NOVAS

O CONCELLO PON EN MARCHA O PROGRAMA “DE RUTA” CON TRES SAÍDAS POLOS EXCEPCIONAIS PAISAXES DO MUNICIPIO

O Concello de Cedeira pon en marcha durante o próximo período de vacacións de Semana Santa o programa ”De Ruta” con tres saídas guiadas a pé polos excepcionais paisaxes do municipio. O goberno local conta coa empresa local de turismo activo Portal Norte para organizar estas tres saídas, que serán os días 1, 5 e 8 de abril, todas de balde e cun límite máximo de 15 participantes.

O programa “De Ruta” comezará o sábado 1 de abril cun percorrido ao faro de Robaleira. Será unha saída de 8km, de dificultade baixa/media e que se realizará nunhas catro horas, con saída desde o Palacete Municipal ás 10.00 da mañá. O itinerario será circular, parte del polo sendeiro que vai desde as vellas fábricas de San Isidro ao faro. Unha vez alí o grupo poderá ver a antiga cetaria, a cala Mi Señora e gozar coas vistas da ría de Cedeira. A volta realizarase polo camiño que leva da praia das Cerdeiras ao Barral.

Para o mércores 5 de abril, a proposta é unha ruta polos Altos de Santo André. Serán tamén 8km dunha dificultade técnica baixa/media, pero con saída desde o mirador dos Carrís. A cita será alí, tamén as 10.00 da mañá, e o percorrido irá pola Serra da Capelada e permitirá gozar coas vistas dos cantís de Santo André de Teixido, a Vixía de Herbeira e as rías de Ortigueira e Cedeira.

A última ruta, o sábado 8 de abril, será un percorrido lineal desde Punta Candieira a Punta Sarridal, cubrindo unha distancia de 10km que, se estima, levará cinco horas. Nesta saída non se vai pisar asfalto e a organización levará ás persoas participantes, en furgonetas, ata o lugar de inicio da andaina. O punto de encontro será no Palacete Municipal ás 09.30 horas.

As persoas interesadas teñen que realizar a súa inscrición no Polideportivo Municipal, ou ben chamando ao número 981 482 633 ou enviando un mail a polideportivocedeira@gmail.com.

O AUDITORIO ACOLLE ESTE SÁBADO A OBRA DE TEATRO “CRÓNICA DUNHA HETEROSEXUAL INSATISFEITA”

A particular viaxe de autodescubrimento dunha muller de mediana idade chega este sábado ao escenario do Auditorio Municipal de Cedeira. A compañía Verdeveras Expresións Artísticas presenta “Crónica dunha heterosexual insatisfeita”, unha obra coproducida polo Centro Dramático galego e escrita e interpretada por María Ángeles Iglesias. A representación, dirixida a un público adulto, será ás 20.30 horas e as entradas poden reservarse anticipadamente a través do whatsapp do número 649 876614.

“Crónica dunha heterosexual insatisfeita” fala dunha muller normal, desas que non van aparecer nunca nun libro de historia, que cae na conta de que está a facerse vella e que, se non fai nada para remedialo, vai morrer conxelada. E decide facer realidade unha das súas fantasías.

A obra é unha comedia con moito fondo, na que se reflexiona sobre a construción da sexualidade, as parellas, os desexos e as motivacións. Unha viaxe na que a protagonista renace e comeza a voar.

Verdeveras Expresións Artísticas naceu no ano 2011 en Santiago de Compostela e está integrada pola dramaturga María Ángeles Iglesias e o músico e compositor Tato López.

O CONCELLO PROXECTA A SUBSTITUCIÓN DAS CALDEIRAS DE GAS POR OUTRAS DE BIOMASA NA PISCINA MUNICIPAL

O goberno local de Cedeira vén de presentar un proxecto de substitución da actual caldeira de gas da piscina municipal por un sistema de biomasa, máis eficiente e menos contaminante, ao Fondo de Cooperación Local. Segundo informou o alcalde, Pablo Diego Moreda Gil, a actuación está orzamentada en algo máis de 92.000€ e solicitouse o 100% de axuda para financialo totalmente a través da devandita convocatoria da Xunta de Galicia.

O alcalde de Cedeira destacou que o cambio de sistema vai aforrar ao ano a emisión de 61,39 toneladas de CO2 á atmósfera. Actualmente, a piscina municipal conta con dúas caldeiras de gas, un combustible fósil que é máis contaminante, e unha microxeración de gas que non está en uso. A actuación proposta pasa por modernizar as instalacións, consonte o que di o Código Técnico da Edificación e o Regulamento da Instalacións Térmicas en Edificios, para empregar enerxías renovables. Así, as novas caldeiras funcionarán con pellets e permitirán quentar o vaso de auga da piscina, proporcionar calefacción ao edificio e producir auga quente.

Instalaranse dúas caldeiras de biomasa, de 64 kW de potencia cada unha, que se alimentarán de forma automática desde un silo textil ubicado na parte superior da actual sala das caldeiras de gas. Mellorarase o illamento das tubaxes, para evitar perdas de enerxía, e levarase a cabo unha mellora na regulación do sistema, que estará mellor controlado e por tanto será máis eficiente.

O Concello de Cedeira está a reclamar a construción dunha nova piscina de 25 metros, porén cando ese proxecto se faga realidade –clarexan desde o goberno local- a actual seguirá a prestar servizo á poboación.

Moreda Gil recordou que o Concello de Cedeira está comprometido coa loita contra o cambio climático. No ano 2020 o alcalde asinou o Pacto das Alcaldías polo Clima e a Enerxía, ao que se sumaron máis de 7.000 concellos de 57 países, e a continuación elaborouse un plan de acción que preveía reducir as emisións contaminantes de Cedeira nun 40%. Xunto coas accións de sensibilización para que a poboación contribúa a limitar a contaminación, a administración local adquiriu un compromiso importante no recorte das emisións das súas propias instalacións.