Skip to content Skip to left sidebar Skip to footer

NOVAS

O GOBERNO CENTRAL FINANCIARÁ CON MÁIS DE 2,6 MILLÓNS DE EUROS A RECUPERACIÓN DA CETARIA DO SARRIDAL E A REXENERACIÓN DA PRAIA DA MAGDALENA

O alcalde de Cedeira, Pablo Diego Moreda Gil, mantivo estes días un contacto co subdirector xeral para a Protección da Costa, Ángel Muñoz Cubillo, no que confirmou que o Ministerio de Transición Ecolóxica vai financiar integramente o custo dos proxectos de recuperación da antiga cetaria do Sarridal e de rexeneración da praia da Magdalena, valorados o primeiro en máis de 312.000 euros e o segundo en arredor de 2,3 millóns de euros. Moreda Gil expresou a súa satisfacción polo apoio do Ministerio de Transición Ecolóxica a estas dúas actuacións tan importantes para Cedeira, coas que se vai revalorizar o atractivo do seu patrimonio natural.

A recuperación da cetaria do Sarridal é unha actuación valorada en 312.589,89€ e abrangue a adecuación dos accesos e a recuperación das vellas estruturas destes viveiros, construídos nos anos 50 xunto á praia de Soneiras para gardar e engordar o marisco que logo se comercializaba a nivel nacional. O goberno municipal de Cedeira rescatou este proxecto, que estaba paralizado desde o ano 2010 por cuestións meramente técnicas e agora ten o compromiso do Ministerio, que o vai sacar a licitación antes de que acabe o ano.

Así, a administración local encargouse do informe de impacto ambiental e Demarcación de Costas someteuno a exposición pública a finais de 2018. Requeriu tamén da tramitación dunha addenda para actualizar o prezo e correxir as obxeccións técnicas que se puxeran á redacción inicial da intervención. Moreda destacou que esta é unha actuación que vai revalorizar o conxunto patrimonial da zona de Sarridal, onde está o xacemento arqueolóxico dun conxunto castrexo coa pedra formosa máis antiga de Galicia e o castelo da Concepción. “E unha zona de gran valor histórico, na que podemos explorar o pasado da vila diante dunhas paisaxes espectaculares”, subliñou Moreda.

A rexeneración da praia da Magdalena foi tamén unha cuestión prioritaria para o goberno municipal de Cedeira nos últimos anos. O principal areal da vila sufre un desequilibrio desde finais dos 90 que se traduciu nun retroceso da liña de costa e que pon en perigo o cordón dunar existente. Ao longo dos anos sucedéronse os aportes de area para paliar os efectos que os temporais ocasionaban na praia, se ben quedou patente a necesidade dunha intervención definitiva. Froito das xestións realizadas, en febreiro de 2019 Demarcación de Costas sacou a licitación a redacción do proxecto de rexeneración da praia da Magdalena e o estudo de impacto ambiental, un traballo que se adxudicou á consultoría Acadar Ingeniería y Consultoría por 77.440€.

O traballo, que xa foi presentado ao goberno local e á Confraría, vaise someter agora a exposición pública. Segundo explicou o alcalde, Pablo Moreda, é unha intervención para “superar os parches que se estaban a poñer sobre as consecuencias para ir á solución do problema”. Durante o período de exposición vai ser presentado e explicado aos grupos municipais por parte dos técnicos que o redactaron.

Coa boa nova da chegada da financiación necesaria para abordar estes importantes proxectos, Moreda Gil quixo agradecer o traballo do anterior equipo de goberno e tamén do actual, así como lembrar e recoñecer a dedicación da Plataforma en Defensa da Ría, na que se integraron os partidos da anterior coalición de goberno (PSOE, BNG e Anova) e Esquerda Unida, xunto coa Asociación Mares de Cedeira e a Confraría de Pescadores. Expresou tamén o seu agradecemento a Ángel Mato, que na súa etapa como senador colaborou para sacalos adiante e á deputada Montse García Etchevarría, que tamén contribuíu a levar a bo porto as xestións do goberno local.

O CONCELLO REPARTIRÁ 70.000€ ENTRE OS NEGOCIOS DA LOCALIDADE PARA MINIMIZAR O EFECTO DA COVID

A Xunta de Goberno do Concello de Cedeira acaba de aprobar a convocatoria dunha nova liña de axudas dotada con 70.000€ e dirixida a paliar as perdas que a pandemia provocou ás pequenas empresas e autónomos da localidade. Tal como informou o alcalde, Pablo Diego Moreda Gil, é un novo programa financiado ao 100% con fondos municipais cuxo obxectivo é “que ningún negocio local quede sen apoio, é dicir, garantir que aqueles que non obtiveron o respaldo do PEL Reactiva conten desta volta con axuda para remontar a difícil situación que atravesaron e que aínda teñen que enfrontar”. Segundo explicou, a convocatoria foi consensuada coa oposición, á que agradeceu o seu respaldo no tema.

As axudas van destinadas a traballadores/as autónomos/as con ou sen empregados e pequenas empresas que teñan en Cedeira o seu domicilio fiscal ou un local de negocio. Quedarán excluidas nesta ocasión as empresas que constituiron o obxecto de financiación do programa PEL Reactiva – hostalería e axencias de viaxes-.

As bases establecen axudas de 1.000, 1.250 e 1.500€ para as persoas autónomas sen traballadores ao seu cargo; para os autónomos ou empresas con entre un e cinco empregados e para os autónomos ou empresas con máis de cinco traballadores, respectivamente. Porén, a convocatoria establece que se esgotará o crédito dispoñible, de 70.000€, entre todas as solicitudes que cumpran os requisitos e que, no seu caso, ratearanse os fondos proporcionalmente para garantir que todos reciben unha axuda.

As subvencións servirán para financiar gastos estruturais e de funcionamento correntes vencellados ao mantemento da actividade no período comprendido entre o 1 de xaneiro e o 31 de decembro de 2021, ben sexan de aluguer de local ou vehículos de empresa, pago de hipoteca da sede da empresa, dixitalización do negocio, nóminas de traballadores, cotas da Seguridade Social, subministracións de materias primas, servizos profesionais, seguros, facturas de luz, electricidade ou gas, etc.

Segundo informou o alcalde, as bases serán publicadas en breve no Boletín Oficial da Provincia e a continuación abrirase o prazo dun mes para presentar as solicitudes. Moreda recordou que no ano 2020 o Concello de Cedeira convertiuse no primeiro da zona en artellar con fondos propios un programa de axudas para os negocios locais e subliñou que esta nova liña de axudas vén completar e complementar aquel programa e o do PEL-Reactiva, que se convocara posteriormente.

Así, o Concello de Cedeira eleva a máis de 170.000 euros os fondos municipais destinados a paliar as consecuencias da covid na economía local. Así, na convocatoria exclusivamente municipal repartíronse 76.750€ entre 112 microempresas e autónomos de Cedeira e na do PEL Reactiva pagáronse 62 axudas por un importe total de 135.324,46€, do que a Deputación custeou o 80% e o Concello, o 20% restante.