NOVAS

OITO ESTABLECEMENTOS HOSTALEIROS DE CEDEIRA SERVIRÁN DO VENRES AO DOMINGO AS SÚAS “TAPAS DE OUTONO”

Oito establecementos hostaleiros de Cedeira van concentrar o mellor da súa cociña nos petiscos do certame Tapas de Outono, que se desenvolverá do venres 3 ao domingo 5 e que, un ano máis, organiza o Concello para dinamizar o sector e poñer en valor o seu bo facer. As tapas incorporarán necesariamente, tal e como establecen as bases, ingredientes propios deste tempo e serviranse a 2,5€.

Gastrobar O Amanexo, O Mesón, Taberna Praza do Peixe, Galifornia, O Mástil, a Taberna do Jojó, Pizzería Sheriff e Cervexaría O Xermolo son os negocios que participan este ano no certame. As tapas serviranse na noite do venres, nos servizos de xantar e cea do sábado e o domingo ao mediodía.

O público que probe os petiscos exercerá de xurado, adxudicando nunha tarxeta que entregarán os locais tres, dous e un punto as tres tapas que máis lle agraden. Porén, terán que probar como mínimo cinco, e ter os correspondentes selos dos establecementos, para poder emitir o voto e participar no sorteo dunha cea para dúas persoas no establecemento gañador.

As bases establecen que os petiscos deberán empregar alomenos dous destes catro ingredientes: cabaza, cabaciña, castaña e setas. Gañará o local que sume máis puntos, ou que obtivera máis votos de tres puntos en caso de empate. Desde o Concello de Cedeira recoméndase probar as oito tapas, ainda que cada persoa poderá participar na votación cunha única tarxeta.

VERÓNICA CODESAL ACTUARÁ EN CEDEIRA O DÍA 10 NO MARCO DA XIRA DO SEU ÚLTIMO TRABALLO “100 VOLTAS”

O Auditorio Municipal de Cedeira acollerá o vindeiro 10 de novembro, o concerto da xira de presentación do novo traballo discográfico de Verónica Codesal, “100 voltas”. A líder do grupo Ialma, que acadou sona internacional coa súa participación e segundo posto en Eurovisión no ano 2003, co grupo belga Urban Trad, propón neste disco unha viaxe á esencia da cultura e a tradición galegas baixo o foco da contemporaneidade. O concerto, de entrada gratuída, será ás 21.30h e forma parte do ciclo Outono Cultural da Deputación da Coruña.

A pandereteira e cantante Verónica Codesal comparte esta nova aventura musical con dous instrumentistas portentosos que a teñen acompañado xa en moitas ocasións: Didier Laloy, ao acordeón diatónico, e Damiel Chienci ao violín. En “100 voltas”, Verónica Codesal mistura textos tradicionais, letras propias e tamén versos de poetas contemporáneas como son Lucía Aldao, Yolanda Castaño, Rosalía Fernández Rial e Brais Fernandez. É un proxecto en feminino, no que cobran protagonismo as historias de mulleres, e incorpora, coincidindo co vinte aniversario do seu paso por Eurovisión, unha nova versión do tema “Sanomí”, co que Bélxica acadou aquel celebrado segundo posto.

Verónida Codesal, filla de emigrantes galegos en Bélxica, é unha activista da cultura e a lingua galegas. Entre 2002 e 2012, e desde 2015 é cantora do grupo Urban Trad, posto que comparte con Soetkin Collier. Forma parte tamén de diferentes proxectos municipais: Camaxe, Ialma, Vivas Niñas, e é profesora de danza galega no grupo Foliada. Participa tamén das actividades do Muziekpublique, un organismo de Bruxelas que traballa na promoción da música e baile tradicionais de todo o mundo.

Máis información na seguinte ligazón:

Descarga información

100_VOLTAS_-_GAL_NEW[1]

CEDEIRA ENTRÉGASE DESDE MAÑÁ Á FESTA DO SAMAÍN

A vila de Cedeira volve un ano máis ao cerne da festa tradicional do Samaín galego, fuxindo do anglosaxón Halloween. Será un ano máis unha festa popular, en cuxa organización está implicada unha boa representación do tecido asociativo local, e terá o seu centro no paseo da Mariña e nas rúas do casco vello durante a tarde de mañá venres, día 27, e do sábado 28.

Desde o Concello de Cedeira recordan o sentido da festa, que é “familiar e integradora”, arredor do tallado das caliveras na cortiza dos melóns. Quen queira ir disfrazado, recomendan, pode ir de pantasma branca, as chamadas “avisións”, ou ben coa cara ciscada simulando ser unha ánima doutro mundo.

O programa comeza mañá venres ás 17.00 horas no paseo da Mariña, onde se desenvolverán un taller de zonchos e outro de pintura. Ás 20.00 horas, co lusco e fusco, a compañía Barafunda ofrecerá o espectáculo “Os espíritus divertidos do Samaín”.

O Centro de Ocio Xuvenil organiza tamén para a tarde de mañá venres, de 17.30 a 19.30 horas, un obradoiro de repostería de Samaín que será impartido por Mercedes Fernández e María Arribí.

Para o sábado, a partir das 17.00 horas, están previstos obradoiros de tallado de cabazas e de maqueado, baixo as carpas que se instalarán no paseo da Mariña. Estarán expostas as caliveras, nas que ano tras ano a xente de Cedeira plasma toda a súa creatividade. Abrirá tamén un ano máis as súas portas a “Casa do Terror” e ofrecerase unha merendola de outono ao público, con bola de axucre e requeixo.

Sobre as 20.30 horas será o pasarrúas, un desfile no que van maiores e pequenos e que percorre as rúas do casco vello case ás escuras, só coa luz das velas que leven algúns dos participantes. É un percorrido barulleiro e cheo de risas.

Xunto coa Asociación de Amigos do Samaín, colaboran na organización desta festa as asociacións Mulleres da Vila, Buxainas, Mares, a Escola de Música, a Banda de Música e a ANPA Picapeixe.

Redondeará o programa o pase da película “O corpo aberto” o domingo, ás 19.00 horas, no Auditorio Municipal. Cadra co ambiente esta historia dirixida por Ángeles Huerta sobre un mestre que vai destinado a unha aldea inhóspita e de tradicións ancestrais. Nun lugar dominado pola superstición, a morte dun veciño da aldea libera un espírito en busca dun corpo que lle permita seguir coa súa existencia, que levará ao protagonista a cuestionar os límites entre o mundo dos vivos e o dos mortos. É unha proxección enmarcada no ciclo Mestre Mateo, que leva a Cedeira as películas premiadas e nominadas no certame do cine en galego. Neste caso, “O corpo aberto” recibiu o premio ao mellor longametraxe.