NOVAS

A BANDA DE MÚSICA VILA DE CEDEIRA OFRECE ESTE MÉRCORES O TRADICIONAL CONCERTO DAS LETRAS GALEGAS

A Banda de Música Vila de Cedeira ofrecerá este mércores o seu tradicional Concerto do Día das Letras Galegas. A cita será ás 19.00 horas no Auditorio Municipal, con entrada de balde, e o recital levará por título “Lendas, contos e…música”.

Baixo a dirección de Eduardo Mallén, a Banda de Música Vila de Cedeira intercalará nesta ocasión a lectura de pequenas pasaxes de contos e lendas, tal como anuncia o título do concerto, cun repertorio musical no que destacará a presenza de compositores galegos como David Fiuza.

A Banda de Música de Cedeira ten consolidado o seu prestixio coa súa traxectoria de máis de trinta anos, tempo no que levou diferentes premios e participou en eventos de dentro e fóra de Galicia. Nos últimos anos viviu un cambio xeracional, coa incorporación de novos instrumentistas e un novo director, Eduardo Mallén, un reforzo máis cara o futuro dunha formación que exemplifica o gusto e a tradición musical de Cedeira.

ABERTO O PRAZO DE INSCRICIÓN PARA OS CAMPAMENTOS DEPORTIVOS DE VERÁN DA DEPUTACIÓN DA CORUÑA

As inscricións poderán realizarse ata o 7 de xuño no noso concello, ao cal correspóndelle a primeira quenda (2 de xullo ao 7 de xullo).
Os campamentos están destinados a nenos e nenas de entre 9 e 14 anos de idade e desenvolveranse no IES Rosalía Mera da Deputación, situado na cidade da Coruña. O prezo do campamento é de 85 euros, que inclúe transporte, estadía e manutención, así coma o gasto das actividades.
Terán preferencia os rapaces/as que non participasen no campamento deportivo da Deputación en edicións anteriores. (Realizarase o sorteo, no caso de ser preciso, nos dous días seguintes á ¬finalización do prazo de inscrición).
Durante as xornadas de campamento, a rapazada participante poderá gozar de deportes náuticos, actividades ao aire libre, excursións á praia e visitas culturais, deportivas e etnográficas en zonas de interese na provincia da Coruña. As actividades e xogos buscarán en todo momento fomentar a comunicación, o intercambio de experiencias, a convivencia e o respecto polos demais.

Solicitude campamentos deportivos 2023

A COMPAÑÍA ELEFANTE ELEGANTE REPRESENTA EN CEDEIRA A SÚA OBRA “ALMA DE TIGRE”

A compañía teatral Elefante Elegante representa mañá no Auditorio de Cedeira a súa obra “Alma de Tigre”, unha peza que fala das relacións familiares a través dos recordos de tres irmáns que se atopan nunha casa estartalada para vendela tras a morte da nai. A función será ás 20.30 horas e as entradas poden adquirirse desde media hora antes na billeteira ao prezo de 2,5€.

“Alma de tigre” é unha creación de Gonçalo Guerreiro, responsable tamén da dirección e a escenografía. María Torres leva a dirección artística e forma parte tamén do elenco xunto con Pablo Sánchez, Mario Rodríguez e Julia Laport. A danza, as artes visuais e o cinema mudo transitan pola obra, como é habitual nas montaxes da compañía Elefante Elegante, radicada desde hai uns anos en Culleredo pero orixinalmente nada en Bélxica e creada por actores e actrices de diferentes países que apostaron por traballar cunha linguaxe plástica, poética e universal que non dependera exclusivamente do texto.

Por outra banda, a parroquia cedeiresa de Esteiro celebra desde hoxe as súas festas patronais na honra de Santo Isidro. Esta noite a partir das 22.30h celebrarase unha verbena na que actuarán La Banda del Muelle, Sin Tron ni Son e El Mercado del Rosen, xunto co Dj Brunookawi.

Mañá sábado celebrarase a misa solemne ás 13.30 horas, seguida pola tradicional procesión. A continuación haberá una sesión vermú amenizada polo grupo Pasión. O mesmo conxunto tocará de novo pola noite, nunha verbena na que tamén actuará o grupo Fussion. Para o domingo está prevista unha sesión vermú, a partir das 13.30h, co grupo Antha.