultas.

Cedeira demanda da Xunta un centro de día cunha campaña de recollida de firmas

CEDEIRA DEMANDA DA XUNTA UN CENTRO DE DÍA CUNHA CAMPAÑA DE RECOLLIDA DE FIRMAS

O Concello de Cedeira vén de poñer en marcha unha campaña de recollida de sinaturas demandando á Xunta a creación dun centro de día no municipio, “por carecer a día de hoxe dun centro público que dea apoio nin aos 125 veciños declarados dependentes nin ás persoas que teñen que exercer o papel de coidadoras”.

O goberno municipal conta co apoio e a colaboración do movemento asociativo para levar a cabo o devandito propósito. De feito, a veciñanza que desexe secundar esta iniciativa pode facelo nas sedes sociais de Eixil, Sobre rodas, Rondalla de Cedeira, Virxe do Mar, Veciñanza de Piñeiro, Discalz@s polo Festival, Amas de Casa, Vila de Cedeira, Robaleira, Museo Mares de Cedeira, Patchwork de Cedeira, Asociación de Maiores, Cultural Garola, Acordeóns de Cedeira, Tarroiba, Coral Herbeira e Aturuxeiras, así como no propio Concello, no Palacete, na oficina dos Servizos Sociais e máis no polideportivo.

A través do escrito que xa se está a repartir, o executivo local tamén pon de manifesto o seu compromiso de colaborar coa Xunta na realización do proxecto poñendo á súa disposición os terreos necesarios para a realización dunha obra que “axudaría a solucionar os problemas de atención e coidado que requiren as persoas dependentes e as consecuencias que acaban sufrindo as coidadoras”.

Cedeira construirá novos vestiarios no campo de fútbol para favorecer a igualdade de xénero

CEDEIRA CONSTRUIRÁ NOVOS VESTIARIOS NO CAMPO DE FÚTBOL PARA FAVORECER A IGUALDADE DE XÉNERO

O Concello de Cedeira leva o tema da igualdade de xénero ás instalacións deportivas. O goberno municipal vén de contratar por 59.502,33 euros á empresa Mecano, Obras y Reparaciones SL para a construción de novos vestiarios no campo de fútbol municipal do Beco. A obra virá completar a edificación existente fronte aos terreos de xogo, respectando a tipoloxía, alturas e mesmo as súas características estéticas.

O prazo de execución da obra é de dous meses e a realización da mesma obedece a necesidade de adecuar as instalacións á incorporación da muller á práctica regular do fútbol. A realidade, segundo apuntou o alcalde, Pablo Moreda Gil, “é que a presenza feminina é cada vez maior en todas as categorías”. A vila conta ademais cun equipo, Discalzas Cedeira SD, que está a competir na liga Feminina de Fútbol 8.

A idea é permitir o uso diario dos dous campos de fútbol oito e suplir as carencias que había con respecto á ultilización dos vestiarios por parte das xogadoras.

O proxecto consiste na construción de dous vestiarios, cunha superficie útil de 82 metros cadrados cada un deles e con capacidade para un mínimo de 15 usuarios á vez. Haberá zona de entrada, espazos para as duchas -unha para cada tres persoas-, cabinas accesibles, bancos, aseos, lavabos e taquillas con chave.

A realización deste proxecto forma parte das actuacións levadas a cabo desde o goberno municipal para mellorar as instalacións deportivas, por considerar que tamén así se está a promocionar o deporte. Esta política deu lugar hai pouco á compra de bicicletas verticais e de spinning para o ximansio, a obras de mantenimiento e mellora do sistema de auga quente no pavillón polideportivo, á erradicación de humidades e á substitución dos bancos soterrados utilizados por adestradores e xogadores suplentes no campo de fútbol de O Beco. O investimento rondou os 40.000 euros.

Cedeira conmemorará este domingo o 25-N cunha concentración diante do Concello

CEDEIRA CONMEMORARÁ ESTE DOMINGO O 25-N CUNHA CONCENTRACIÓN DIANTE DO CONCELLO

O goberno de Cedeira conmemora o 25 de novembro ese mesmo día -o domingo- cunha concentración na praza do Concello, coa lectura dun manifesto e con actuacións musicais a cargo de Iría e Dopazo.

Ademais xa foron colgadas pancartas dos edificios municipais -Concello, Palacete, Polideportivo e Servizos Sociais- e distribuironse carteis cos lemas “Cedeira en Negro”, “Non abuses”, “Non Violes” en negocios, comercios e locais de hostalería. As persoas que o desexen tamén poderán vestir de loito en sinal de dor por todas as mulleres mortas e polas que están a sofrer violencia.

O executivo local invita á veciñanza a secundar unha iniciativa que dará comezo ás doce do mediodía e na que tamén tomarán parte representantes da corporación.

O Concello tamén colabora co Club de Remo da localidade na celebración dun “adestramento contra a violencia de xénero” que terá lugar mañá sábado e que incluirá un minutos de silencio con remos en alto en homenaxe ás vítimas e un percorrido marítimo polo conxunto das embarcacións participantes. A actividade dará comezo ás 16.30 horas e terá o seu punto de partida fronte O Ramón.

O Concello de Cedeira participa, xunto a outras 101 administracións locais e as Deputacións da Coruña, Lugo e Pontevedra, na campaña “En Negro contra as Violencias” co obxectivo de sensibilizar á poboación respecto da situación de violencia na que viven moitas mulleres e para poñer nas axendas a agresividade machista como un problema público e que afecta a toda a cidadanía.

Desde o ano 2008, as cifras oficiais rexistran 619 asasinatos machistas no conxunto do Estado e 43 en Galicia e, no que vai de ano, a violencia contra as mulleres acabou coa vida de 10 menores.

O Concello compra camas xeriátricas para ceder gratuitamente aos usuarios dos servizos sociais

O CONCELLO COMPRA CAMAS XERIÁTRICAS PARA CEDER GRATUITAMENTE AOS USUARIOS DOS SERVIZOS SOCIAIS

O Concello de Cedeira vén de adquirir un total de dez camas xeriátricas con carro elevador para usuarios dos Servizos Sociais co fin de complementar a prestación domiciliaria a persoas con escasos recursos. O importe do contrato, adxudicado á empresa Coloro SL, ascendeu a 13.550 euros (IVE incluído).

A concelleira de Servizos Sociais, Manuela López Rodríguez, sinalou que as catro primeiras camas xa foron entregadas e adiantou que é intención do goberno municipal ampliar o subministro coa adquisición de dez unidades máis con cargo aos orzamentos do próximo ano. López Rodríguez avaliou esta decisión na demanda existente e na necesidade de substituír as actuais polo mal estado no que se atopan. Neste sentido, a concelleira explicou que as que agora están en uso foron cedidas no seu día polo Sergas con motivo da reforma do complexo sanitario Arquitecto Marcide.

Os usuarios de Servizos Sociais que por enfermidade ou convalecencia necesiten unha cama xeriátrica só terán que cumprimentar a correspondente solicitude para ter acceso a unha delas. O Concello de Cedeira cederá o equipamento de maneira gratuíta durante o tempo que sexa necesario.