Aberto o prazo para solicitudes de montaxe atraccións de feira e postos venda en Festas Patronais Cedeira 2018

ABERTO O PRAZO DE SOLICITUDES DE MONTAXE ATRACCIÓNS DE FEIRA E POSTOS VENDA EN FESTAS PATRONAIS CEDEIRA 2018

Ata o 31 de xullo esta aberto o prazo para presentar solicitudes para montaxe de postos e atraccións de feira nas Festas Patronais de Cedeira 2018.

As solicitudes deberán recollerse nas oficinas da Policía Local e presentarse debidamente cumprimentadas para poder optar aos postos marcados e limitados no espazo asignado a tal fin. As solicitudes deberán presentarse antes do 31 de xullo para poder instalarse durante as Festas Patronais que este ano irán do 10 ao 17 de agosto.

A Policía Local efectuará un control estrito sobre as autorizacións dando cumprimento á nova Lei de Espectáculos Públicos e Actividades Recreativas que entrou en vigor o pasado 2 de xullo, e que entre outros obriga aos titulares de atraccións de feira a presentar unha declaración responsable, a dispoñer de seguro de responsabilidade civil subscrito cunhas cantidades mínimas, e a designar unha persoa que asuma a responsabilidade técnica da montaxe da instalación.

Doutra banda, como medidas de precaución que xa se empezaron a adoptar o ano pasado, esixirase a todos os postos, independentemente do seu tamaño, unhas medidas mínimas como cadro eléctrico homologado, ancho de vía mínimo libre de 3 mt., altura mínima de cables eléctricos, prohibición de tendido de cables que atravesen a vía a nivel do chan, etc.

DESCARGA PDF Solicitude Declaración Responsable Postos Feira

Concello de Cedeira, ANPA e comunidade educativa apoian a formación profesional no IES Punta Candieira coma opción de futuro

CONCELLO DE CEDEIRA, ANPA E COMUNIDADE EDUCATIVA APOIAN A FORMACIÓN PROFESIONAL NO IES PUNTA CANDIEIRA COMA OPCIÓN DE FUTURO

O xoves 14 de xuño, a directora do IES Punta Candieira de Cedeira, Teresa Somoza, e dous profesores de ciclos formativos mantiveron unha reunión co alcalde Pablo Moreda dentro dun plan de promoción da formación profesional que se está a levar a cabo desde o instituto.

Nesta reunión o alcalde mostrou o seu total apoio aos ciclos que se van impartir no IES o curso que vén: CM Actividades comerciais, CM Instalacións eléctricas e automáticas, CM Mantemento electromecánico, CS Administración e finanzas, CS Mecatrónica industrial (ordinario e adultos) e CS Sistemas electrotécnicos e automatizados (adultos), todos eles cun elevado grao de inserción laboral (preto do 100 %) e gran proxeción académica cara a titulacións superiores.

O mesmo apoio recibiuse tanto da ANPA “O Beco”, a través da súa presidenta Beatriz García, como do conxunto da comunidade educativa.

Lémbrase que o prazo de admisión para os ciclos formativos é desde o 25 de xuño ao 3 de xullo ás 13:00 horas.

Xornada sobre protección da infancia fronte ao maltrato e o abuso sexual

XORNADA SOBRE PROTECCIÓN DA INFANCIA FRONTE AO MALTRATO E O ABUSO SEXUAL

A Concellería de Benestar Social e Igualdade do Concello de Ortigueira a través do Centro de Información á Muller organiza unha Xornada sobre protección da infancia fronte ao maltrato e o abuso sexual dirixida ás familias e aos profesionais dos servizos sociais, profesionais educativos e da saúde. Colabora a Xunta de Galicia

O obxectivo da xornada é visibilizar a problemática existente, moi soterrada todavía e máis no rural, e acadar unha actuación eficaz facilitando o coñecemento das ferramentas de deteción e os recursos.

Data: 30 de maio de 2018
Lugar de celebración: Centro de Participación Social de San Roque. Ortigueira

Inscricións ata o luns 28 de maio. PRAZAS LIMITADAS

Descarga o formulario de inscrición

Descarga do programa

Máis información: CIM: 981 40 25 42

Cedeira volve a mirada cara a Cuba

CEDEIRA VOLVE A MIRADA CARA A CUBA

Vinte e cinco veciños parten hoxe cara á Habana, nunha viaxe organizada polo colectivo de Piñeiro en agradecemento aos fundadores da casa escola, en 1927.

En 1921 constituíuse a Asociación Fillos do Concello de Cedeira na Habana, co obxectivo de «fomentar a instrución entre os habitantes de Cedeira e a cultura entre os seus asociados», segundo recollen os estatutos. Seis anos despois, a sociedade fundou casa escola de Piñeiro, nesta parroquia cedeirense, grazas a «a un préstamo de cen pesos, como mínimo por un ano e sen intereses», por parte de Manuel Rodríguez, vicepresidente da entidade, como recordaba Antonio Rei Caruncho, Tas, directivo da Asociación Veciños de de Piñeiro, nos actos conmemorativos do 90 aniversario do centro educativo.

A escola formou a varias xeracións, desde 1927 ata 1974, cando o ensino se aglutinou no CEIP Nicolás del Río; e desde entón ata 1987, como sede da sección do Instituto Politécnico de Formación Profesional Marqués de Suanzes (Ferrol). Hoxe parten cara á illa caribeña 25 cedeirenses, nunha viaxe de sete días organizado polo colectivo veciñal de Piñeiro para coñecer a algún dos descendentes dos fundadores de cásaa escola. «Aquela asociación formada por emigrantes galegos mandou diñeiro para a construción do edificio e agora a nosa levaralles medicamentos, roupa ou artigos de aseo persoal [doados por familiares daqueles emigrantes e por cubanos que residen na zona], ademais dun ordenador [o equipo do que dispoñen non funciona], comprado con fondos propios, e unha placa conmemorativa», explica Fina Nebril, secretaria da organización. «Tamén imos convidar aos membros da directiva a unha comida de confraternidade, porque alí temos todos familiares, na considerada como a terceira cidade galega, o cemiterio de Cristóbal Colón», apunta Tas, que participará na expedición. Tamén lles entregarán unha placa encargada polo Concello de Cedeira para render tributo aos promotores da vella casa escola.

«Fixéronnos unha escola preciosa, que aínda está en activo [como sede desta e outras entidades], e nunca se lles fixo un acto de agradecemento», lamenta Tas. Esta viaxe servirá para resarcirlles, dalgún modo, polos anos de silencio. «Foi xestionado con moita ilusión, porque sempre tivemos empeño en homenaxear aos emigrantes do noso concello, que tan ben acollidos foron polo pobo cubano, e que apostaron pola educación como base para facer medrar ás persoas e ás nacións», remarca Nebril. A Asociación de Fillos do Concello de Cedeira na Habana, que preside Olivia Menéndez, está «moi agradecida» por unha colaboración que non esperaba. Entre outros lugares, visitarán o complexo cultural Alicia Alonso, antigo Centro Galego.

Fonte: La Voz de Galicia

Pode consultar a nova na seguinte ligazón:

IR Á LIGAZÓN Cedeira volve a mirada cara a Cuba

 

Aviso de corte de suministro eléctrico o 9 de febreiro

AVISO DE CORTE DE SUMINISTRO ELÉCTRICO O 9 DE FEBREIRO

A empresa Unión Fenosa vén de remitir unha nova comunicación ao Concello, informando do corte no suministro eléctrico o día 9 de febreiro de 2018, de 9:00 a 12:00 horas. A continuación, pode ver o texto da comunicación recibida:

“Co fin de efectuar os traballos de mantemento e desenvolvemento da rede eléctrica precisos para poder atender nas mellores condicións as necesidades de subministración da zona, informámoslles que o próximo día 9 de febreiro de 2018, de 9:00 a 12:00 horas, imos proceder a deixar fóra de servizo unha serie de instalacións, o cal pode provocar interrupcións na súa subministración de electricidade durante ese intervalo de tempo.
As instalacións eléctricas sometidas a descargo afectan ás seguintes rúas ou lugares:
ALDEA BEREIXO, PARDIÑEIRA, PONTIGAS, TOXO, AV. ZUMALACARREGUI, ALDEA VERIÑO DE ABAIXO, ATRIO, EIRAVEDRA, CANABAL, NOGUEIRA, BARRAL, REGO, RUA, BOUZA, TIDE, ERBELLAS, CASANOVA, PAINCEIRA, FORMIGUEIRO.

Rogamos disculpen as posibles molestias ocasionadas”.

A Asociación Sobre Rodas xa ten o seu transporte adaptado

A ASOCIACIÓN SOBRE RODAS XA TEN O SEU TRANSPORTE ADAPTADO

Hoxe fíxose oficial a axuda que recibiu a Asociación Sobre Rodas, por parte do Concello de Cedeira e máis da Obra Social “La Caixa”, para a posta en funcionamento do transporte adaptado coa celebración dun acto no que estiveron presentes o alcalde, Pablo Moreda Gil; o director de Caixa Bank na localidade, Raúl Polo, e a presidenta da entidade Malena Pérez Villar.

O Concello de Cedeira colaborou cunha achega de 4.700 euros para a compra e instalación da plataforma elevadora, mentres que a entidade bancaria contribuíu coa cantidade de 12.000 euros para mercar o vehículo.

Pablo Moreda Gil reiterou o compromiso que existe no equipo de goberno coas persoas con mobilidade reducida, unha postura que se vén materializar coa execución de obras que simplifiquen o día a día de quen teña este tipo de problema. A eliminación das barreiras arquitectónicas en rúas, prazas e centros públicos está a ser unhas das prioridades do executivo local dentro do presente mandato. O alcalde tamén quixo agradecer o traballo que tanto desde a asociación como por parte dos voluntarios que colaboran con Sobre Rodas se está a realizar para tratar de normalizar o máis posible a vida das persoas de van en cadeira de rodas ou teñen necesidades especiais.

Raúl Polo agradeceu aos responsables de Sobre Rodas o seu traballo a prol daquelas persoas con problemas de mobilidade e destacou que “é unha gran satisfacción para todos os compañeiros de Caixa Bank en Cedeira poder apoiar á asociación a mellorar o servizo que presta aos seus usuarios”.

Por último, Malena Pérez Villar recordou que sen a axuda do Concello e da entidade bancaria a entidade non podería ofrecer o servizo, que está a realizar unha media de 100 viaxes ao mes. Pérez Villar agradeceu o xesto de xenerosidade que tanto a Obra Social “La Caixa” como o Concello tiveron para os usuarios da asociación. “É unha deuda eterna”, dixo.

Aviso de corte de suministro eléctrico o 30 xaneiro

AVISO DE CORTE DE SUMINISTRO ELÉCTRICO

A empresa Unión Fenosa vén de remitir unha comunicación ao Concello, informando do corte no suministro eléctrico o día 31 de xaneiro de 2018, de 9:00 a 12:00 horas. A continuación, pode ver o texto da comunicación recibida:

“Co fin de efectuar os traballos de mantemento e desenvolvemento da rede eléctrica precisos para poder atender nas mellores condicións as necesidades de subministración da zona, informámoslles que o próximo día 31 de xaneiro de 2018, de 9:00 a 12:00 horas, imos proceder a deixar fóra de servizo unha serie de instalacións, o cal pode provocar interrupcións na súa subministración de electricidade durante ese intervalo de tempo.
As instalacións eléctricas sometidas a descargo afectan ás seguintes rúas ou lugares:
ESTEIRO: ALDEA LOUREIROS, ALDEA PEDREIRA, ALDEA CAMPELO, PEDRALBA, ALDEA RIO DO MUIÑO, ALDEA SAA.

Rogamos disculpen as posibles molestias ocasionadas”.

O Pleno da Deputación aproba o Plan de conservación de vías provinciais, cun orzamento de 7,8 millóns de euros

O PLENO DA DEPUTACIÓN APROBA O PLAN DE CONSERVACIÓN DE VÍAS PROVINCIAIS, CUN ORZAMENTO DE 7,8 MILLÓNS DE EUROS

O pleno da Deputación da Coruña aprobou hoxe a primeira fase do Plan de conservación de vías provinciais para o 2018, dotado cun orzamento de 7.799.835 euros.

O deputado responsable da área de Vías e Obras da institución provincial, José Manuel Pequeño, explicou que este programa contempla a execución de traballos de mantemento, mellora do firme e reparación de fochancas nos máis de 2.000 quilómetros de estradas cos que conta a rede viaria da Deputación. Todas estas actuacións están destinadas a “mellorar as condicións de circulación, aumentar a seguridade viaria nas estradas coruñesas e reducir a sinistralidade”, afirmou.

Pequeño lembrou que ademais do Plan de conservación, a Deputación puxo en marcha o ano pasado un programa destinado exclusivamente á limpeza das estradas provinciais, dotado con 4 millóns de euros para o período 2017-2018. Por primeira vez, estas tarefas son obxecto dun contrato independente do Plan de conservación, co obxectivo de mellorar e axilizar este servizo no que se inclúe a limpeza das marxes de todas as estradas, para facilitar a visibilidade e a circulación, evitar a propagación de incendios e incrementar a drenaxe de augas pluviais.

A primeira fase do Plan de conservación de vías provinciais suporá un investimento de preto de 4.000 euros por quilómetro destinados integramente á reparación e mantemento das estradas dos concellos coruñeses, divididos en 36 grupos.

GRUPO DE ESTRADAS

ORZAMENTO

GRUPO 1A ORTIGUEIRA

295.940,46

GRUPO 1B CARIÑO

129.935,11

GRUPO 2 MAÑÓN E AS PONTES

243.399,51

GRUPO 3 CEDEIRA, CERDIDO E VALDOVIÑO

156.620,77

GRUPO 4 FERROL E NARÓN

179.068,83

GRUPO 5 MOECHE, SAN SADURNIÑO E AS SOMOZAS

369.335,11

GRUPO 6 ARES, FENE,MUGARDOS E NEDA

88.148,83

GRUPO 7 CABANAS, MIÑO, PADERNE E PONTEDEUME

221.006,31

GRUPO 8 IRIXOA, MONFERO E VILARMAIOR

305.410,91

GRUPO 9 OLEIROS E SADA

248.801,24

GRUPO 10 CAMBRE, BERGONDO E BETANZOS

293.337,52

GRUPO 11 ABEGONDO, CARRAL E OZA-CESURAS

291.889,84

GRUPO 12 ARANGA, BETANZOS, COIROS, CURTIS E OZA-CESURAS

277.441,08

GRUPO 13A FRADES, ORDES, OROSO E O PINO

194.045,53

GRUPO 13B BOIMORTO, MESÍA E VILASANTAR

309.875,16

GRUPO 14 MELIDE, SANTISO, SOBRADO E TOQUES

181.258,13

GRUPO 15 ARZÚA, BOQUEIXÓN, O PINO E TOURO

167.480,46

GRUPO 16 ARTEIXO, A CORUÑA E CULLEREDO

434.434,60

GRUPO 17 CARBALLO, CERCEDA E A LARACHA

352.819,22

GRUPO 18 CABANA, MALPICA E PONTECESO

309.958.38

GRUPO 19.- CAMARIÑAS, LAXE, MUXÍA E VIMIANZO

161.066,42

GRUPO 20.- CEE, CORCUBIÓN, DUMBRÍA E MAZARICOS

157.359,56

GRUPO 21 AMES, A BAÑA, NEGREIRA E VAL DO DUBRA

200.623,86

GRUPO 22 ORDES, SANTIAGO, TORDOIA, TRAZO E VAL DO DUBRA

282.070,43

GRUPO 23 MAZARICOS, MUROS E OUTES

224.857,29

GRUPO 24 BOIRO, LOUSAME E NOIA

208.099,18

GRUPO 25 BRION, DODRO, PADRÓN E ROIS

281.579,20

GRUPO 26 AMES, SANTIAGO,TEO E VEDRA

207.036,05

GRUPO 27 BOIRO E RIANXO

200.773,93

GRUPO 28 POBRA, PORTO DO SON E RIBEIRA

271.562,62

GRUPO 34.- DP 1914 CARBALLO A PORTOMOURO

167.793,73

GRUPO 35.- CORISTANCO, SANTA COMBA E ZAS

148.109,37

GRUPO 36.- D.P.3404.- SERRA DE OUTES A DUMBRÍA

238.696,60

TOTAL

7.799.835,24

Trámites para a construción das variantes en Pontigas e Cacheiras

O pleno da Deputación tamén aprobou iniciar o expediente de expropiación dos predios necesarios para a execución das variantes de Pontigas (Cedeira) e Cacheiras (Teo) e a mellora dunha intersección na DP 2502 de Valdoviño a Cerdido, que supoñen un investimento total de 273.723,32 euros.

No caso da modificación do trazado da DP2204 ao seu paso polo núcleo de Pontigas, no termo municipal de Cedeira, destínanse 124.101 euros ás expropiacións, que se inclúen nos 731.188 euros do orzamento total das obras.

Os traballos requirirán a ocupación de 16.000 metros cadrados de terras de monte, prado e labradío, co obxectivo de mellorar a estrada que conduce a un dos principais destinos turísticos da provincia, Santo André de Teixido. A variante, que terá unha lonxitude aproximada de 1,2 quilómetros, permitirá rodear o núcleo de Pontigas evitando as acumulacións de tráfico e mellorando notablemente a seguridade viaria na zona.

Por outra banda, o proxecto para a DP 8202 de Galanas a Cacheiras consistirá na construción dunha nova variante no núcleo de Cacheiras que contribuirá a mellorar notablemente a seguridade viaria na zona da igrexa e da escola infantil.

O tramo terá 4,2 quilómetros de longo e 9 metros de ancho. Deste modo, reducirase a perigosidade do trazado actual, que conta cunha dobre curva e ademais discorre moi preto das vivendas. O orzamento destas obras ascende a 316.336,52 euros, aos que se suman agora 138.543 euros para as expropiacións.

Por último, na DP2502, de Valdoviño a Cerdido, destínanse 11.077 euros á expropiación dos predios afectados pola mellora da intersección no punto quilométrico 0+675, no termo municipal de Valdoviño. Este proxecto, que ten un orzamento total de 175.398 euros, permitirá mellorar o cruce próximo ao CPI de Atios, no que estudan uns 500 rapaces do municipio, aumentando á seguridade viaria e dotando aos autobuses escolares do espazo suficiente para manobrar.

Manifestación en defensa da Sanidade Pública

Na sesión plenaria celebrada esta mañá, a Deputación tamén aprobou unha moción en defensa da Sanidade Pública cos votos favorables do BNG, PSdeG, Alternativa dos Veciños, Compostela e Marea Atlántica, e a abstención do PP.

A moción, proposta polas cinco agrupación políticas, foi presentada polo deputado de Marea Atlántica, Daniel Díaz, quen animou á cidadanía a participar na manifestación convocada pola plataforma SOS Sanidade Pública, o vindeiro día 4 de febreiro en Santiago de Compostela, en prol da defensa dun servizo fundamental como é o sistema público de atención sanitaria.

Durante as intervención dos portavoces, o deputado do BNG, Xosé Regueira, criticou a reforma da Lei de saúde pública aprobada pola Xunta de Galicia o pasado mes de decembro, e lamentou que o “novo modelo precariza a sanidade pública en beneficio da privada”, sinalando que “seguen a dar pasos cara a privatización total do sistema sanitario”.

“Estamos diante dun dos piares básicos do benestar, poucas cousas son tan importantes para unha sociedade como a sanidade pública” apostilou Regueira.

Pola súa parte, o portavoz do Partido Popular, Agustín Hernández apelou a “prudencia”, e lamentou a “politización da manifestación”. Así, subliñou que “existen datos que acreditan o bo funcionamento da Sanidade Pública Galega”, un sistema, incidiu, “cen por cento público”.

Apoio a “Ponte… nas ondas!” como patrimonio Cultural Inmaterial da Unesco

No pleno aprobouse tamén unha declaración institucional que recoñece o traballo desenvolvido desde a asociación cultura e pedagóxica “Ponte…nas ondas! na preservación e salvagarda do patrimonio inmaterial galego portugués e manifesta o seu apoio para que sexa inscrita na Lista das Mellores Prácticas co patrimonio Cultural e Inmaterial da Unesco.

“Ponte… nas ondas!” naceu en 1995 e ten entre os seus fins promover actividades culturais e pedagóxicas así como fomentar a identidade común dos dous pobos dentro dunha perspectiva xeral de integración europea e do mundo lusófono. En 2002 comezaron a traballar para recuperar e difundir o Patrimonio Cultural común aos pobos galego e portugués.

Homenaxe ás vítimas do Holocausto

Como declaración institucional co apoio de todos os grupos foi tamén aprobada no pleno da Deputación unha iniciativa que insta a todas as administración públicas a elaborar, divulgar e fomentar os programas educativos que difundan entre as xeración futuras a ensinan do Holocausto, co fin de axudar a previr actos de xenocidio no futuro.

A declaración apróbase arredor da conmemoración o 27 de xaneiro como Día Internacional en memoria das vítimas do Holocausto, designado en 2005 pola ONU, na data en que se fai o aniversario da liberación en 1945 do campo de concentración e exterminio nazi situado en Birkenau, Auschwitz e tamén da celebración do Día Escolar pola Non violencia e a Paz o 30 de xaneiro.

A iniciativa rexeita e condena a negación, total ou parcial, do Holocausto como feito histórico. A declaración lembra tamén que “entre os millóns de vítimas internadas e asasinadas nos campos de exterminio do réxime nazi, atopábanse milleiros de persoas da cidadanía galega e española de ideoloxía republicana, que padeceron dor e morte, coa necesaria complicidade da ditadura franquista”.

Fonte: Deputación da Coruña

Pode consultar a nova na seguinte ligazón:

IR Á LIGAZÓN O Pleno da Deputación aproba o Plan de conservación de vías provinciais, cun orzamento de 7,8 millóns de euros