Skip to content Skip to left sidebar Skip to footer

PARTICIPACION

75 PERSOAS PARTICIPARON NAS CATRO XEORRUTAS ORGANIZADAS POR CEDEIRA, MOECHE E ORTIGUEIRA DURANTE A SEMANA SANTA

O proxecto de xeoparque pechou este sábado o programa de xeorrutas organizadas para dar a coñecer algúns dos principais elementos que avalan a candidatura a Xeoparque Mundial da UNESCO. Foron catro itinerarios organizados polos concellos de Cedeira, Ortigueira e Moeche nos que as persoas participantes descubriron as peculiariedades do Complexo Xeolóxico do Cabo Ortegal como espazo único para comprender a dimensión da denominada Oroxenia Varisca que nesta zona elevou á superficie materiais que habitualmente só se encontran no Manto terrestre, a máis de 70 quilómetros de profundidade. As xeorrutas completaron rapidamente as 75 prazas ofertadas para ver os afloramentos de ecloxitas da banda sur da Capelada, as areas negras de Teixidelo, as formacións de toelo arredor do val de Moeche e a presenza de cromo e outros metais no borde dos cantís máis elevados da Europa continental.

Os itinerarios iniciáronse o mércores a primeira hora da mañá coa exitosa xeorruta da praia das areas negras e continuaron ao día seguinte, Xoves Santo, co percorrido do toelo -unha serpentinita abundante en certas zonas de Moeche, Cerdido e San Sadurniño- e o dos Penidos, lugar onde o IGME sinalou recentemente o sexto dos GEOSITES -lugares con relevancia xeolóxica internacional- cos que conta o ámbito do Proxecto de Xeoparque do Cabo Ortegal.

A cuarta xeorruta desenvolveuse na tarde do pasado sábado entre o cruceiro de Teixidelo e a Garita de Herbeira, seguindo o borde dos cantís para observar, ademais da espectacular paisaxe, as singulares peridotitas e piroxenitas entre as que se atopan presentes acumulacións de cromo e platino que a mediados do século pasado foron obxecto de estudo para coñecer seu potencial económico.

Estes percorridos -organizados nesta ocasión polos concellos de Cedeira, Ortigueira e Moeche- encádranse no plan de difusión xeolóxica e turística da zona aspirante a se converter en xeoparque mundial da UNESCO. Trala designación oficial das dúas candidaturas estatais en novembro pasado, neste intre o dossier do proxecto xa está en París en mans dos responsables do Programa Internacional das Ciencias e os Xeoparques para a súa análise.

Agárdase que en cuestión de días a UNESCO designe as persoas que levarán a cabo ao longo deste verán a avaliación de campo do proxecto Cabo Ortegal e do de Costa Quebrada (Cantabria), o outro territorio aspirante a se converter en xeoparque. Na súa visita, o persoal técnico e científico enviado polas Nacións Unidas verificará tanto a exclusividade xeolóxica da zona como o labor que se está facendo para vinculala cun desenvolvemento socioeconómico sostible.

O BOLETÍN AS7PARROQUIAS CHEGA AO SEU NÚMERO 20 COA INFORMACIÓN DO ORZAMENTO DE 2022

O goberno local de Cedeira vai distribuír estes días o número 20 do boletín informativo As7Parroquias, un instrumento de transparencia desde o que se fan chegar á veciñanza as novidades do traballo municipal. Desta volta infórmase da aprobación do novo orzamento municipal e das principais partidas ás que se van destinar os recursos, entre as que destaca a de servizos sociais. O avance do proxecto do Xeoparque Cabo Ortegal e a súa entrada na fase de avaliación, xunto coa presencia de Cedeira en Fitur, son outras das cuestións que trata a publicación.

A contraportada do boletín, sempre adicada ao tecido asociativo da vila, ofrece unha reportaxe sobre a Confraría de Pescadores. O seu presidente, Ricardo Vilar, fala da situación do sector e dunha das súas máis inmediatas preocupacións, o proxecto eólico marino Nordés, que rexeitou o pósito e tamén a corporación local.

Outros temas que aborda este número de As7Parroquias son as obras acometidas na ampliación da escola infantil da Galiña Azul, a sinalización das colonias felinas protexidas, o avance no programa municipal de recuperación de fontes e lavadoiros, o proxecto de incorporar un punto limpo itinerante para a recollida de enseres, os cursos e actividades de Cultura e de Servizos Sociais e a nova marca territorial de Cedeira.

Pódese descargar o boletín na seguinte ligazón:

Descargar PDF número 20 do boletín informativo As7Parroquias

ALUMNADO DO IES PUNTA CANDIEIRA PARTICIPARÁ HOXE NOS ACTOS DO 8M ORGANIZADOS POLO CONCELLO

O Concello de Cedeira vai conmemorar hoxe o Día Internacional da Muller cun acto institucional ás 12.30 horas, na praza da Reitoral, no que se vai ler un manifesto de reivindicación da igualdade en todos os eidos. No acto van participar rapaces e rapazas do IES Punta Candieira e contará coa música que van aportar o dúo María e Giulia e o Grupo da Escola de Música Vila de Cedeira.

A continuación, os participantes acudirán á Biblioteca Municipal López Cortón para inaugurar o Punto Lila, no que se van concentrar diferentes lecturas relacionadas coa igualdade entre xéneros, tanto contos para o público infantil como libros para a mocidade ou as persoas adultas.

Para o vindeiro día 11, venres, o Concello ten previsto celebrar neste Punto Lila a presentación do libro Comezar desde cero: Voces de mulleres rescuperando as súas vidas, obra de Tania Merelas. A obra é a culminación da tese doutoral desta educadora social, socia e traballadora de Arabías.

Os actos do 8M rematarán coa gala prevista o sábado, día 12, para a entrega do premio Muller da Vila. Como se informou, é un galardón que concede a Asociación Mulleres da Vila e que recae desta volta, na súa quinta edición, la xunta local da Asociación Española Contra o Cancro. A gala será ás 18.00h no Auditorio Municipal.