Skip to content Skip to left sidebar Skip to footer

PERSOAL E FACENDA

O SOCIALISTA MOREDA GIL FOI INVESTIDO POR TERCEIRA VEZ COMO ALCALDE DE CEDEIRA

Pablo Diego Moreda Gil é de novo alcalde de Cedeira cos 5 votos do PSdeG-PSOE na corporación. A abstención dos catro representantes do BNG facilita un goberno que o socialista definiu no seu discurso como “progresista e galeguista” e que, segundo dixo, ten as portas abertas para a entrada do Bloque. “O pobo é sempre quen máis ordena, fagámoslle caso e formemos un gran grupo de coalición que volva a ser un exemplo de boa xestión como foi aquel goberno entre 2015 e 2019”, dixo o alcalde.

Moreda Gil recordou o bo traballo que desenvolveu a coalición de forzas que encabezou en 2015, cando asumiu por primeira vez a alcaldía. Aquel mandato “descubriu unha nova forma de facer política en Cedeira, cun goberno municipal cercano a todas as veciñas e veciños”, dixo, da que xa non se apartou o goberno municipal tras a maioría absoluta acadada en 2019. “O eixo neste mandato 2023-2027 van seguir sendo os acordos e o consenso, que é a mellor forma de garantir un goberno de todas e de todos, un Concello útil, social e cercano, un goberno que traballará pola defensa do interés xeral”, dixo o alcalde.

No seu discurso, Moreda tivo palabras de agradecemento e de estímulo para as persoas que participaron na corporación e no goberno anterior, así como para os traballadores e traballadoras municipais. “Nada une máis á xente que o proxecto dun pobo do que sentirmos orgullosos, no que todas e todos temos cabida. Desplegar unha sólida confianza en nós mesmos depende da calidade das nosas conversas, de ter como ambicións metas elevadas, de pensar e crer que nós podemos, que temos a capacidade, a competencia e a autonomía para facelo viable”, rematou.

O CONCELLO DISTRIBUE ENTRE A CIDADANÍA UN NOVO NÚMERO DO BOLETÍN INFORMATIVO AS7PARROQUIAS

O goberno local de Cedeira reparte estes días entre a veciñanza o boletín informativo As7Parroquias, que chega ao seu número 22. A publicación dá conta do traballo do Concello nos últimos meses, destacando o balance da campaña de turismo deste verán. A revalorización do atractivo da vila para as persoas que a visitan grazas entre outras cousas á recuperación das cetarias do Sarridal, a posta en marcha da vía ferrata, ou a reapertura do Castelo da Concepción, xunto coa alta afluencia que tiveron as festas e o resto das actividades confirmaron unha volta á normalidade de antes da pandemia.

No boletín infórmase do balance dos proxectos acollidos ao programa do GALP A MariñaOrtegal na localidade. Foron máis de 800.000 euros investidos en diferentes iniciativas dirixidas a poñer en valor a economía e a cultura ligadas á pesca e o marisqueo en Cedeira. A localidade distinguiuse no último plan de actuación plurianual do GALP como unha das máis dinámicas no desenvolvemento de accións e o Concello participa xa na definición do novo plan que estará vixente ata o 2027.

As7Parroquias dá conta tamén do avance nas escavacións no xacemento do Sarridal, da adxudicación de axudas ao tecido asociativo no eido deportivo e no sociocultural, da licitación da ambiciosa renovación do pavimento do polideportivo municipal e, entre outras cousas, a compra de libros para a escola infantil da Galiña Azul. O boletín trata tamén sobre o recorte de profesorado no IES Punta Candieira e do rexeitamento que esta medida xerou entre a cidadanía e no Concello, así como do ninguneo da Consellería de Educación á petición dunha entrevista urxente que foi unanimemente solicitada pola corporación municipal.

A contraportada do boletín está adicada á Escola de Música Vila de Cedeira, que cumpre dez anos con gran vitalidade.

Pódese descargar o Boletín na seguinte ligazón:

VER PDF Boletín as 7 parroquias nº22

CONVOCATORIA DO CURSO DE FORMACIÓN PARA A OBTENCIÓN DO CERTIFICADO DE PROFESIONALIDADE DE SOCORRISMO EN MEDIOS ACUÁTICOS NATURAIS

O día 10/03/2022 a Presidencia desta Mancomunidade aprobou as bases específicas que rexerán a convocatoria do curso de formación para a obtención do certificado de profesionalidade de socorrismo en medios acuáticos naturais.

As bases íntegras do proceso selectivo encóntranse publicadas na web da Mancomunidade de Concellos da Comarca de Ferrol www.comarcaferrolterra.es

A presentación de instancias realizarase segundo se especifica nas bases conforme ao modelo que figura como Anexo I, no prazo de oito días naturais dende a publicación das presentes bases no BOP da Coruña.

Máis información e anuncios relacionados con este proceso no taboleiro de anuncios

Descarga pdf Bases do curso de socorrismo 2022

Descarga pdf Formulario solicitude