NOVAS

A CAMPAÑA DE ESCAVACIÓN NO SARRIDAL DESCOBRE OS RESTOS DUNHA FORXA DA ÉPOCA GALAICO ROMANA

O equipo de Axa Arqueoloxía vén de rematar unha nova campaña de escavación no Castro Sarridal, con financiación da Dirección Xeral de Patrimonio, que deixou interesantes achados. En concreto o descubrimento de varios elementos dunha forxa castrexa da época galaico romana: parte dos muros, a fragua, unha base de pedra que faría as veces de macho e as pías nas que estaría a auga para enfriar as pezas. Emilio Ramil, o director dos traballos arqueolóxicos, confirmou que en moitos xacementos galegos apareceron restos que confirmaron este tipo de actividade industrial, pero que esta é a primeira ocasión en que se poden presentar estas estruturas.

A zona da forxa está situada entre a muralla perimetral do castro e o cantil, fóra do recinto residencial. Na escavación apareceron restos de opus signinum, un pavimento romano, así como pezas de tella que indican a existencia dunha cuberta a dúas augas nesta área de traballo. Este pavimento está sobre outra capa de empedrado propiamente castrexo na que aparecen vestixios de foxas que xa eran empregadas para recoller a auga, así como escorias que confirman que tamén antes esta parte do asentamento era utilizaba para forxar ferramentas de ferro antes da chegada dos romanos. Entre os achados están tamén pedras anfibolitas que son altamente refractarias e que se empregarían para expor ao lume.

Esta nova campaña de escavacións confirmou unha vez máis a importancia do xacemento do Castro Sarridal. Desde o ano 2017, no que comezaron os traballos, sucedéronse as campañas financiadas polo Concello de Cedeira e a Dirección Xeral de Patrimonio. Confirmouse a través dos sucesivos achados que este foi un lugar habitado desde o século III ou IV a.C. ata o IV ou V d.C. Nel apareceu a quinta pedra formosa descuberta en Galicia –o que sería un balneario castrexo-, unha moneda romana e as devanditos elementos dunha ferrería prehidráulia, entre outros elementos.

CEDEIRA ACOLLERÁ O DÍA 13 UN TALLER GRATUÍTO DE EFICIENCIA ENERXÉTICA E ORGANIZATIVA PARA PEMES

A aula de usos múltiples do Polideportivo Municipal de Cedeira acollerá o vindeiro día 13, de 18.00 a 20.00h, un “Taller de eficiencia enerxética e organizativa” para empresarios e autónomos. A actividade é totalmente gratuíta e as persoas interesadas poden inscribirse enviando un mail a coruna@acelerapyme.asime.es.

As persoas emprendedoras que asistan ao taller poderán coñecer ferramentas dixitais desde as que controlar, monitorear e xestionar en remoto aqueles equipos do seu negocio que consumen enerxía. É unha tecnoloxía que permite detectar as ineficiencias para corrixilas, controlar o gasto, dixitalizar operacións…

O taller estará tamén adicado á optimización da xestión dos almacéns a través dunha solución que reduce o tempo de procura e localización dos elementos almacenados e diminúe os erros ao colocar ou retirar os produtos.

A actividade será práctica e permite que a persoa interesada poida incorporarse en calquera momento no caso de que non poida asistir ás dúas horas do taller. É un programa impulsado con fondos Next Generation e enmarcado no Plan de Recuperación, Transformación e Resilencia do Goberno.

A CONSELLERÍA DE SANIDADE DÁ O VISTO BO AOS TERREOS PARA EDIFICAR O NOVO CENTRO DE SAÚDE DE CEDEIRA

O alcalde de Cedeira, Pablo Diego Moreda Gil, e o concelleiro José Antonio Rodríguez mantiveron este luns unha reunión de traballo co conselleiro de Sanidade, Julio García Comesaña, para seguir avanzando cara á comprometida construción do novo Centro de Saúde da localidade. Tal como explicou Moreda, está xa en marcha a modificación puntual do PXOM para facer posible a posta a disposición da Consellería de máis superficie e acometer así unha edificación que supere os 2.000 metros cadrados inicialmente requiridos.

A reunión deu continuidade ao último contacto entre Concello e Consellería, o pasado 4 de maio, cando os técnicos de Sanidade expresaron a conveniencia de ampliar a cesión de solo para o mellor desenvolvemento do proxecto. O goberno local puxo en marcha os trámites e, de feito, enviou xa o pasado 17 de novembro a documentación para a avaliación ambiental da modificación puntual do PXOM. Con ela ampliarase a parcela dotacional ata os 3.665 metros cadrados. Deles, serán edificables 2.643,62 metros cadrados por planta e poden facerse catro: soto, semisoto, baixo e primeiro piso.

O conselleiro de Sanidade, Julio García Comesaña, felicitou ao goberno local de Cedeira pola celeridade coa que ten resolto esta nova demanda da súa administración, igual que sucedeu antes, cando as limitacións impostas pola ordenación de Costas obrigou a desbotar a inicial idea de ampliar o Centro de Saúde actual. Así, o Concello vai ocuparse agora de facer as expropiacións e os trámites precisos para a posta a disposición dos devanditos terreos, así como do desenvolvemento urbanístico da súa contorna. Na urbanización da zona está incluída a apertura dun novo vial e a creación dun aparcadoiro con 41 prazas.

Moreda Gil invitou a participar neste encontro a Xulio Cribeiro, o voceiro do grupo municipal do PP, quen puido comprobar o beneplácito da Consellería de Sanidade co traballo feito desde o Concello. Destacou o alcalde que igualmente lle ten proposto a Cribeiro a posibilidade de participar noutras xuntanzas de cuestións importantes para o pobo, como a elaboración dos pregos do concurso de limpieza ou a modificación do plan xeral.

Os trámites da modificación puntual do PXOM poden ocupar entre 9 e 12 meses, explicou Moreda, e a intención que expresou a Consellería na reunión foi a de comezar de inmediato a redactar o borrador do convenio de cesión dos terreos para a construción do novo Centro de Saúde. Na reunión comentáronse tamén de xeito informal as posibilidades que o traslado ao novo edificio abrirá para o actual edificio do Centro de Saúde. Segundo explicou Moreda, falouse de diferentes posibilidades como un centro de día ou unha residencia de maiores, ainda que apuntou que o seu destino será decidido pola veciñanza.