Skip to content Skip to left sidebar Skip to footer

NOVAS

O CONCELLO ADXUDICA POR 110.000€ A OBRA DE REHABILITACIÓN ESTRUTURAL DO ANEL DA PRAZA ROXA

A Xunta de Goberno do Concello de Cedeira acaba de aprobar o expediente de adxudicación da obra de “Rehabilitación estrutural e do pavimento do anel vermelo da Praza Roxa”, coa que vai mellorar as condicións dun espazo central de convivencia e de lecer para a cidadanía de Cedeira. A empresa BCNOR Gestión y Soluciones Avanzadas gañou o concurso, ao que se presentaron tres ofertas, cun orzamento de 110.022,36€ (IVE incluído).

Tal como informou o alcalde, Pablo Diego Moreda Gil, trátase dunha obra importante no marco do programa de investimentos que o goberno local ten para este ano, dotado con máis de 1,1 millóns de euros e ampliado despois con máis de medio millón de euros procedentes dos remanentes do exercicio anterior. A actuación está incluída no plan de intervencións financiadas ao abeiro do POS+2021 da Deputación da Coruña.

A obra, que ten un prazo de execución de dous meses, vai servir para reparar o pavimento da Praza Roxa, que presenta fendas e deterioración en moitos puntos polo efecto das raíces das árbores. Así, os traballos van consistir en levantar o chan actual para habilitar outro máis resistente e coa adherencia necesaria para o uso intenso que ten a zona. Porén, coa intención de non molestar ou interromper a animada vida social que acolle esta zona durante o verán, o comezo das obras adíase ata finais de setembro.

Tal como consta no prego técnico do proxecto, os traballos incluirán, tras o levantamento do pavimento actual, a poda das raíces e a colocación dunha malla que evite no futuro que estas levanten e deformen a superficie. Enriba desta malla irá unha capa de zahorra e sobre ela un aglomerado asfáltico. A superficie da praza, de 1.500 metros cadrados, levará un acabado de resina epoxy, usado frecuentemente para polideportivos ao aire libre pola súa adherencia e resistencia. No proxecto contémplase tamén a pintura de frases, símbolos ou poemas sobre a superficie para darlle unha estética máis atractiva ao conxunto.

ESTÁ ABERTO O PRAZO PARA PRESENTAR PROXECTOS PARA O CONCURSO DE PINTURA MURAL

Tras a publicación no Boletín Oficial da Provincia das bases do concurso de pintura mural, o Concello de Cedeira ten aberto o prazo para a presentación de propostas. Así, as asociacións de veciños e outras entidades, así como particulares, poden achegar ata o vindeiro10 de agosto os seus proxectos para espazos da súa titularidade e optar as dúas axudas de 2.500€ que o Concello de Cedeira vai conceder para impulsar a presenza destas obras de arte ao aire libre na vila.

A selección das ubicacións correrá a cargo dunha comisión técnica que terá en conta as condicións de seguridade estrutural do muro, a viabilidade dos traballos, o interese espacial e urbano, a existencia de elementos descontextualizados como cables, caixas de servizos… e outras cuestións que poidan afectar á efectividade dos murais.

A temática será libre, pero terán prioridade os murais identitarios que relaten a historia de Cedeira, as súas actividades, fontes de riqueza e aqueles aspectos que identifiquen á vila. Estarán prohibidas as representacións que constitúan apoloxía da violencia, obras de contido racista, sexista, xenófobo, obsceno ou calquera outro que atente contra a dignidade das persoas. Consulta as bases: https://bop.dicoruna.es/bopportal/publicado/2021/07/26/2021_0000005837.pdf

O CONCELLO INSTALA TOBOGÁNS ACUÁTICOS XIGANTES DESDE HOXE ATA O DOMINGO NA PRAZA DA CONSTITUCIÓN

O Concello de Cedeira abre desde hoxe xoves ata o vindeiro domingo, día 1 de agosto, dous tobogáns xigantes acuáticos na praza da Constitución (A Revolta). Os inchables estarán abertos de 11.00 a 14.00 e de 16.30 a 20.00 horas e as persoas que queiran lanzarse por eles poderán inscribirse na mesma instalación, onde se velará polo cumprimento dos protocolos covid en todo momento.

Haberá un tobogán máis grande, o “Gravity”, de 35 metros de lonxitude e cunha altura mínima de 1,5 metros, e outro máis pequeno, o “Selva”, que está formado por dous esvaradoiros de 18 metros.

Por outra banda, o Concello de Cedeira promove unha homenaxe a Fusa Guillén este venres, cun acto no que o grupo de teatro afeccionado Valverde porá en escea dúas obras de Chejov, “A Corista” e “Petición de man”, que comezara no seu momento a ensaiar con ela. No mesmo acto estarán tamén Helga Méndez, Carlos Labraña, Paz Guillén e J. Carlos Dopazo, lembrando á querida “Fusa” a través de interpretacións e música. A cita é no Auditorio Municipal ás 20.00 horas, e as persoas interesadas en asistir poden reservar entradas a través do whatsapp no número 649 876 614 ou ben enviando un mail a enrique.vazquez@cedeira.gal.

E para o domingo, día 1 de agosto, o Concello propón a celebración do “Día da Bici” cun paseo dunha hora polas rúas da vila. As persoas interesadas poderán apuntarse no lugar da saída, a Praza Roxa, desde as 10.30 horas. Ás 11.00 horas comezará o paseo por Cedeira, e tamén un percorrido alternativo en bici de montaña, tamén dunha hora de duración. para aqueles ciclistas que estean equipados e preparados.