Skip to content Skip to left sidebar Skip to footer

NOVAS

A COMPAÑÍA ELEFANTE ELEGANTE REPRESENTA EN CEDEIRA A SÚA OBRA “ALMA DE TIGRE”

A compañía teatral Elefante Elegante representa mañá no Auditorio de Cedeira a súa obra “Alma de Tigre”, unha peza que fala das relacións familiares a través dos recordos de tres irmáns que se atopan nunha casa estartalada para vendela tras a morte da nai. A función será ás 20.30 horas e as entradas poden adquirirse desde media hora antes na billeteira ao prezo de 2,5€.

“Alma de tigre” é unha creación de Gonçalo Guerreiro, responsable tamén da dirección e a escenografía. María Torres leva a dirección artística e forma parte tamén do elenco xunto con Pablo Sánchez, Mario Rodríguez e Julia Laport. A danza, as artes visuais e o cinema mudo transitan pola obra, como é habitual nas montaxes da compañía Elefante Elegante, radicada desde hai uns anos en Culleredo pero orixinalmente nada en Bélxica e creada por actores e actrices de diferentes países que apostaron por traballar cunha linguaxe plástica, poética e universal que non dependera exclusivamente do texto.

Por outra banda, a parroquia cedeiresa de Esteiro celebra desde hoxe as súas festas patronais na honra de Santo Isidro. Esta noite a partir das 22.30h celebrarase unha verbena na que actuarán La Banda del Muelle, Sin Tron ni Son e El Mercado del Rosen, xunto co Dj Brunookawi.

Mañá sábado celebrarase a misa solemne ás 13.30 horas, seguida pola tradicional procesión. A continuación haberá una sesión vermú amenizada polo grupo Pasión. O mesmo conxunto tocará de novo pola noite, nunha verbena na que tamén actuará o grupo Fussion. Para o domingo está prevista unha sesión vermú, a partir das 13.30h, co grupo Antha.

O CONCELLO LEVA ADIANTE UNHA NOVA CAMPAÑA DE ESCAVACIÓN E CONSOLIDACIÓN NO CASTRO SARRIDAL

A empresa Axa Arqueoloxía iniciou o pasado 17 de abril unha nova campaña de escavación e consolidación no castro de Sarridal coa que queda xa á vista a totalidade da muralla e o torreón defensivo do asentamento, de case once metros de altura. O Concello de Cedeira financia con 18.000€ (IVE incluído) este novo avance no proceso de recuperación do xacemento castrexo, que se ten revelado como un dos máis importantes do Noroeste peninsular a través das diferentes campañas e achados que se sucederon desde 2017.

O arqueólogo Emilio Ramil está á fronte do equipo de seis persoas que traballan no xacemento na actual campaña, que rematará a finais deste mes. Segundo explicou, consolidáronse os restos escavados na anterior incursión, na primavera do pasado ano, e puxéronse ao descuberto máis fiadas de pedra tanto da muralla defensiva como do torreón. No sector da terraza que está situada antes do foxo tamén se está a escavar o empedrado –aparecen dous tipos, un da época castrexa a outro posterior, enriba, da galaico-romana- así como os restos de tres muros.

O Concello de Cedeira impulsou no ano 2017, co apoio da Xunta de Galicia, a escavación do castro Sarridal. O achado dun monumento con forno e cunha pedra formosa, o equivalente na cultura castrexa a un balneario actual, confirmou cos primeiros traballos a importancia do xacemento, xa que estes son elementos dos que só se descubriron cinco ata o momento en Galicia. Cómpre destacar que desde entón sucedéronse as campañas de escavación financiadas polo Concello e as de consolidación custeadas pola Dirección Xeral de Patrimonio e que a través delas puido corroborarse que o asentamento estivo habitado desde o século III ou IV antes de Cristo ata, polo menos, o IV ou o V despois de Cristo, de maneira que hai restos da época castrexa e posteriores, da galaico-romana.

O PLENO APROBA O PLAN DE INFANCIA E ADOLESCENCIA DE CEDEIRA E A CREACIÓN DO SEU CONSELLO LOCAL

O Concello de Cedeira ten xa aprobado o seu primeiro Plan de Infancia e Adolescencia, un programa de actuación co que o goberno local asume a súa responsabilidade como axente promotor dos dereitos da poboación menor de idade do municipio. O pleno da corporación deulle luz verde nunha sesión extraordinaria na que tamén aprobou os terceiros Orzamentos Participativos, elaborados polo alumnado de 3º de ESO do instituto.

Coa aprobación do Plan de Infancia e Adolescencia créase o Consello Local da Infancia e Adolescencia (CLIA), que se reunirá periodicamente para consultar e implicar á poboación menor de idade de Cedeira nas políticas municipais. No plan identifícanse unha serie de obxectivos para os vindeiros cinco anos, entre os que están a organización de obradoiros sobre sexualidade no IES, achegar á mocidade información sobre os recursos que existen fronte á violencia machista, a ampliación do horario do Centro de Ocio Xuvenil, a creación de grupos para estudar, a mellora do catálogo de libros infantís e xuvenís na biblioteca, a realización de murais por parte de nenos e nenas ou a consulta ao CLIA sobre a oferta cultural e deportiva.

A elaboración do Plan foi un proceso participativo no que se contou con alumnado do colexio Nicolás do Río e do IES Punta Candieira. Organizáronse diferentes reunións e obradoiros para recoller as súas opinións e propostas nos que se amosaron moi entusiasmados e dispostos a aportar. Xunto coas súas ideas, o plan recolleu tamén as das asociacións socioculturais e deportivas de Cedeira, entre as que estiveron as de pais e nais de alumnos, así como as dos representantes políticos no concello e as dos técnicos municipais.

No mesmo pleno, celebrado o venres 5, aprobáronse os terceiros Orzamentos Participativos de Cedeira. Tal como se informou recentemente, unha representación do alumnado de 3º de ESO do IES Punta Candieira defendeu na sesión a proposta previamente votada en asemblea. Trátase dun proxecto que leva por título “Cedeira respira deporte” e que está orzamentado en 22.600€. O goberno local aceptou elevar a partida inicialmente prevista, 20.000€, para facer posible a compra do equipamento para o ximnasio municipal contemplada no mesmo. Na relación de equipamento para o ximnasio municipal están oito máquinas diferentes de forza e musculación.