Skip to content Skip to left sidebar Skip to footer

PARTICIPACION

O CONCELLO PON EN MARCHA O PROGRAMA “DE RUTA” CON TRES SAÍDAS POLOS EXCEPCIONAIS PAISAXES DO MUNICIPIO

O Concello de Cedeira pon en marcha durante o próximo período de vacacións de Semana Santa o programa ”De Ruta” con tres saídas guiadas a pé polos excepcionais paisaxes do municipio. O goberno local conta coa empresa local de turismo activo Portal Norte para organizar estas tres saídas, que serán os días 1, 5 e 8 de abril, todas de balde e cun límite máximo de 15 participantes.

O programa “De Ruta” comezará o sábado 1 de abril cun percorrido ao faro de Robaleira. Será unha saída de 8km, de dificultade baixa/media e que se realizará nunhas catro horas, con saída desde o Palacete Municipal ás 10.00 da mañá. O itinerario será circular, parte del polo sendeiro que vai desde as vellas fábricas de San Isidro ao faro. Unha vez alí o grupo poderá ver a antiga cetaria, a cala Mi Señora e gozar coas vistas da ría de Cedeira. A volta realizarase polo camiño que leva da praia das Cerdeiras ao Barral.

Para o mércores 5 de abril, a proposta é unha ruta polos Altos de Santo André. Serán tamén 8km dunha dificultade técnica baixa/media, pero con saída desde o mirador dos Carrís. A cita será alí, tamén as 10.00 da mañá, e o percorrido irá pola Serra da Capelada e permitirá gozar coas vistas dos cantís de Santo André de Teixido, a Vixía de Herbeira e as rías de Ortigueira e Cedeira.

A última ruta, o sábado 8 de abril, será un percorrido lineal desde Punta Candieira a Punta Sarridal, cubrindo unha distancia de 10km que, se estima, levará cinco horas. Nesta saída non se vai pisar asfalto e a organización levará ás persoas participantes, en furgonetas, ata o lugar de inicio da andaina. O punto de encontro será no Palacete Municipal ás 09.30 horas.

As persoas interesadas teñen que realizar a súa inscrición no Polideportivo Municipal, ou ben chamando ao número 981 482 633 ou enviando un mail a polideportivocedeira@gmail.com.

O EQUIPO DE FÚTBOL FEMININO DISCALZAS RECIBIRÁ ESTE ANO O PREMIO MULLER DA VILA CON MOTIVO DO 8-M

O Concello de Cedeira conmemorará un ano máis o 8M, Día da Muller, cunha serie de actividades coas que procura concienciar sobre a igualdade e rexeitar todo tipo de discriminación por razóns de xénero. Como é habitual, a corporación municipal participará la lectura dun manifesto institucional diante do consistorio, o mércores ás doce do mediodía, acto que contará tamén coa actuación do grupo da Escola de Música de Cedeira.

Pero a programación do 8-M comezará hoxe, día 7, cunha proposta lúdica e divulgativa arredor da igualdade. Trátase da actividade “Feminismos no tempo”, na que as persoas participantes poderán descubrir os feitos máis relevantes da historia do feminismo a través dunha baralla con 55 cartas. Será a partir das 18.30 horas na Sala Áncora.

Despois do acto institucional do mércores, o programa terá continuidade o venres día 10 coa entrega do premio “Muller da Vila”, que cada ano concede a Asociación Mulleres da Vila. Nesta ocasión, o acto será ás 19.00 horas no Auditorio e o recoñecemento irá ao equipo de fútbol feminino Discalzas SD.

A orixe do club remóntase ao ano 2010, cando por iniciativa dun grupo de rapazas, e no seo do club de fútbol da localidade, se creou un conxunto de fútbol 8 integramente feminino, con 16 fichas. Á tempada seguinte xa xurdiu un segundo equipo, necesario para dar cabida ao gran número de mozas interesadas en xogar. Na loita por ter os mesmos dereitos que os futbolistas homes, chegou un momento en que as xogadoras decidiron separarse do club e iniciar, a partir de 2017, unha nova andaina baixo o nome Discalzas SD.

A nova sociedade deportiva xogou durante catro tempadas na competición de fútbol 7 e 8, na zona de Ferrol, tras o cal xurdiu un novo contratempo. Disolveuse a liga na que xogaba o equipo, ao que Discalzas SD reaccionou creando o primeiro equipo de fútbol 11 feminino da historia de Cedeira, que nestes momentos conta con 21 xogadoras e compite na segunda división galega. O premio Muller da Vila quere recoñecer o valores de igualdade, tolerancia, respecto e compañerismo que brilan dentro da entidade, así como a tenacidade amosada polas xogadoras para vencer todos os atrancos e conquistar o seu espazo dentro do fútbol.

O programa do 8-M rematará o día 17 de marzo, data na que está prevista a proxección, no Auditorio Municipal, do traballo “Diversas mulleres, mulleres diversas”. É un audiovisual realizado polo equipo Faro de Igualdade do IES Punta Candieira.

COMEZA O PROCESO DOS ORZAMENTOS PARTICIPATIVOS, OS TERCEIROS CONFIADOS AO ALUMNADO DO PUNTA CANDIEIRA

O alumnado de 3º da ESO do instituto Punta Candieira embárcase neste mes de febreiro no proceso de preparación dos terceiros Orzamentos Participativos do Concello de Cedeira. Coa positiva experiencia das dúas edicións anteriores, o Concello ten planificado o traballo para que os rapaces e rapazas poidan levar a súa proposta diante do pleno da corporación o día 5 de maio, na mesma sesión na que está previsto aprobar a constitución do Consello Local de Infancia e Adolescencia.

Os Orzamentos Participativos son unha peza máis dunha aposta decidida do goberno local de Cedeira por dar voz e voto á mocidade e á infancia, na que tamén se insire o novo modelo de xestión do Centro de Ocio Xuvenil (COX) e o desenvolvemento do Plan de Infancia e Adolescencia. Segundo destacou Carmela Prieto, a concelleira de Participación e Xuventude, nos dous últimos anos foron aprobadas varios proxectos a través dos Orzamentos Participativos, aos que o Concello reserva 20.000€ do presuposto municipal en cada exercicio. Así, destes procesos saiu o parque de calistenia e un ciclo de autocine, así como unhas melloras no parque Floreal que xa están contratadas e pendientes de executar en breve.

O traballo para sacar adiante os terceiros Orzamentos Participativos comezou este mes con unha circular informativa para as familias do alumnado de 3º de ESO e as primeiras sesións cos propios mozos e mozas implicadas, sempre nas horas semanais reservadas a titorías. A experiencia comeza por coñecer o funcionamento interno do Concello, quen o compón, cales son as súas competencias e cales son os pasos para a toma de decisións. A continuación estúdase tamén o territorio, promovendo unha reflexión sobre as necesidades do municipio. Despois comeza a elaboración de propostas, fase na que o alumnado redacta os seus proxectos e debate sobre eles baixo pautas de solidariedade e equilibrio entre parroquias e colectivos, cunha visión de xénero.

No vindeiro mes de abril o persoal técnico municipal analizará as propostas do alumnado para verificar se entran dentro das competencias municipais e son viables económica e xuridicamente. Para cada unha das ideas, o persoal do Concello emitirá un informe no que detallarán se é ou non viable e as razóns, de maneira que o alumnado poderá aprender sobre custes reais, normativas aplicables, permisos necesarios, medios e recursos ou prazos que atinxen ao seu desenvolvemento. As propostas viables serán as que se sometan a votación entre o alumnado, nunha asemblea que se celebrará o día 27 de abril. Así, os mozos e mozas que sexan elixidos polo grupo encargarase de expor diante do pleno da corporación, o 5 de maio, as propostas seleccionadas para acadar o investimento e facerse realidade.